1 қазаннан бастап танымал «7-20-25» ипотекасы бойынша осы жылдың соңғы лимиті, яғни қалған 25 млрд теңге бөлінді. Жалпы билік бұл бағдарламаға жылына 100 млрд теңге жұмсайды.

Қалай өтінім беру керегін, кімдер алатынын және қандай үй таңдауға болатынын түсіндіреміз.

«7-20-25» қандай ипотека?

Бұл жалпы халыққа арналған ең арзан ипотека. Сыйақы мөлшерлемесі — 7%. Тек жаңа үйден пәтер таңдауға мүмкіндік бар.

Биыл тоғыз айда оператор-банктер жоспарланған 100 млрд теңгенің 74.9 миллиардына 3696 қарыз берді.

Ипотека кімге беріледі?

«7-20-25» мына шартттарға сай келетін Қазақстан азаматтарына беріледі:

  • соңғы 18 айда атында баспана жоқ — бұл талап үміткердің жұбайына да қатысты;
  • табысын растай алатын;
  • төлеп жатқан ипотекасы жоқ;
  • бұрын осы бағдарламаға қатыспаған.

Маңызды: «7-20-25-ке» бір-ақ рет қатысуға болады.

«7-20-25» шарттары

  • Мөлшерлеме — жылына 7%.
  • Бастапқы жарна — 20%-дан басталады.
  • Кредит мерзімі — 25 жылға дейін.

Қарыздың максимал сомасы аймаққа байланысты:

  • Астана, Алматы және олардың маңында, сонымен қатар Ақтау, Атырау және Шымкентте — 30 млн теңге;
  • Қарағандыда — 25 млн теңге;
  • басқа өңірлерде — 20 млн теңге.

Қандай үй алуға болады?

«7-20-25» бойынша тек жаңа ғимараттан пәтер таңдай аласыз.
Құрылысы жүріп жатқан және екінші нарықтағы үй жарамайды.

«7-20-25» бойынша қай банктер қарыз береді?

Жеті коммерциялық банк кредит рәсімдейді:

  • Halyk Bank,
  • Банк ЦентрКредит,
  • Freedom Bank Kazakhstan,
  • Еуразиялық банк,
  • Bank RBK,
  • ForteBank,
  • Altyn Bank.

Отбасы банк бұл ипотека бойынша жұмыс істемейді.

Қалай өтінім беру қажет?

Өзіңіз өтінім бересіз. Алдымен оператор-банктің сайты не мобильді қосымшасы арқылы онлайн өтінім жолдайсыз.

Ол үшін таңдалған пәтердің кадастр нөмірі мен құрылыс салушының БСН-і керек.
Негізгі өтінім банк бөлімшесінде рәсімделеді.

Маңызды нюанс бар — алдын ала өтінім беру мен кредит рәсімдеу арасында бірнеше ай өтуі мүмкін. Осы уақытта сіз таңдаған пәтер сатылып кетуі ықтимал. Ондай жағдайда басқасын іздеп, процедурадан қайта өтуге тура келеді.

Бағдарламаның қиындығы

Басты мәселе — шарттағы бағаға сай пәтер табу.

Дайын, бірақ әлі өтпеген объект табу өте қиын. Себебі үй қолданысқа берілетін кезде көп пәтер сатылып кетеді.

Бөлінетін қаражат та шектеулі — жылына 100 млрд теңге. Демек шамамен 5 мың кредит рәсімделеді.

Банктер ипотеканы өз ақшасына береді. Кейін Қазақстанның орнықтылық қоры тоқсандық лимит шегінде қарыздарды сатып алады.

Сондықтан өтінім саны шектеулі. Лимит таусылғанда, банк келесі траншқа дейін өтінім қабылдау процесін тоқтатады.

Шарттары өзгере ме?

Әзірше жоқ. 7 қазандағы жағдайға сай Қазақстанның орнықтылық қоры Ұлттық банктен «7-20-25» бағдарламасының шарттарын өзгерту туралы хабар алмапты.

Қанша ипотека берілді?

Бағдарлама алғаш іске қосылған 2018 жылдың қыркүйегінен 2026 жылғы 1 қазанға дейін ел азаматтары 1 трлн 249 млрд теңгеге 86 851 кредит рәсімдеген.

Ең көп қарыз алған мына қалалардың тұрғындары:

  • Астана — 31 942;
  • Алматы — 18 919;
  • Шымкент — 6932.

Пайдалы материалдар:
30 миллиондық ипотека: ай сайын қанша төлеу керек
Екінші нарықтағы баға: қай жерде пәтер қымбаттады
Қазақстандағы ипотека — барлық банктің шарттары