Бастапқы жарна бар, банк ипотеканы мақұлдады, пәтер алуға бір-ақ қадам қалды. Бірақ алғашқы жарнадан бөлек, қарыз алушы біраз шығындалады. Ипотеканы рәсімдемес бұрын артық қанша ақша қажет болатынын түсіндіреміз.

Пәтер бағалау

Екінші нарықтан пәтер сатып алсаңыз банк жылжымайтын мүліктің тәуелсіз бағалауын талап етеді. Бұл пәтердің нарықтағы құнын анықтау және оның кепіл мүлкі ретінде жарамды екеніне көз жеткізу үшін қажет.

Бағалау құны объект түрі мен ауданына байланысты.

Орташа есеппен:

  • 50 шаршы метрден аспайтын пәтер — 40 мың теңге;
  • 100 шаршы метрден аспайтын жер үй — 50 мың теңге.

Мәміле рәсімдеу

Ипотека алушылар сатып алу-сату келісімшартын жеңілдікті тарифпен (4 АЕК — 17 300 теңге) рәсімдейді. Әдеттегі тариф — 12 АЕК (51 900 теңге).

Несие келісімшартынан бөлек жылжымайтын мүлікті кепілге қою туралы келісімшарт рәсімделеді. Оны нотариус куәландырады, бұл үшін тағы 4 АЕК (17 300 теңге) төлеу қажет.

Банк кепілгер талап етсе, қосымша кепілгерлік келісімшарты рәсімделеді — 1.5 АЕК (6 487 теңге).

Меншік құқығын тіркеу ақысы:

  • 1 304 теңге — қарапайым тіркеу;
  • 5 000 теңге — жылдам тіркеу.

Жылдам тіркеуге 2 сағат кетеді, ал қарапайым тәртіпте 3 жұмыс күні кетеді.

Сақтандыру

Ипотека рәсімдеу үшін кепілге қойылатын мүлікті — сатып алып жатқан пәтерді сақтандыру қажет. Бұл есие толық өтелгенге дейін кепіл болады.

Банк кепілге алған пәтер немесе үй міндетті түрде сақтандырылады.
Қарыз алушының өмірі мен денсаулығын қалауыңыз бойынша сақтандырасыз.

Сақтандыру мүлікті негізгі қауіптерден қорғайды:

  • өрт;
  • су басу;
  • табиғи апат;
  • келісімшарттағы басқа зақымдар.

Сақтандыру полисінің құны әдетте тұрғын үй бағасының 0.3–1 %-ын құрайды. Орташа есеппен — 0.7 %.
Мысалы, 30 млн теңге тұратын пәтер үшін 200 мың теңге төлейсіз.

Ипотека бойынша алғашқы төлем

Пәтер сатып алғаннан кейін шығындар басталады.
Жиһаз, тұрмыстық техника сатып алуға, көшіп-қонуға немесе ең болмағанда шағын жөндеу жұмыстарына ақша қажет болады. Сондықтан мамандар ипотека бойынша кемінде бір айлық, мүмкін болса екі-үш айлық төлемге жететіндей қаражатты қалдырып қоюды ұсынады.

Күтпеген шығындар туындаса немесе жалақы кешіксе мұндай ақша алғашқы айларды алаңсыз өткізуге көмектеседі.

Қанша ақша дайындап қою керек

Алғашқы жарнадан бөлек, ипотеканы рәсімдеуге алдын ала кемінде 280–300 мың теңге дайындаған жөн. Бұл ақша пәтер бағалау, сақтандыру, нотариус қызметі және мәмілені тіркеу сияқты міндетті шығындарға қажет болады. Бұған ипотека бойынша алғашқы айлық төлем кірмейді.

Пәтер таңдауға риелтор көмектессе, оның қызметіне тағы 500 мың теңге дайындап қойған жөн.
Үйді сатып алғаннан кейін көшуге, шағын жөндеу жұмыстарына, жиһаз бен тұрмыстық техника алуға ақша кететінін ескерген дұрыс.