Отбасы банк 31 тамыздан бастап «Ұмай» ипотекасын іске қосады. Қаржыландыру кезең-кезеңмен жүргізіледі. Алғашқы транш — 9 млрд теңге банкке түсті. Бағдарламаны Азия даму банкі қаржыландырады.

«Ұмай» — жұмыс істейтін әйелдерге арналған ипотекалық бағдарлама. Жаңа құрылыстан да, екінші нарықтан да баспана алуға болады. Бастапқы жарна 15%-дан басталады.

Кім қатыса алады

Ипотеканы мына талаптарға сай келетін әйелдер рәсімдей алады:

  • ресми табысы бар;
  • соңғы 6 айда зейнетақы қорына аударым жасалған;
  • жалдамалы қызметкер және жеке кәсіпкер.

Негізгі талап — төлем қабілетін растау. Әйел мен жұбайының жалпы табысы айына 1.25 млн теңгеден аспауы керек.

Басқа жылжымайтын мүліктің болуы кедергі емес. Қазақстанның кез келген қаласынан баспана алуға болады, тіркелген мекенжай маңызды емес.

«Ұмай» ипотекасының шарттары

  • Мөлшерлеме — 14.8% (ЖТСМ — 16.3–16.8%).
  • Бастапқы жарна өңірлерде 15%-дан, Алматы мен Астанада 20%-дан басталады.
  • Несие сомасы — 50 млн теңгеге дейін.
  • Мерзімі — 25 жылға дейін.
  • Бірінші және екінші нарықтан үй алуға болады.

Екінші нарықтағы баспана 2016 жылдан кейін салынған болуы керек.

Дайын немесе салынып жатқан жаңа құрылыс алуға болады. Бірақ ҚЖК кепілдігі немесе сақтандыруы болуы қажет.

Бірінші нарықтағы тұрғын үйді тек «Баспана маркет» арқылы рәсімдеуге болады. Пәтер бағдарлама қатысушысының атына жазылады. Некеде болса, баспана ерлі-зайыптылардың ортақ мүлкі болып есептеледі. Қоса қарыз алушыларды тартуға болады.

«Ұмай» бағдарламасы бойынша қарыз алушы өзі тұрып жатқан үйді жөндеуге несие ала алады. Максимал сома — 15 млн теңге.

Бастапқы жарна — тікелей сатушыға

Бастапқы жарнаға арналған ақшаны Отбасы банктегі депозитке салудың қажеті жоқ.

Алматы мен Астанада банк баспана құнының 80%-ын қаржыландырады. Қалған 20%-ды клиент сатушыға береді.

Басқа өңірлерде баспана құнының 85%-ына несие рәсімдеуге болады, ал қалған 15%-ды сатып алушы сатушыға өзі төлейді.

Мысалы, пәтердің бағасы 32 млн теңге, бірақ бағалаушы оның 30 млн теңгеге бағалады. Банк несиені бағалау құнына қарап береді.

Бұл жағдайда:
несие — 24 млн теңге;
бастапқы жарна — 6 млн теңге.
Сатушы мен бағалаушының арасындағы баға айырмашылығын ескеру керек.

Депозит міндетті емес, бірақ мөлшерлемені төмендетуге көмектеседі

«Ұмай» бағдарламасында бастапқы жарна сатушыға тікелей төленетіндіктен, Отбасы банктегі депозитті, соның ішінде зейнетақы жинағын пайдалану мүмкін емес.

Депозитте ақшаңыз бұрыннан болса, бұл алдын ала тұрғын үй қарызынан 3.5—5%-дық тұрғын үй қарызына тезірек өтуге мүмкіндік береді.

Алдын ала қарыз төленіп жатқанда ай сайынғы төлемнің бір бөлігі пайызды өтеуге, ал екінші бөлігі жинаққа бағытталады. Депозитте қажет сома жиналғанда мөлшерлеме төмендейді. Депозиттегі жинақ көп болса, тұрғын үй қарызына тезірек өтуге болады.

Жинаққа:
банктің 2% сыйақысы;
мемлекеттік сыйақы — 200 АЕК-ке дейінгі сомаға 20% қосылады.

«Ұмай» бойынша ай сайын қанша төлеу керек

Мысал ретінде 30 млн теңге тұратын пәтерді алайық.

1-нұсқа — депозитте жинақ жоқ

Тұрғын үй құны 

30 млн тг

Несие сомасы 

24 млн тг

Бастапқы жарна 

6 млн тг

Депозиттегі жинақ 

0 тг

Мөлшерлеме 

14.8%

Алғашқы 10 жылдағы ай сайынғы төлем

387 200 тг

10 жылдан кейін қарыз алушы тұрғын үй қарызына ауысады. Бұл кезде мөлшерлеме мен ай сайынғы төлем азаяды. Нақты сома депозиттегі жинаққа байланысты болады.

2-нұсқа — депозитте жинақ бар

Тұрғын үй құны 

30 млн тг

Несие сомасы 

24 млн тг

Бастапқы жарна 

6 млн тг

Депозиттегі жинақ 

2.4 млн тг

Мөлшерлеме 

14.8%

Алғашқы 10 жылдағы ай сайынғы төлем

365 600 тг

Айырмашылығы — айына 21 600 теңге. Яғни депозиттегі жинақ ай сайынғы төлемді азайтып қана қоймай, мөлшерлемесі төмен тұрғын үй қарызына тезірек өтуге көмектеседі.

«Ұмай» бағдарламасына қалай өтініш беруге болады

Өтінішті:

  • Отбасы банктің сайтындағы «Бейнеқызмет көрсету» сервисі арқылы онлайн;
  • «Баспана маркеттегі» жеке кабинет арқылы;
  • банк бөлімшесінде беруге болады.

Онлайн өтініш бергенде электрондық құжаттар болса жеткілікті.

Бұл бағдарлама бұған дейін де жұмыс істеген. Отбасы банк пен Азия даму банкі «Ұмай» бағдарламасын алғаш рет 2021 жылы іске қосқан. Сол кезде бағдарламаға 38 млрд теңге бөлінген. Үш жыл ішінде ипотека 3661 әйелге өз баспанасын сатып алуға көмектесті. Биыл ипотекалық бағдарламаға шамамен 45 млрд теңге бөлінді.

Пайдалы материалдар:
Пәтер сатып алар алдында нені тексеру керек: құжаттар мен маңызды жайттар
Нотариуссыз мәміле рәсімдеп, 50 мың теңге үнемдеудің жолы
Бір бөлмеліден екі бөлмеліге, екі бөлмеліден үш бөлмеліге: қанша ақша қосу керек
Мемлекет әлеуметтік тұрғын үйді жаңа ереже бойынша үлестіреді
Алматы мен Астанадағы жалға берілетін арзан баспана — 35 000 теңгеден басталатын нұсқалар