Пәтерін тәулігіне жалға беретіндер үшін тамаша жаңалық. «Онлайн-брондау» сервисіндегі жалға берушілерге ресми түрде жұмыс істеу енді жеңіл әрі тиімді бола түседі: ақпаннан бастап Krisha.kz өзін-өзі жұмыспен қамтығандар үшін салық пен міндетті төлемді өз мойнына алады.

Платформа бәрін өзі есептеп, табыстан салықты артық шығынсыз өзі төлейді.

Сізге тек сервиске қосылу керек. Қалғанын Krisha.kz жасайды.

Бұл қалай жұмыс істейтінін түсіндірейік.

Не өзгереді

Ақпанның басында Krisha.kz өзін-өзі жұмыспен қамтығандарға арналған арнайы салық режимі аясында «Онлайн-брондау» сервисін пайдаланатын жалға берушілер үшін салық агенті болады.

Сервис арқылы жасалған барлық брондау бойынша платформа:

  • жалға беруші үшін салық төлейді;
  • фискалдық чек жасайды;
  • салық органдарына есеп тапсырады.

Процесс барынша қарапайым әрі ресми болады.

Кім қосыла алады

«Онлайн-брондау» сервисі мына қалалардағы пәтерін тәулігіне жалға берушілерге қолжетімді:

  • Астана,
  • Алматы,
  • Қарағанды,
  • Балқаш.

Сервиске өзін-өзі жұмыспен қамтығандар режиміне сай келетіндер қосыла алады, олар:

  1. ЖК (жеке кәсіпкер) ретінде емес және жалдамалы қызметкерлерсіз жұмыс істейтіндер.
  2. Жалға беруден түсетін табысы айына 300 АЕК-тен (1 297 500 теңге) аспайтындар.
    Маңызды: клиент біздің платформа арқылы жалға алмаса да, жалпы табыс есепке алынады.

Krisha.kz қандай төлем жасайды

Бұл режимде салық жоқ, бірақ әлеуметтік төлемдер (табыстың 4 %-ы) бар:

  • 2% — зейнетақы аударымы;
  • 1% — медициналық сақтандыру;
  • 1% — әлеуметтік аударым.

Krisha.kz бұл төлемдерді жалға беруші үшін автоматты түрде есептеп, аударып отырады.

Қанша тұрады

«Онлайн-брондау» сервисіне қосылу тегін.

Брондау сәтті өткенде ғана төлем алынады, яғни нақты табыс түскенде. Сервис комиссиясы — жалға алу сомасының 15 %-ы.

Маңызды: 4 % әлеуметтік аударым осы комиссияның ішінде. Қосымша ештеңе төлеудің қажеті жоқ. Айдың аяғында сервис сәтті өткен брондау мен олардан түскен табыс есебін автоматты түрде жасап, салық органдарына жібереді.

Жалға беруші не істеуі керек

Қазірдің өзінде пәтеріңізді сервис арқылы жалға беріп жүрсеңіз, бар болғаны екі қадам жасау қажет:

1-қадам. Жеке басыңызды растау.
ЖСН, жеке куәлік деректерін жазып, құжат ұстап түскен суретті жүктейсіз. Сервис жалға берушінің орнына салық есебін дайындау үшін осылай қосымша мәлімет алады.

2-қадам. «Колёса» АҚ «Онлайн-брондау» сервисінде интернет-платформа операторы болатынына келісім беру керек. Ол үшін тек белгі қою жеткілікті.

Деректерді растау үшін сілтеме арқылы өтіңіз. Ол тек қосымшаның ішінде жұмыс істейді.

Жеке басыңызды растамасаңыз, хабарландыру Krisha.kz-тің жалпы тізімінде болады, сервиске кірмейді. Бұл жағдайда чекті және әлеуметтік төлемді өзіңіз жасайсыз.

Сервисті бұрын қолданбаған болсаңыз

«Онлайн-брондау» арқылы жұмыс істеуді бастау үшін:

  1. жеке басыңызды растаңыз;
  2. пәтерді видеотексерістен өткізіңіз;
  3. күнтізбені реттеңіз;
  4. төлем үшін карта қосыңыз.

Толық нұсқаулық біздің гидте: «Онлайн-брондау: пәтерді тәулігіне қалай жалға беруге болады».

Алдын ала өзін-өзі жұмыспен қамтыған ретінде тіркелу керек пе

Міндетті емес.
E-Salyq Business қосымшасы арқылы тіркеліп алып, содан кейін сервиске қосылуға болады.
Немесе бірден сервиске қосыла аласыз. Алғашқы чек автоматты түрде өзін-өзі жұмыспен қамтыған режимін іске қосады.

Арнайы шот қажет пе

Арнайы шот ашу міндетті емес. Бірақ мобильді аударымды бақылауға ілінбеу және табысты ыңғайлы есептеу үшін Мемлекеттік кірістер комитеті өзін-өзі жұмыспен қамтығандарға бөлек шот пайдалануды ұсынады.

Ресми жұмысы бар адам өзін-өзі жұмыспен қамтыған бола ала ма

Иә. Жалдамалы қызметкер өзін-өзі жұмыспен қамтыған ретінде тұрғын үй жалға бере алады, егер:

  • жалға беруден түсетін айлық табыс 300 АЕК-тен аспаса;
  • ЖК (жеке кәсіпкер) және қызметкерлері болмаса;
  • міндетті әлеуметтік төлемдер төленсе.

Әйелім ЖК ретінде тіркелген болса, мен өзін-өзі жұмыспен қамтыған бола аламын ба

Иә, бола аласыз. «Онлайн-брондау» сервисінде статус аккаунтта көрсетілген сіздің ЖСН арқылы анықталады. Сіздің ЖСН арқылы тіркелген ЖК немесе ЖШС болмаса, брондау қабылданып, аяқталған соң сіз автоматты түрде өзін-өзі жұмыспен қамтыған ретінде жұмыс істейсіз.

Пайдалы материалдар:
Онлайн-брондау: пәтерді тәулігіне қалай жалға беруге болады