Қазақстандағы кейбір отбасының коммуналдық қызмет пен тұрғын үй жалға алу үшін төлемі аз болады. Тұрғын үйге кететін шығын отбасының табысына шаққанда тым жоғары болса, оның бір бөлігін мемлекет өтейді.

Тұрғын үй көмегін кім ала алатынын және енді оның мөлшері қалай есептелетінін түсіндіреміз.

Тұрғын үй көмегі деген не?

Тұрғын үй көмегі — табысы төмен отбасыларға мынадай шығындардың бір бөлігін өтеуге арналған мемлекеттік төлем:

  • коммуналдық қызмет;
  • тұрғын үйді күтіп-ұстау;
  • күрделі жөндеу жұмыстарына арналған жарна;
  • әкімдік ұсынған тұрғын үйдің жалға алу ақысы.

Кім көмек ала алады

Отбасының тұрғын үй мен коммуналдық қызметке жұмсайтын шығыны шектен асып кетсе, тұрғын үй көмегін алады. Бұл шекті жергілікті мәслихат белгілейді.
Биыл 10 шілдеден бастап шек отбасы табысының 5—10%-ы аралығында болуға тиіс. Бұған дейін мұндай бірыңғай аралық болған жоқ.

Мемлекет коммуналдық қызметтің ақысын толық өтемейді. Тек белгіленген шектен асатын шығынды өтейді.

Тұрғын үй көмегі қалай есептеледі

Есеп мынадай: отбасы тұрғын үйге жұмсалатын шығынның белгіленген бөлігін — табысының 5—10%-ын өзі төлейді. Осы мөлшерден асатын шығынды мемлекет өтейді. Бұл — тұрғын үй көмегі.

Мысалы, Отбасының ай сайынғы табысы — 300 мың теңге.
Өңірде шек 10% болса, отбасы 30 мың теңгені (табыстың 10%-ы) өзі төлейді.
Коммуналдық қызмет пен тұрғын үйге қатысты басқа шығын 45 мың теңге болса, оның 30 мың теңгесін отбасы өзі төлейді, ал қалған 15 мың теңгені мемлекет өтейді.

Басқа мысал.
Жалғыз тұратын зейнеткер айына 100 мың теңге зейнетақы алады. Оның өңірінде шек 5 %.
Ол өзі 5 мың теңге (зейнетақының 5%-ы) төлейді.
Коммуналдық қызметтің құны 20 мың теңге болса, зейнеткер 5 мың теңгені өзі төлейді, ал 15 мың теңгені тұрғын үй көмегі ретінде алады.

Маңызды: бұл — қарапайым мысал. Іс жүзінде тұрғын үй көмегінің мөлшері әр өтініш беруші үшін жеке есептеледі. Отбасының табысы, бірге тұратын адамдар саны, тұрғын үйдің ауданы, коммуналдық қызмет тарифі және басқа факторлар ескеріледі.

Тағы бір міндетті шарт бар. Отбасы өзіне тиесілі немесе мемлекет жалға берген не әкімдік ұсынған жалғыз тұрғын үйде тұруға тиіс.

Тұрғын үй көмегін қалай рәсімдеуге болады

Өтінім жіберуге болады:

  • ХҚКО арқылы;
  • eGov порталында.

Тұрғын үй көмегіне тоқсанына бір рет, яғни әр үш ай сайын қайта өтініш беру қажет. Төлем өтініште көрсетілген банк шотына аударылады.

Krisha.kz материалынан дәйексөз келтіру үшін редакциядан рұқсат алу қажет. Krisha.kz материалын пайдаланғанда бірінші абзацта міндетті түрде сілтеме болуы керек!