Әлеуметтік желіде пәтерде техникалық паспорт болмайды деген хабар пайда болды. Бұл жалған ақпарат. 

Азаматтарға арналған үкімет бұл ақпаратты қауесет деді. Құжат жарамды болып қалады.

Дегенмен техникалық паспорттың форматы өзгерді. Пәтер иесі үшін бұл нені білдіретінін және құжатты қашан жаңарту қажет екенін түсіндіреміз.

Не өзгерді

Соңғы жылдары техникалық паспорттың форматы бірнеше рет жаңарды. Жауапты орған алдымен құжаттан меншік иесінің деректерін алып тастады, 2007 жылы пәтер ауданына балкон мен лоджияны қосты.

Соңғы өзгерістердің бірі — 2023 жылы техникалық паспорттың атауы кадастрлық паспорт деп өзгерді. Енді кадастрлық паспорт жаңа жылжымайтын мүлікке беріледі.

Бұрын мемлекет берген барлық техникалық паспорт (пәтер/жер үй) заңды күшін сақтайды және міндетті түрде ауыстырудың қажеті жоқ.

Атауы өзгерсе де, құжаттың мәні өзгермеді. Бұл — жылжымайтын мүлік құжаты, оның ішінде тұрғын үйдің барлық техникалық сипаттамасы жазылған:

  • мекенжай және тіркеу коды;
  • кадастрлық нөмір;
  • салынған жылы;
  • қабаты;
  • жалпы, тұрғын және пайдалы ауданы;
  • бөлме саны мен ауданы;
  • қабырға материалы.

Сонымен қатар мыналар бар:

  • схема — онда көтергіш қабырғалар, арақабырға, терезелер, есіктер, балкондар, лоджиялар жазылған;
  • кесте — барлық бөлме мен олардың деректері жазылған.

Техникалық паспорт не үшін қажет

Құжат кез келген мәміле кезінде қажет: сатып алу-сату, ипотека, сыйға тарту. Техпаспортсыз мәміле жасау мүмкін емес.

Маңызды: техникалық паспорттағы деректер шындыққа сәйкес болуы керек.

Техпаспортты қашан жаңарту қажет

Құжатты мына жағдайларда жаңарту қажет:

  1. Пәтердің жоспарын өзгерткенде;
  2. Қате немесе сәйкес келмейтін ақпарат болса;
  3. Объектілерді бөлгенде немесе біріктіргенде;
  4. Ипотека арқылы сатқанда банк жаңартуды талап етсе;
  5. Құжаттарды ретке келтіргіңіз келгенде.

Пәтер өзгермесе және мәміле жасамайтын болсаңыз, ештеңе істеудің қажеті жоқ.

Техпаспортты қалай ауыстыруға болады

  1. ХҚКО-да немесе eGov арқылы өтінім жіберіңіз, «Техникалық паспортты беру» қызметін таңдаңыз.
  2. Жылжымайтын мүлікті техникалық тексерістен өткізуге тапсырыс беріңіз. Бұл кезеңде маман шақыру үшін 4617 теңге төлеу керек. Екінші кезеңнің төлем ақысы объектінің ауданы мен күрделі болуына байланысты.
  3. Дайын құжатты ХҚКО-дан немесе eGov-тағы жеке кабинеттен алуға болады.

Қорытынды

  • Техпаспорт күшін жоймайды. Бұл туралы ақпарат — қауесет.
  • Бұрын мемлекет берген барлық техникалық паспорттың заңды күші бар. 
  • Басты ереже: құжаттағы деректер объектінің нақты жағдайымен бірдей болуы керек.
  • Паспортты тек пәтердің жоспарын өзгерткенде, қате немесе ипотека арқылы сатқанда жаңарту керек.

Пайдалы материалдар:
Тұрғын үй кезегі: тізімді қалай тексеруге болады
Қазақстанда тұрғын үйге сұраныс шамамен 50 % төмендеді
Пәтерде үлес, саяжай болса немесе тіркелген жеріңізді өзгерттіңіз: қандай жағдайда кезекте қаласыз
«Наурыз» ипотекасы: қалай дайындалу керек
Жеңілдікті ипотека: өтінім қабылдау қашан басталады