Биыл 31 қаңтардан бастап Отбасы банктегі ипотеканы төлеу үшін зейнетақы жинағын пайдалану ережесі өзгереді.

Енді біржолғы зейнетақы төлемін тек негізгі қарызды жабу үшін қолдануға болады, ал пайыз бен басқа төлемді қарыз алушы өз қаражатынан төлеуге тиіс. 

Өзгеріс Өнеркәсіп және құрылыс министрінің міндетін атқарушының бұйрығымен бекітілген және 31 қаңтардан бастап күшіне енеді.

Не өзгерді

Зейнетақы қаражатын пайдалану қағидаларында «берешек» термині «негізгі қарыз» деп ауысты.

Бұл мынаны білдіреді:

  • зейнетақы жинағымен ипотеканың пайызын төлеуге болмайды;
  • біржолғы зейнетақы төлемімен ай сайынғы төлемді жабуға болмайды;
  • біржолғы зейнетақы төлемін тек негізгі қарызды азайту үшін пайдалануға болады.

Қарыз алушы пайыз, өсімпұл, мерзімі өткен берешек, кейінге қалған төлем және депозит бойынша міндетті жарнаны өз қалтасынан төлейді.

Бұрын қалай еді

Бұрын зейнетақы жинағынан қалған артық қаражатты пайдаланып мерзімінен бұрын ішінара төлегенде ипотека бойынша ай сайынғы төлемді, оның ішінде пайызды толық жабуға болатын.

Егер біржолғы зейнетақы төлемінің сомасы ай сайынғы төлемнен көп болса, қалдық негізгі қарызды азайтуға жұмсалатын.

Енді қалай болады

Өтеу механизмі өзгереді және екі кезеңнен тұрады:

  1. Қарыз алушы алдымен пайыз бен басқа міндетті төлемді өзі төлейді.
  2. Кейін зейнетақы жинағы негізгі қарызды өтеуге кетеді.

Ол үшін Отбасы банктегі ағымдағы және арнайы шоттарда жеке қаражат болуы қажет.

Өтінім қабылдауды уақытша тоқтату

Сервисті жақсарту жұмыстарына байланысты Отбасы банк ипотеканы ішінара немесе толық өтеу үшін біржолғы зейнетақы төлемін пайдалануға өтінім қабылдауды уақытша тоқтатады.

  • enpf-otbasy.kz платформасы 30 қаңтардан 31 қаңтарға қараған түннен бастап 2026 жылғы 2 наурызға дейін жұмыс істемейді.
  • 2026 жылдың 30 қаңтарына дейін (қоса алғанда) берілген өтінімдер ескі ереже бойынша қаралады.
  • БЖЗҚ-дан зейнетақының артық сомасын сұрату рәсімі өзгермейді.
  • Тұрғын үй жағдайын жақсарту үшін зейнетақы жинағын пайдаланудың басқа мақсаттары бұрынғыдай қалады.

Іс жүзінде қалай жұмыс істейді

1-мысал. Тұрғын үй қарызы
Қарыз алушының артық сомасы — 100 000 тг.
Ипотека бойынша ай сайынғы төлем — 74 825 тг, оның ішінде:

  • пайыз — 6175 тг;
  • негізгі қарыз — 65 699 тг.

Бұрын
Бүкіл төлемді зейнетақы жинағы есебінен жабуға болатын.

Қазір

  • 6 175 тг пайызды қарыз алушы өзі төлейді;
  • негізгі қарыздың 65 699 теңгесін біржолғы зейнетақы төлемі есебінен өтейді;
  • зейнетақының қалған бөлігі (34 301 тг) қосымша негізгі қарызды азайтуға кетеді.

2-мысал. Алдын ала қарыз
Қарыз алушының артық сомасы — 200 000 теңге.
Ай сайынғы төлем — 75 000 тг, оның ішінде:

  • пайыз — 25 000 тг;
  • депозитке салынатын міндетті жарна — 50 000 тг.

Бұрын
Бүкіл төлемді (75 000 теңге) біржолғы зейнетақы төлемі есебінен жабуға болатын, қалған зейнетақы негізгі қарызды өтеуге кететін.

Қазір

  • пайыз бен депозитке салынатын жарнаны (75 000 теңге) қарыз алушының өзі төлейді;
  • зейнетақы жинағын (200 000 теңге) тек негізгі қарызды өтеуге бағыттауға болады.

Қысқаша
31 қаңтардан бастап зейнетақы жинағын тек негізгі қарызды өтеу үшін пайдалана аласыз.
Ипотека бойынша пайызды тек өз қалтаңыздан төлейсіз.
31 қаңтардан 2 наурызға дейін біржолғы зейнетақы төлемі есебінен ипотека өтеу бойынша өтінім қабылдау уақытша тоқтайды.