Көбі Отбасы банкте алдымен депозит ашып, қажет соманың 50 %-ын жинау керек екенін естіген. Бірақ 10, 20 немесе 30 % ғана жинап қатысуға болатын ипотекалық бағдарлама бар екенін біле бермейді. Мұндай несиені кезекке тұрмай-ақ алуға болады.
10-30 % бастапқы жарнасы бар ең үздік 8 ипотекалық бағдарлама.

«Наурыз» ипотекасы

Бастапқы жарна:
— әрленген жаңа пәтер үшін 10 %;
— қара сылақпен берілетін жаңа пәтер және екінші нарықтағы баспана үшін 20 %.

Қатысу шарттары: барлығы қатыса алады, соңғы 6 айда ресми табыс болуы және соңғы 5 жылда жеке баспана болмауы маңызды. Отбасы банк депозитінде кемінде 2 млн теңге болуы қажет. Шотты өтінім берер алдында ашуға болады.

Бағдарлама шарттары:

  • Сыйақы мөлшерлемесі — 9 % (әлеуметтік осал топтарға — 7 %).
  • Несие сомасы — Астана, Алматы үшін 36 млн теңгеге дейін, басқа өңірлерде 30 млн теңгеге дейін.
  • Мерзімі — 19 жыл

«Наурыз» ипотекасы бойынша өтінім биыл 5 наурыздан бастап Отбасы банктің Baspana Market бөлімінде қабылданады. Өтінім қабылдау 31 наурызға дейін жалғасады.

«Наурыз жұмыскер» ипотекасы

Бастапқы жарна:
— әрленген жаңа пәтер үшін 10 %;
— қара сылақпен берілетін жаңа пәтер және екінші нарықтағы баспана үшін 20 %.

Қатысу шарттары: ипотека тек мына салаларда жұмыс істейтін мамандарға қолжетімді:

  • өнеркәсіп
  • энергетика
  • көлік
  • ауыл шаруашылығы
  • су ресурстары.

«Наурыз жұмыскер» биыл жоғарыда аталған «Наурыз» бағдарламасы аясында іске қосылады. Несие беру шарттары (мөлшерлеме, мерзім, бастапқы жарна және ең жоғары несие сомасы) бірдей. Бірақ «Наурыз жұмыскер» тек жұмысшы мамандарға арналған.

«Наурыз жұмыскер» бағдарламасы бойынша өтінім қабылдау 17 наурызда басталады. Отбасы банктің кез келген бөлімшесінде өтінім беруге болады.

«Асыл Мекен» ипотекасы

Бастапқы жарна: 10 %-дан басталады.

Қатысу шарттары: тек ауылдан пәтер, жер үй алуға немесе үй салуға арналған жер телімін сатып алуға мүмкіндік бар. Соңғы 6 айда зейнетақы қорына аударымы бар ресми табыс болуы және соңғы 5 жыл ішінде атында жылжымайтын мүлік болмауы қажет.

«Асыл Мекен» бағдарламасының шарттары:

  • Мөлшерлеме — 3.5-5 %.
  • Ең жоғары сома — 10 млн теңге.
  • Мерзімі — 19 жыл.

«Ұмай» ипотекасы

Бастапқы жарна: 20 %-дан басталады.

Қатысу шарттары: тек әйелдерге (отбасылық жағдайына қарамастан) беріледі. Ресми табысы 950 000 теңгеден аспауы керек.
Атында жылжымайтын мүлік бар-жоғы маңызды емес. Екінші, үшінші және одан да көп пәтер сатып алуға болады.

«Ұмай» бағдарламасының шарттары:

  • Мөлшерлеме әзірге белгісіз (бағдарлама іске қосылар алдында жарияланады).
  • Ең жоғары сома — 50 млн теңге.
  • Бірінші нарықтағы (дайын немесе салынып жатқан тұрғын үй кешеніндегі, ҚТК кепілдігі болған жағдайда) және екінші нарықтағы пәтер немесе жер үй сатып алуға болады.

Банк «Ұмай» бағдарламасы бойынша 2025 жылдың екінші жартысында несие бере бастайды.

«Өз үйім» ипотекасы

Бастапқы жарна: 20 %-дан басталады.

Қатысу шарттары: Тек жаңа құрылыстағы пәтерге ипотека рәсімдеуге болады, екінші нарықтағы пәтер жарамайды. Пәтерді тек Отбасы банктің ресми сайтында (otbasybank. kz) жарияланған тұрғын үй кешендерінен таңдайсыз.

«Өз үйім» бағдарламасының шарттары:

  • Мөлшерлеме — 7–6 %, кейін 5–3.5 %-ға дейін төмендейді.
  • Ең жоғары сома — 100 млн тг.
  • Жеке меншіктегі үй санына шектеу жоқ.

«Отау» ипотекасы

Бастапқы жарна:
— әрленген жаңа пәтер үшін 10 %;
— қара сылақпен берілетін жаңа пәтер және екінші нарықтағы баспана үшін 20 %.

Қатысу шарттары:
— соңғы 5 жыл ішінде қатысушының немесе оның отбасы мүшелерінің жеке меншігінде тұрғын үй болмауы керек;
— соңғы 6 айда ресми табыс болуы қажет.
Қатысу үшін Отбасы банкте кемінде 1 млн теңге көлемінде депозит болуы міндетті.

«Отау» бағдарламасының шарттары:

  • Сыйақы мөлшерлемесі — 9 % (7 % — әлеуметтік осал топтарға).
  • Қарыз сомасы — Астана, Алматы үшін 36 млн теңгеге дейін, басқа өңірлер үшін 30 млн теңгеге дейін.
  • Мерзімі — 19 жыл.

«Отау» ипотекасының несие беру шарттары «Наурыз» бағдарламасымен бірдей. Айырмашылығы: «Отау» — Отбасы банктің жеке бағдарламасы, «Наурыз» — мемлекеттік бағдарлама.
Қазір өтінім қабылданбайды. Бағдарлама іске қосылғанда хабарлаймыз. Ол жылына бір рет өтеді.

«30/70» ипотекасы

Бастапқы жарна: 30 %-дан басталады.

Қатысу шарттары: пәтерді тек банкпен келісімшарт жасаған құрылыс компанияларының тұрғын үй кешендерінен таңдауға болады.

«30/70» бағдарламасының шарттары:

  • Мөлшерлеме — 7 %, кейін 4 %-ға дейін төмендейді.
  • Несие сомасы — 100 млн теңге.
  • Мерзімі — 25 жыл.

«Жасыл ипотека»

Бастапқы жарна: 20 %-дан басталады.

Қатысу шарттары: қарыз тек жасыл стандартқа сәйкес келетін тұрғын үй кешендерінен пәтер алу үшін беріледі. Яғни, объект «ӨМІР» ұлттық стандартына, ресейлік ГОСТ Р немесе халықаралық BREAM, LEED стандарттарына сай келетін сертификат алуға тиіс:

«Жасыл ипотека» бағдарламасының шарттары:

  • Мөлшерлеме — 12.5 %, кейін 3.5 %-ға дейін төмендейді.
  • Несие сомасы — 50 млн теңге.
  • Мерзімі — 25 жыл.