Қазақстанда тұрғын үй кезегі бар. Ол жеңілдікті шарттармен пәтер жалға алуға немесе төмен мөлшерлемемен ипотека арқылы рәсімдеуге мүмкіндік береді.

2026 жылы кезек қалай жұмыс істейтінін, не өзгергенін және кезек тоқтап қалмас үшін не істеу керегін түсіндіреміз.

Тұрғын үй кезегі деген не

Бұл — баспанаға мұқтаж адамдардың ресми есебі. Ол қолжетімді шарттармен тұрғын үй алуға мүмкіндік береді.
2025 жылдың мамырынан бастап кезекті Отбасы банк жүргізеді. Қазір кезекте 951 мың адам тұр, оның 600 мыңы әлеуметтік осал топқа кіреді.

Кезекке кім тұра алады

Төмендегі үш шартқа сәйкес келсе, кез келген адам тұра алады:

1. ҚР азаматы немесе қандас.
2. Соңғы 5 жылда жеке тұрғын үйі болмауға тиіс (бұл талап жұбайына және 18 жасқа толмаған балаларына да қатысты) немесе жалғыз тұрғын үйі апатты деп танылған болуы керек.
3. Тұрақты тіркелген болуы қажет. Астана, Алматы, Шымкент қалаларында кемінде 3 жыл, басқа қалаларда мерзімі маңызды емес.

Маңызды! Тек тұрақты тіркелген жеріңіз бойынша кезекке тұра аласыз. Болашақта пәтер сол өңірден беріледі.

Кезек не береді

Кезек мынадай мүмкіндіктер береді:

• Жалға алу үшін субсидия рәсімдеу, яғни ай сайынғы төлемнің 50 %-ын мемлекет төлейді.
• Мемлекеттен жалға берілетін пәтер алу — мерзімсіз немесе кейін сатып алу құқығымен.
• 2-9 % мөлшерлемесі бар жеңілдікті ипотека алу.

Көмек түрі кезекте тұрған адамның категориясына (әлеуметтік осал топқа жата ма, жоқ па) және табыс деңгейіне байланысты. Мемлекет табысы төмен адамдарға субсидия немесе пәтер жалға береді, ал табысы жоғары адамдарға жеңілдікті ипотека ұсынады.

Көмек түрі	Кім алады	Бір адамның табысы, тг*	Не береді
Жалға алу субсидиясы	әлеуметтік осал топтағы 4 категория	50.8 мыңға дейін	Мемлекет жалға алу құнының 50 %-ын төлейді
Пәтер жалға алу	Барлық әлеуметтік осал топ	102 мың/ 178 мыңға дейін	Әкімдіктен пәтер жалға алу
2% ипотека	әлеуметтік осал топтағы 6 категория	254 мың ға дейін	Әкімдіктен пәтер сатып алу
5% ипотека	Барлық әлеуметтік осал топ	305 мыңға дейін	Әкімдіктен пәтер сатып алу
7–9% ипотека	Кезекте тұрғандар және Отбасы банктің салымшылары	254 мыңнан бастап	Бірінші және екінші нарықтағы тұрғын үй

* 2026 жылғы күнкөріс минимумы (50 851 теңге) бойынша есептеледі

Әр көмек түрі қалай жұмыс істейді

Жалға алуға субсидия

Мемлекет жалға алу құнының 50%-ын төлейді, қалғанын қатысушы төлейді. Мысалы, жалға алу ақысы 200 000 тг болса, мемлекет 100 000 тг береді.
Әлеуметтік осал топтың төрт категориясына кіретін адам ғана қатыса алады:

• көпбалалы отбасы;
• жетім балалар;
• I немесе II топтағы мүгедектер;
• мүгедек баласы бар отбасы.

Отбасы мүшесіне шаққандағы 6 айдағы орташа табыс бір күнкөріс минимумынан (50 851 тг) аспауы керек. Мысалы, үш адамнан тұратын отбасының табысы ай сайын 152 553 теңгеден аспауға тиіс.

2026 жылғы күнкөріс минимумы — 50 851 теңге.

Қатысушы тұрғын үйді өзі іздейді (мысалы Krisha.kz сайтынан). Қатысушы, Отбасы банк, меншік иесі арасында үш жақты келісімшарт жасалады.

Тұрғын үйді туыстардан немесе бұрынғы жұбайдан жалға алуға болмайды. Жалға алу ақысы мен пәтердің ауданы бойынша шектеу бар, артық төлемді қатысушы өзі төлейді.

Субсидияға өтінімді кез келген уақытта otbasybank.kz арқылы беруге болады. Қазақстанда жыл сайын 10 000–11 000 адам субсидия алады.

Пәтер жалға алу

Пәтерлер өмір бойы жалға беріледі. Жалға алу келісімшарты 5 жыл сайын ұзарады. Пәтер мұраға беріледі.

Жалға алу ақысы өңірге байланысты өзгереді. Көбіне айына 15 000–20 000 тг болады, коммуналдық қызметтер бөлек төленеді.

6 айдағы орташа табыс мынадан аспауы керек:

• 2 күнкөріс минимумы, 101 702 тг, үш және одан көп адамнан тұратын отбасы;
• 3.5 күнкөріс минимумы, 177 978 тг, бір-екі адамнан тұратын отбасы.

Әкімдік тұрғын үй салып береді немесе құрылысшылардан сатып алады, деректерді Отбасы банкке береді. Кейбір пәтерді әкімдіктің шешіміне қарай жеңілдікті шартпен сатып алуға болады.

Үлестіру өңірдегі тұрғын үйдің бар-жоғына байланысты. Кезекте тұрған адамға Отбасы банк SMS арқылы хабарлайды. Ол бірнеше жыл күтуі мүмкін.

2% ипотека

Әлеуметтік осал топтың төрт категориясына кіретін адам ғана ала алады:

• Ұлы Отан соғысы және онымен теңестірілген ардагерлер, соғыс ардагерлері;
• мүгедектер;
• жетім балалар;
• көпбалалы отбасы;
• мүгедек баласы бар отбасы;
• жесір әйел/тұл ер адам.

Бір адамның орташа табысы 5 күнкөріс минимумынан (254 550 тг) аспауы қажет.

Отбасы банкте депозит ашып, бастапқы жарнаны (10 %) жинау қажет.

5% ипотека

Әлеуметтік осал топқа кіретін кезектегілердің бәрі рәсімдей алады.

Бір адамның орташа табысы 6 күнкөріс минимумынан (305 106 тг) аспауы қажет.

Отбасы банкте депозит ашып, бастапқы жарнаны (10 %) жинау керек.

Екі ипотекада өтінім қабылдау процесін Отбасы банк сайтында өзіңіз қадағалауыңыз керек. Бұл мүліктің бар-жоғына байланысты. Бірнеше жыл күтуіңіз мүмкін. Ипотека тек әлеуметтік осал топқа кіретін кезектегілерге арналған.

7–9% ипотека

Кезекте тұрғандар ғана емес, барлық Отбасы банк салымшысы қатыса алады. Бір адамның орташа табысы — 5 күнкөріс минимумы, 254 550 тг.

Әлеуметтік осал топтағыларға мөлшерлеме — 7%, қалғандарға — 9%. Астана мен Алматыда қарыз сомасы — 36 млн тг, Басқа қалалар — 30 млн тг дейін.

Өтінім беру үшін депозитте кемінде 2 млн тг жиналуы қажет. Бұл сома бастапқы жарнаға кетеді: дайын пәтер — 10%, қара сылақпен әрленген — 20%.

Ұпай бойынша іріктеу конкурсы бар. Жиналған қаржы, отбасы жағдайы, бала саны, жасқа (35 дейін), әлеуметтік статус үшін ұпай беріледі.

Өтінім қабылдау жыл сайын наурызда басталады. Биыл «Наурыз» ипотекасы 10 наурызда басталады

2026 жылы 2 мен 5 % және 7–9 % жеңілдікті ипотека бойынша 12.2 мың несие беріледі.

Облыс орталықтары: Ақтау, Ақтөбе, Атырау, Қарағанды, Көкшетау, Қостанай, Қызылорда, Қонаев, Павлодар, Петропавл, Семей, Жезқазған, Талдықорған, Тараз, Түркістан, Орал, Өскемен.

Кезекке қалай тұруға болады

1. orken.otbasybank.kz сайтына кіріп, ЭЦҚ арқылы авторланыңыз.
2. Шешімін күтіңіз. Қызмет көрсету мерзімі — бір жұмыс күні. Тұрғын үйдің апатты екенін растайтын акт сияқты ұжат қоссаңыз 3 күнге созылады.
3. SMS арқылы растаңыз. Сізге және отбасы мүшелеріңізге хабарлама келеді. Деректерді өңдеуге келісім беру үшін «иә» деп жауап беру қажет. Онсыз өтінім қабылданбайды.

Кез келген уақытта өтінім беруге болады, бірақ мамандар тек жұмыс күндері қарайды.

Неліктен кезек тоқтап қалады

Қатысушы түгендеуден өтпесе кезек тоқтайды немесе актив емес статус алады. Түгендеу деректерді жинау, қатысушы мен отбасы туралы ақпаратты жаңарту үшін қажет.

Түгендеуден өтпесеңіз, Отбасы банк SMS арқылы тұрғын үй үлестіру туралы хабарламайды. Тұрғын үй кезегі: тізімді қалай тексеруге болады

Атқарушы орган тұрғын үйді қалай үлестіреді

Субсидия үшін кезекте тұрғандар өтінім жібереді.
Тұрғын үйді жалға және несиеге алынатындар Отбасы банктің SMS хабарламасын күтеді. Үлестіруге кезекке тұрған күн әсер етеді.

​​Сонымен қатар маңызды категориялар бар, оларға жылдық көлемнің 70 %-ы беріледі. Мысалы, 100 пәтердің 70-ін маңызды категориядағы адамдар, қалған 30-ын кезекте тұрғандар алады.

Пайдалы материалдар:
Кезекте тұрғандарға арналған пәтер: Отбасы банк талаптарды қатаңдатады
2 және 5 %-дық жеңілдікті ипотека: пәтер берілетін өңірлер