Шатырдан су ағу — көпқабатты үйде жиі кездесетін проблема. Көктемде қар ерігенде бұл проблема күшейеді. Жөндеу жұмыстары арзан емес, сондықтан тұрғындар қайдан ақша табарын білмей, оны кейінге қалдырады. Бірақ уақыт өткен сайын мәселенің салдары ауырлай береді.

Шатырдан су ағып жатса не істеу керегін және оны жөндеуге ақшаны қайдан табуға болатынын түсіндіреміз.

Шатырды кім жөндеуі керек

Шатыр — кіреберіс, жертөле немесе лифт сияқты үйдің ортақ мүлкі. Оған үйдегі меншік иелері (қай қабатта тұратынына қарамастан) жауапты.

Тұрғындар ай сайын жиналатын және жиналған қаражатты жөндеу жұмыстарына және күтіп-ұстауға жұмсауға тиіс.

ПИК, МИБ не істеуі керек

Пәтер иелерінің кооперативі, мүлік иелерінің бірлестігі және басқарушы ұйымдар үйдің жағдайын бақылап, ақауды анықтап, тұрғындардың қаражаты есебінен оны жөндеуге тиіс.

Сонымен қатар олар мердігерлерді табуға, олардың жұмысын бақылауға және меншік иелеріне есеп беруге міндетті.

Көршілер төлеуден бас тартса

Бұл — жиі кездесетін жағдай. Төменгі қабаттағы тұрғындар шатыр мәселесіне олардың қатысы жоқ деп ойлайды. Бірақ су оларға да жетуі мүмкін.

Әкімшілік шаралар бар. Көршілер екі айдан астам жарна төлемесе, басқарушы ұйым нотариус пен сот орындаушылары арқылы ақшаны өндіріп ала алады.

Шатырдан су ағып жатыр: не істеу керек

  1. ПИК өкілі мен куәгерлердің (18 жастан асқан кез келген адам) қатысуымен проблеманы жазып алыңыз:
    — су ағып жатқан жерді және келген залалды суретке, видеоға түсіріңіз;
    — су басу туралы акт жасаңыз.
  2. ПИК/МИБ-ке екі өтініш жазыңыз, фото, видео қосыңыз, басқарушы ұйым кеңсесінде өтінішті тіркеп, мөр бастырыңыз.

Су аз ағып жатса, олар жөндеу жұмысын ай сайын жиналатын қаражат есебінен жасауы мүмкін.

Проблема күрделі болса, қосымша қаражат қажет болады. Оны қайдан алуға болатынын төменде түсіндіреміз.

Басқарушы ұйым мүлде әрекет етпесе, тұрғын үй инспекциясына шағым жазыңыз.

Шатырды жөндеуге ақшаны қайдан табуға болады

Үш негізгі жол бар. Таңдау мәселенің жеделдігіне және ауқымына байланысты болады.

1. Көршілермен бірге ақша жинау.

Ең жылдам тәсіл. Шағын әрі шұғыл жұмыстарға қолайлы.
Қалай жүзеге асады:

  • жиналыс өткізіңіз;
  • жөндеу және қажет сома туралы шешім қабылдаңыз;
  • 51% дауыс жинаңыз;
  • мердігер тауып, келісімшарт жасаңыз;
  • ақша жинап, жөндеу жұмыстарын жүргізіңіз.

Артықшылығы: мәселені тез шешуге болады.
Кемшілігі: бәрінде ақша болмауы мүмкін. Бірақ оны бөліп төлеу арқылы шешуге болады (бірнеше айға бөлу).

2. Жиналған қаражатты пайдалану.

Әр үйде жинақ шоты болуы керек. Тұрғындар ай сайын ақша аударып отырады, кейін оны ірі жөндеу жұмыстарына пайдаланады. Шатыр жөндеу де осыған жатады.

Қаражатты қалай пайдалану керек:

  • жиналыс өткізу;
  • шатырды жөндеу туралы шешім қабылдау;
  • 51% дауыс жинау;
  • мердігермен келісімшарт жасап, жұмыс ақысын төлеу.

Артықшылығы: бірден үлкен сома іздеудің қажеті жоқ, қаражат біртіндеп жиналады.
Кемшілігі: шұғыл жөндеу қажет болса, қаражат жиналғанша ұзақ күтуге (кейде жылдар бойы) тура келеді.

3. Модернизация бағдарламасына қатысу.

Қазір және жинақ шотында ақша болмаса, мемлекет көмегіне жүгінуге болады.

Қазақстанда 2011 жылдан бері модернизация бағдарламасы жұмыс істейді. Оның мәні: үйді мемлекет жөндейді, ал тұрғындар кейін ақшаны бөліп (7–15 жыл ішінде) қайтарады.

Бұл тек шатырды жөндеу емес, толық жаңарту. Шатырды жөндеп қана қоймай, қасбетті, кіреберісті, инженерлік желілерді ретке келтіріп, лифтіні ауыстыруға болады.

Толық жөндеу кезінде шатыр ауысады: жұмысшылар ескі жабынды алып, жаңасын төсейді, желдету жүйесін қалпына келтіреді.

Қалай жүзеге асады:

  • жиналыс өткізу;
  • шатыр ауыстыру туралы шешім қабылдау;
  • 51% дауыс жинау;
  • ПИК/МИБ және басқарушы ұйым арқылы бағдарлама операторына өтінім беру;
  • мамандар үйдің жағдайын бағалап, бірнеше жолын ұсынады;
  • келесі жиналыста мыналарды бекіту керек:
    — бөліп төлеу сомасы мен мерзімі;
    — мердігер;
    — жөндеу материалдары.

Модернизацияның артықшылықтары:
толық жөндеу жұмыстары;
ақша жинаудың қажеті жоқ;
ай сайынғы төлем әдетте аз (шамамен 2000 тг).

Кемшіліктері:
төлем мерзімі ұзақ;
қаражаттың бір бөлігі жоба мен сметаға жұмсалады (20—30%-ға дейін);
жұмыстың мерзімі бюджетке байланысты, сондықтан өтінімді жыл басында берген дұрыс.

Маңызды
Қай тәсілді таңдасаңыз да, жөндеу процесін бақылаусыз қалдыруға болмайды.
Мердігерлерді басқарушы ұйыммен бірге тексеріңіз, жұмыстың барысын бақылаңыз, келісімшартты мұқият оқыңыз. Әйтпесе ақша жұмсап, мәселе сол күйі қалуы мүмкін.

Шатыр — елемеуге болмайтын мәселе. Бүгін жоғары қабаттағыларға су кірсе, ертең сізге жетеді. Тұрғындар неғұрлым ертерек келісіп, жөндеу жұмыстарын бастаса, соғұрлым арзан әрі оңай болады. Ұзаққа созу әрқашан қымбатқа түседі.

Пайдалы материалдар:
Биыл мемлекет беретін пәтерді қалай алуға болады
Қазақстандағы ипотека: табыс қанша болуы керек