Наурызда «Наурыз» ипотекасының жаңа кезеңі бойынша өтінім қабылдау басталады. Бұрынғы тәжірибе көрсеткендей қызығушылық танытқандар көп, бірақ бәрі бірдей үй сатып алу кезеңіне жете бермейді.

Бағдарлама қалай жұмыс істейтінін және алдын ала не істеу маңызды екенін қарастырайық.

«Наурыз» ипотекасы деген не

«Наурыз» — 2024 жылы іске қосылған мемлекеттік ипотекалық бағдарлама. Бағдарламаның операторы — Отбасы банк. Бағдарлама 2031–2032 жылдарға дейін жұмыс істейді.

«Наурыз» ипотекасы арқылы мынадай тұрғын үй сатып алуға болады:

  • бірінші нарықтағы тұрғын үй, соның ішінде ҚТК кепілдігі бар дайын немесе салынып жатқан тұрғын үй кешеніндегі пәтер — Алматы, Астана, Шымкент қалаларында және облыс орталықтарында;
  • бірінші және екінші нарықтағы тұрғын үй, оның ішінде өңірлер мен моноқалалардағы жер үй.

Облыс орталықтары: Ақтау, Ақтөбе, Атырау, Қарағанды, Көкшетау, Қостанай, Қызылорда, Қонаев, Павлодар, Петропавл, Семей, Жезқазған, Талдықорған, Тараз, Түркістан, Орал, Өскемен.

«Наурыз» бағдарламасынынң шарттары

Қатысушыларға қойылатын басты талап — соңғы 5 жылда қарыз алушының және оның отбасы мүшелерінің (жұбайы, 18 жасқа дейінгі балалары) атында тұрғын үйдің болмауы.

Ипотеканың негізгі шарттары:

  • Мөлшерлеме: 7 % — әлеуметтік осал топтар үшін, 9 % — қалған қатысушылар үшін.
  • Бастапқы жарна:
    — 10 % — дайын пәтер сатып алғанда;
    — 20 % — қара сылақпен әрленген немесе екінші нарықтағы баспана.
  • Қарыз сомасы:
    — 36 млн теңгеге дейін — Алматы мен Астанада;
    — 30 млн теңгеге дейін — өңірлерде.
    Пәтер қара сылақпен әрленген болса, несие сомасының 20 %-ын жөндеу жұмыстарына жұмсауға болады.
  • Несие мерзімі: 19 жыл.

Өтінім беруге қалай дайындалу керек

  • Отбасы банкте депозит ашыңыз

Бағдарламаға қатысу үшін қарыз алушының Отбасы банкте депозиті болуға тиіс. Депозит жоқ болса, оны өтінім берер алдында ашуға болады, ашылған мерзімі маңызды емес.

Депозиттегі ең төменгі сома — 2 млн теңге. Бұдан аз салымы барлар бағдарламаға қатыса алмайды.

Маңызды:
«Табысты», «Жинақ» және «Арнау» депозиттерімен «Наурыз» бағдарламасына қатыса алмайсыз. Мысалы, «Баспана» тарифі бар депозит болуы керек.

  • Меншігіңізде жылжымайтын мүлік бар-жоғын тексеріңіз

Пәтерде немесе үйде үлесіңіз болса (мысалы, мұрагерлік арқылы алынған) өтінім қабылданбайды. Өтінім берер алдында сол үлесті сату көмектеспейді. 5 жыл өткеннен кейін ғана бағдарламаға қатысуға болады.

Тұрғын үй бар-жоғын мына жерден тексере аласыз:
eGov.kz-те,
Kaspi немесе Halyk Bank қосымшаларында.

Қызмет атауы: Ф-6 анықтамасы (жылжымайтын мүліктің болуы туралы)

  • Конкурстық іріктеуге дайындалыңыз

Өтінім берген соң қатысушылар ұпай бойынша рейтингке бөлінелі. Нақты өтетін ұпай жоқ, бәрі өтінім беруші санына және олардың жинақ сомасына байланысты.

Мына жағдайда ұпай беріледі:

  • депозит бойынша банк сыйақысы: әр 1000 теңге үшін — 1 ұпай;
  • ресми неке: +5 ұпай;
  • 18 жасқа толмаған балалардың болуы: +10 ұпай;
  • әлеуметтік осал топтағы адам статусы: +10 ұпай;
  • 35 жастан аспаған: +5 ұпай.

Ұпайдың негізгі бөлігі банк сыйақысына байланысты. Ол депозиттегі ақша сомасына және қаражаттың қанша уақыт жатқанына байланысты.

Бұрынғы кезеңдердің қорытындысы бойынша жинағында сомасы аз қатысушылар іріктеуден өте алмаған.

  • Несие тарихыңыз бен табысыңызды тексеріңіз

Конкурстық іріктеуден кейін Отбасы банк несие өтінімін қарайды. Бұл кезеңде қарыз алушының төлем қабілеттілігі бағаланады.

Банк мыналарды ескереді:

  • ресми табыс;
  • соңғы 6 айдағы зейнетақы аударымдары;
  • қолданыстағы несие мен қарыз;
  • несие тарихы.

Несие жүктемесі жоғары болса, төлем кешіксе, зейнетақы аударымдары болмаса банк несие беруден бас тартады.

Өтінім берер алдында несиелерді жауып, қаржылық жүктемені азайтып алған дұрыс.

Банк өтінімді мақұлдаған соң не істеу керек

Қатысушы 6 айда тұрғын үйді таңдап, сатып алуға тиіс.

Жаңа құрылыстағы үйді тек Отбасы банк ұсынған тізімінен таңдай аласыз. Тізімге банкпен келісімшарт жасасқан және бағаны бекіткен құрылыс компанияларының тұрғын үй кешендері кіреді. Қазір порталда шамамен 850 объект бар.

Өңірлерде таңдау шектеулі, ал ірі қалаларда пәтерлер көбіне қымбат. Қолжетімді нұсқалар көбінесе қаланың шетінде орналасқан.

Екінші нарықтағы тұрғын үйді қатысушылар өздері іздейді, мысалы, Krisha.kz сайтынан.

Ипотека бойынша төлемдер қалай жасалады

«Наурыз» ипотекасы екі кезеңнен тұрады:

  • Алдын ала несие — 8 жыл. Төлем жоғары болады: ақшаның бір бөлігі пайызға, бір бөлігі депозиттегі жинаққа кетеді.
  • Тұрғын үй несиесі — 11 жыл. Депозитте тұрғын үй құнының 50 %-ы жиналған соң мөлшерлеме төмендейді және ай сайынғы төлем азаяды.

30 млн теңге қарыз рәсімдегендегі есеп

Бастапқы жарна (10 %)=3 млн тг

Бастапқы жарна (20 %)=6 млн тг

Алдын ала несие, 8 жыл

7%

9%

7%

9%

Төлем: 283 мың:
пайыз – 175 мың;
депозит – 108 мың

Төлем: 333 мың:
пайыз – 225 мың;
депозит – 108 мың

Төлем: 253 мың:
пайыз – 175 мың;
депозит – 78 мың

Төлем: 303 мың:
пайыз – 225 мың;
депозит – 78 мың

Тұрғын үй несиесі, 11 жыл, 3.8%

Төлем: 132 мың

Төлем: 128 мың

19 жыл ішіндегі таза артық төлем

17.5 млн

22.3 млн

17.2 млн

22 млн

Қорытынды

  • Соңғы 5 жыл ішінде тұрғын үй немесе үлестің болуы — мақұлдамауға себеп.
  • Отбасы банкте депозитің болуы — міндетті шарт.
  • Кем дегенде 2 млн теңге жеткілікті, бірақ іріктеуден өту үшін алдын ала жинаған тиімді.
  • Банк өтінімді қабылдар алдында несие тарихы мен табысты тексерген жөн.

Қызық болуы мүмкін:
Онлайн-брондау: Krisha.kz салықты өз мойнына алады
Зейнетақы жинағымен ипотека төлеу — Отбасы банк жаңа ережені түсіндірді
Отбасы банк ипотеканы мерзімінен бұрын жабуды уақытша тоқтатады