Алматы — елдегі студенттер көп жиналатын орталық. Қаладағы 35 жоғары оқу орнында 221 мың студент білім алады, оның 149 мыңы басқа өңірлерден келген. Оқу жылының басталуы қарсаңында олар үшін баспана мәселесі ерекше өзекті.

Қазір Алматыда жатақханаларда 5.7 мың орын жетпейді. Орын болмаған жағдайда қайда жүгіну керек және уақытша қай жерде тұруға болатынын түсіндіреміз.

Жатақханада орын жоқ

Алматыда 10 тамыздан бастап Қазақ ұлттық қыздар педагогикалық университетінде (QyzPU) Ситуациялық орталық жұмыс істейді. Мекенжайы: Бөгенбай батыр көшесі, 142.

Орталық тәулік бойы жұмыс істейді. Мамандар бос орындар бар-жоғын анықтауға, өтініш беруге көмектеседі және қажет болған жағдайда студентті басқа жатақханаға немесе хостелге жібереді.

Ситуациялық орталықтың телефондары:

Уақытша тұратын жер болмаса

22 тамызда 50 орыннан тұратын Дағдарыс орталығы ашылады. Мекенжайы: Мәуленов көшесі, 108А. Ол баспанасыз қалған студенттерге арналған.

Бұл орталыққа жүгіну үшін алдымен Ситуациялық орталыққа бару қажет. Бос орын болса студент Дағдарыс орталығына уақытша барады. Кейін мамандар тұрақты баспана табуға көмектеседі.

Студенттер қай жерлерге жайғасады

Жатақханаларға 25 тамыздан бастап орналасуға болады, ал оқу жылы 1 қыркүйекте басталады. Осы уақытқа дейін 61.2 мың орын дайындалады. Оның ішінде:

  • 136 студенттік жатақханада 46.2 мың орын;
  • хостелдер мен қонақүйлерде 11 мың орын;
  • тұрғын үйге айналған бос ғимараттарда 4 мыңға жуық орын.

Баспанаға нақты қанша студент мұқтаж болатыны әзірге белгісіз. Биыл мемлекет 30 094 білім беру грантын берді. Бұл былтырмен салыстырғанда 700 грантқа көп. Ақылы оқуға қабылдау 28 тамызға дейін жалғасады.

Билік баспанаға деген қажеттілікті студенттердің нақты саны белгілі болғаннан кейін есептей алады.

Орын бірінші кімге беріледі

ЖОО жатақханаларына орналасу кезінде мына категориядағыларға басымдық беріледі:

  • денсаулығына байланысты мүмкіндігі шектеулі студенттер;
  • жетім балалар;
  • ауыл мен елді мекендерден келген жастар;
  • көпбалалы және көмекке мұқтаж отбасылардан шыққан студенттер;
  • «Серпін» бағдарламасына қатысушылар;
  • қандастар.

Биыл қала билігі студенттердің баспанаға деген қажеттілігін толық қамтамасыз етуді жоспарлап отыр. 2026 жылдың аяғына дейін 4658 орынға арналған 13 жатақхананы іске қоспақшы.

Krisha.kz-те қолайлы баспананы жылдам табуға немесе тұрақты үй табылғанша пәтерді тәулік бойы жалдауға көмектесетін түрлі сервис бар.

Пайдалы материалдар:
Алматыда пәтерге тіркеуге отыру шектеледі
Ипотека немесе жалға алу: 2026 жылы қайсысы тиімді
Бір бөлмеліден екі бөлмеліге, екі бөлмеліден үш бөлмеліге: қанша ақша қосу керек
Қазақстанда 5%-дық ипотека басталды: кім рәсімдей алады
Тамызда екі ипотека іске қосылады: кім несие ала алады