Отбасы банктегі депозиттің ерекшеліктері, ол қандай пайда береді және неге мемлекеттік бағдарламаға қатысушылардың осы банкте ақшасы болуы керек екенін анықтаймыз.

Отбасы банктегі депозит: ерекшеліктері

Отбасы — коммерциялық банк емес, ол тұрғын үй құрылыс жинақ жүйесімен жұмыс істейтін мемлекеттік банк. Несие алу үшін міндетті түрде депозит ашу керек.

Стандарт тұрғын үй депозитінің мөлшерлемесі коммерциялық банктерге қарағанда төмен.

Депозит бойынша сыйақы мөлшерлемесі:
— екінші деңгейдегі банктердегі депозит (теңге) — жылына орта есеппен 15 %;
— Отбасы банктегі депозит — жылына 2-5.5 % («Табысты» депозиті).
Пайда аз болғанына қарамастан, Отбасы банктегі салым бірнеше маңызды артықшылық береді.

Мемлекет сыйақысы

Тек Отбасы банктің салымшылары мемлекеттен жыл сайын сыйақы алады.

Жылына бір рет банк және мемлекет сыйақы береді.

Мемлекеттік сыйақы мөлшері — 20 %, бірақ ол 200 АЕК-тен аспайтын және бір жылда жиналған сомаға беріледі. Сыйақы ақпан-наурыз айларында түседі.

2026 жылдың көктемінде ең жоғары мемлекеттік сыйақы алу үшін биыл депозитке кемінде 786 400 теңге салу қажет.

Биыл мемлекеттік сыйақы 157 280 теңге болады. Пайда көп болу үшін депозитті жыл сайын кем дегенде 200 АЕК-ке толықтырып отыру керек.

Мемлекеттік сыйақы банктің төмен пайыздық мөлшерлемесінің орнын толтырады. Мысалы, 787 мың теңгені (200 АЕК) 15 % мөлшерлемемен басқа банкке салсаңыз, жыл аяғында пайда аз болады.

Кеңес: Отбасы банкте бүкіл отбасы мүшелеріне (арнайы отбасылық пакеттер бар) депозит ашуға болады. Әрқайсысына жылына 200 АЕК салып отырсаңыз, барлық депозитке максимал мемлекеттік сыйақы түседі. Несие рәсімдемес бұрын барлық салымды біріктіру керек.

Минимал мөлшерлемесі бар ипотека

Отбасы банктегі мөлшерлеме екінші деңгейдегі банктерден әлдеқайда төмен:
— басқа банктердегі орташа көрсеткіш — 18 %,
— Отбасы банкте 3.5 %-дан басталады.

Төмен мөлшерлеме несиені қысқа мерзімге ресімдеуге мүмкіндік береді, артық төлем де айтарлықтай аз болады.

Маңызды шарт: Отбасы банк арқылы үй алу үшін депозитте пәтер құнының 50 %-ын жинау қажет.

Пәтер құны 25 млн теңге болса, Отбасы банктегі және екінші деңгейдегі банктің ипотекасын салыстырамыз.

Ипотека шарттары

Отбасы банктің 50/50 ипотекасы 

Екінші деңгейлі банктердің ипотекасы

Бастапқы жарна

50 %

20 %

Мерзімі

9 жыл

20 жыл

Мөлшерлеме (ЖТСМ)

4–7.5 %

19 %

Төлем

Алғашқы 3 жыл – 185 000 тг,
6 жыл – 178 000 тг

324 000 тг

Артық төлем

6.6 млн тг

58 млн тг

Мемлекеттік бағдарламаларға қатысу

Отбасы банкте депозит болған жағдайда жеңілдікті ипотека рәсімдеуге болады.
Отбасы банк — тұрғын үйге қатысты мемлекеттік бағдарламалардың операторы, кейбір бағдарламаға қатысу үшін депозит болуы шарт.

Мысалы, мына ипотекалар:
— «Наурыз».
— «Наурыз жұмыскер».
— «Отау».

Қатысуға өтінім беру үшін депозитте кем дегенде 2 млн теңге болуға тиіс. Депозит мерзімі маңызды емес.

Осы бағдарламаларға келер жылы қатысу мүмкіндігін арттыру үшін қазірден бастап дайындалған жөн.

Зейнетақы жинағын пайдалану

Зейнетақы қорында артық сома көп болса, Отбасы банктегі депозит — бастапқы жарнаны жинауға жақсы мүмкіндік.

Былтыр жинау мерзімі 3-тен 6 жылға ұзарды. Яғни, зейнетақы қаражаты депозитке түскен күннен бастап Отбасы банкте несие рәсімдегенге дейін 6 жылдан ұзақ уақыт өтпеуі керек. Осы уақыт ішінде пәтер немесе үй құнының кем дегенде 50 %-ын жинайсыз.

Депозитті жұбайыңызға немесе жақын туысыңызға бере аласыз.

Krisha.kz бұған дейін Отбасы банкте тез ақша жинау жолдары туралы жазды

Отбасы банктегі депозиттің артықшылықтары

  • Мемлекеттік сыйақы алу. Соның арқасында Отбасы банктегі салым пайызы жоғары басқа банктердің депозитінен тиімді болады.
  • Төмен мөлшерлемемен ипотека рәсімдеу. Отбасы банкте ол 3.5 %-дан басталады.
  • Мемлекеттік бағдарламаларға қатысу. Салымшылар «Наурыз» сияқты мемлекеттік бағдарламаға өтінім бере алады. Ол үшін депозит міндетті түрде болуы керек.
  • Зейнетақы қорындағы ақшаны депозитке аударып, жыл сайын мемлекеттік сыйақы алып, 6 жыл бастапқы жарнаға ақша жинауға болады.

Krisha.kz материалын пайдаланғанда бірінші абзацта міндетті түрде сілтеме болуы керек!