Барлық банктегі пайыздық мөлшерлеме, бастапқы жарна (және қандай жағдайда қажет емес), қандай пәтер ипотекаға жарамды, ал қайсысын қарастырмаған жөн екенін білдік.

Қандай пәтер таңдау керек

Екінші нарық — иесі бар жылжымайтын мүлік. Егер жаңадан салынған тұрғын үй кешенінен пәтер алғыңыз келсе, бірақ оның иесі құрылыс компаниясы болмаса, онда ол да екінші нарықтағы жылжымайтын мүлік болып есептеледі.
Ипотека шарттары баспананың сипаттамасына байланысты өзгереді: неғұрлым ескі болса, мөлшерлеме соғұрлым жоғары болады, ал несие мерзімі қысқарады. Неге? Өйткені ескі кірпіш үйдегі пәтер 15–20 жылдан кейін өтімді болуы екіталай. Егер қарыз алушы несиені төлей алмаса, кепілдегі жылжымайтын мүлік қарызды толық жабуы керек.
Қандай тұрғын үйді ипотекаға алуға болмайды

Құрылыс материалы
Көптеген банк каркас-қамыс, саман және ағаш үйдегі пәтерге несие бермейді.

Салынған жылы
Кейбір банк жыл бойынша шектеу қояды, көбінесе 1965 жылдан бұрын салынған үйлер ипотекаға жарамсыз.

Қайта жоспарлау
Пәтер заңсыз қайта жоспарланған болса, ипотека алу мүмкін емес. Кейбір банк тіпті заңдастырылған үйге несие бермейді.
Мансард және жертөле қабатындағы пәтер құжатта тұрғын үй ретінде тіркелмесе, кепіл ретінде қабылданбайды.

Саяжай
Ешбір банк саяжай сатып алу үшін ипотека бермейді. Мұндай жағдайда тек тұтынушылық несие алуға болады.

Жатақхана
Кей банк жатақханадағы бөлмені сатып алу үшін ипотека рәсімдемейді.

Екінші нарықтағы үйге арналған ипотека шарттары

Көптеген банк бастапқы жарна талап етеді, ол орта есеппен пәтер құнының 20 %-ына (ең төменгі мөлшерлеме — 15%) тең. Кейбір жағдайда ипотеканы бастапқы жарнасыз алуға болады, бірақ ол үшін сатып алынатын жылжымайтын мүліктен бөлек қосымша кепілзат қажет, яғни басқа мүлікті кепілге қою керек.
Пайыздық мөлшерлеме бойынша біз стандарт шарттарды қарастырдық. ЖТСМ (жылдық тиімді сыйақы мөлшерлемесі) әрдайым жоғары болады. Несиенің нақты пайыздық мөлшерлемесі жеке есептеледі. Оған қарыз алушының табысы, бастапқы жарнаның болуы және мөлшері, несие мерзімі мен сомасы және т. б. факторлар әсер етеді.
Кеңес: банктер жалақы картасы бар өз клиенттеріне тиімді несие шарттарын ұсынады.

Екінші нарықтағы үйге ипотека рәсімдейтін банктер

Ипотеканы мына 9 банк ұсынады:

— Altyn;
— Halyk;
— Банк ЦентрКредит;
— Фридом Банк Қазақстан;
— ForteBank;
— Нұрбанк;
— Қазақстандағы Қытай банкі;
— KZIBank;
— Отбасы банк.

Еуразия банкі тек ипотекалық несиелерді қайта қаржылау қызметін ұсынады және «7-20-25» мемлекеттік бағдарламасы бойынша (тек жаңа тұрғын үйге) несие береді.

Jusan банкте ипотекалық бағдарламалар жоқ.

Bereke банкте ипотекалық несие қазір жоқ, бірақ жылжымайтын мүлікті кепілге қою арқылы несие алуға болады. Несие алу үшін кепілге пәтер, үй немесе коммерциялық жылжымайтын мүлік қою қажет (өз мүлкі немесе үшінші тұлғаларға тиесілі мүлік). Бұл несиені ықтиярхаты барлар да ала алады.

Шарттары:
Ең жоғары сома — кепілге қойылатын мүліктің бағалау құнының 70 %-ына дейін, бірақ 50 млн теңгеден аспайды.
— Мерзім — 10 жылға дейін.
— Мөлшерлеме — 13 %-дан басталады.

Altyn Bank

Ипотеканың екі түрі бар: банк комиссиясымен — несие мөлшерлемесі төмен, бірақ комиссия төлеу қажет. Комиссиясыз — комиссия жоқ, бірақ пайыздық мөлшерлеме жоғары.

  • Комиссиямен:

Мөлшерлеме — 14 %-дан басталады.
Қосымша комиссия төлеу қажет, ол банктен алған соманың 1.99 %-ын құрайды.

  • Комиссиясыз:

Мөлшерлеме — 20 %-дан басталады.

Қалған шарттар бірдей:
— Мерзім — 20 жылға дейін.
— Бастапқы жарна — 20 %-дан басталады.
— Ең жоғары сома — 175 млн тг.

Банкте Цифрлық ипотека қолжетімді. Оны банктің мобильді қосымшасы арқылы онлайн рәсімдеуге болады. Шарттары стандарт ипотекамен бірдей.

Екінші нарықтағы тұрғын үйге қойылатын талаптар:

  • Салынған жылы: 1975 жылдан кейін салынған болуы керек.
  • Материалы: барлық материал жарамды, бірақ каркас-қамыс, қожблок, ағаш және саман үйлер жарамайды.
  • Жатақхана: жарамды.
  • Орналасқан жері: қаладағы және жақын маңдағы тұрғын үйді қарастыруға болады, бірақ ұзақтығы 30 км-ден аспауы керек.

Halyk Bank

Банкте екінші нарықтағы ипотекаға арналған бірнеше бағдарлама бар.

Цифрлық ипотека

Өтініш беру және алдын ала мақұлдау процестері мобильді қосымша арқылы онлайн өтеді.

Бұл бағдарламаның да екі нұсқасы бар: комиссиямен — төмен пайыздық мөлшерлеме, комиссиясыз — жоғары пайыздық мөлшерлеме.

  • Комиссиямен:

— Мөлшерлеме — 17.5 %-дан басталады.
— Комиссия — қарыз сомасынан 1 %.

  • Комиссиясыз:

— Мөлшерлеме — 18.5 %-дан басталады.

Қалған шарттар бірдей:
— Мерзім — 20 жылға дейін.
— Бастапқы жарна — 20 %-дан басталады.
— Ең жоғары сома қарыз алушының табысына тікелей байланысты.

Баспанаға қойылатын талаптар:

  • Салынған жылы: кірпіш үй — 1960 жылдан бастап, панель үй — 1965 жылдан ерте болмауы керек Жер үй (жылыблок, ағаш, қожблок) — 2000 жылдан ерте болмауы керек
  • Материалы: каркас-қамыс және саманнан басқа барлық материал жарамды.
  • Жатақхана: жарамды.
  • Орналасқан жері: қала және қала маңы. Банкте әр өңір үшін арнайы микроаудандар мен ауылдар тізімі бар, онда қала сыртындағы пәтер немесе үйді таңдауға болады.

Halyk Sale

Банкке тиесілі (кепілдегі) пәтерлер мен үйлерді рәсімдеуге болады. Оларды halykzalog. kz сайтынан қарайсыз.

Шарттары:
— Мөлшерлеме — 12 %-дан басталады.
— Мерзім — 6 айдан 20 жылға дейін.
— Бастапқы жарна — 20 %-дан басталады.

Банк ЦентрКредит

Екінші нарықтағы тұрғын үйге бірнеше бағдарлама ұсынады.

Стандарт ипотека

Шарттары:
— Мөлшерлеме — 18.5 %-дан басталады.
— Мерзім — 15 жылға дейін.
— Бастапқы жарна — 20 %-дан басталады.
— Ең жоғары сома — Астана, Алматы, Шымкент, Қарағанды, Ақтау, Атырау, Ақтөбе, Өскемен қалалары үшін 40 млн тг; басқа өңірлер үшін 25 млн тг.

Егер бастапқы жарна 30 %-дан жоғары болса, несиенің максимал сомасы 100 млн теңгеге дейін өсуі мүмкін.

Банк комиссиясы — 2 %, Банк ЦентрКредит арқылы жалақы алатындар үшін 1 %.

Баспанаға қойылатын талаптар:

  • Салынған жылы: 1965 жылдан ерте болмауы керек.
  • Материалы: монолит, кірпіш, панель және каркас-қамыс үйлер.
  • Жатақхана: жарамды.
  • Орналасқан жері: қала және қала маңы (50 км-ден аспайтын қашықтықта орналасқан).

Ипотека плюс

Шарттары:
— Мөлшерлеме — 18.5 %-дан басталады.
— Мерзім — 15 жылға дейін.
— Бастапқы жарна — 20 %-дан басталады.

Стандарт ипотекадан екі негізгі айырмашылығы бар:

  • Комиссия жоқ
  • Бастапқы жарна орнына банк қосымша кепіл ретінде үй немесе пәтер қабылдайды. Бұл жылжымайтын мүлік қарыз алушыға немесе оның туыстарына немесе достарына тиесілі болуы керек.

Ең жоғары сома және талаптар стандарт ипотекамен бірдей.

Жинақтаушы ипотека

Бұл — табысты растаусыз берілетін ипотека, яғни зейнетақы қорына ақша аудармаған адамдарға арналған. Банк несие беру үшін қарыз алушының алдымен банкте депозит ашуын талап етеді және кем дегенде 6 ай ақша жинауға міндеттейді. Ипотека рәсімдеу үшін депозитте несие сомасының кемінде 20 %-ы болуы қажет. Кейін стандарт ипотека немесе ипотека плюс рәсімдеуге өтінім беруге болады.

Фридом Банк Казахстан

Цифрлық ипотека

Шарттары:
— Мөлшерлеме — 17 %-дан басталады.
— Мерзім — 20 жылға дейін.
— Бастапқы жарна — 20 %-дан басталады.
— Ең жоғары сома — 70 млн тг.
Өтінімді қарастыру үшін комиссия — 27 000 теңге.

Өтінім беру, мақұлдау, несие алу, сатып алу-сату шартын рәсімдеу банк қосымшасы арқылы онлайн жасалады.

Баспанаға қойылатын талаптар:

  • Салынған жылы: 1965 жылдан ерте болмауы керек.
  • Материалы: шектеу жоқ, бірақ тек пәтер үшін несие беріледі, жер үйді қарастырмайды.
  • Жатақхана: рұқсат етіледі, бірақ бөлме ауданы кемінде 29 ш. м болуы қажет.
  • Орналасқан жері: қала және қала маңы.

Заңды түрде қайта жоспарланған үйді ипотекаға алуға болады.

ForteBank

Жылжымайтын мүлікті кепілге қойып берілетін ипотека

Шарттары:
— Мөлшерлеме — 17.5 %-дан басталады.
— Мерзім — 20 жылға дейін.
— Бастапқы жарна — 15 %-дан басталады.
— Ең жоғары сома — 200 млн тг.

Баспанаға қойылатын талаптар:

  • Салынған жылы: 1965 жылдан ерте болмауы керек
  • Материалы: каркас-қамыс үйден басқа барлығына беріледі.
  • Жатақхана: жарамсыз.
  • Орналасқан жері: қала және қала маңы.

Нұрбанк

Шарттары:
— Мөлшерлеме — 19.5 %-дан басталады.
— Мерзім — 20 жылға дейін.
— Пәтер үшін бастапқы жарна — 20 %, жер үй үшін 30 %-дан басталады.
— Ең жоғары сома — 70 млн тг.

Бұл шарттар ресми табысы бар қарыз алушыларға арналған.
Табысты растамай ипотека рәсімдеу мүмкіндігі де бар.

Шарттары:
— Мөлшерлеме — 19.5 %-дан басталады.
— Мерзім — 7 жылға дейін.
— Пәтер үшін бастапқы жарна — 50 %, жер үй үшін 60 %-дан басталады.
— Ең жоғары сома — 30 млн тг.

Баспанаға қойылатын талаптар:

  • Салынған жылы: 1975 жылдан ерте болмауы керек
  • Материалы: тек кірпіш, панель және монолит.
  • Жатақхана: жарамсыз.
  • Орналасқан жері: қала және қала маңы (50 км-ден аспайтын қашықтықта орналасқан).

Заңды түрде қайта жоспарланған пәтерді несиеге алуға болады.

«Нұр Шаңырақ» ипотекасы (банкте кепілде тұрған үйлер мен пәтерлерді несиеге беру) қазір жұмыс істемейді.

Қазақстандағы Қытай банкі (Bank of China Kazakhstan)

Шарттары:
— Мөлшерлеме — 23 %-дан басталады.
— Мерзім — 7 жылға дейін.
— Бастапқы жарна — 50 %-дан басталады.
— Ең жоғары сома — сатып алынатын жылжымайтын мүліктің нарықтағы құнының 50 %-ына дейін несие беріледі. Сома қарыз алушының табысына байланысты.

Баспанаға қойылатын талаптар:

  • Салынған жылы: пәтер — 1970 жылдан, жер үй 1985 жылдан ерте болмауы керек
  • Материалы: барлық.
  • Жатақхана: жарамсыз.
  • Орналасқан жері: қала және 20 км радиустағы (Алматы) аудан, Астана мен Ақтөбеде 10 км-ден аспауы керек.

KZIBank

Шарттары:
— Мөлшерлеме — 21 %-дан басталады.
— Мерзім — 5 жылға дейін.
— Бастапқы жарна — жоқ (қосымша кепілзат қажет болуы мүмкін).
— Ең жоғары сома — 100 млн тг дейін.

Баспанаға қойылатын талаптар:

  • Салынған жылы: 1975 жылдан ерте болмауы керек
  • Материалы: барлық.
  • Жатақхана: жарамсыз.
  • Орналасқан жері: қала және қала маңы.

Отбасы банк

Отбасы банк — коммерциялық емес, тұрғын үй құрылыс жинақ жүйесі бойынша жұмыс істейтін мемлекеттік банк.
Несие беру жүйесі ерекше. Бірден ипотека рәсімдеу мүмкін емес. Алдымен депозит ашып, оған тұрғын үй құнының 50 %-ын жинау қажет.
Толық салуға болады, оның ішінде зейнетақы жинағының артық сомасын да аударуға мүмкіндік бар, бірақ қаражат шотта кемінде 6 ай жатуы керек.
Депозит бойынша сыйақы — 2 % банктен, жылына бір рет мемлекет сыйақы қосады.

Қарыздың екі түрі бар:

  • Аралық

— Мөлшерлеме — 6-10 %.
— Ең жоғары мерзім — 3 жыл.

Ол үшін депозитте тұрғын үй құнының 50 %-ы жиналуы керек. Ақша шотта кемінде 3 ай жатуға тиіс.

Үш жылдан кейін аралық несие тұрғын үй несиесіне ауысады.

Егер депозит ашылғанына кемінде 3 жыл болса, тұрғын үй несиесін төмен мөлшерлемемен (3.5-5 %) рәсімдеуге болады.

  • Тұрғын үй несиесі

— Мөлшерлеме — 3.5-5 %.
— Ең жоғары мерзім — 25 жыл (салымшының бағалау көрсеткішіне байланысты).

Отбасы банк несиесінің тағы бір ерекшелігі: аралық несие кезінде пайыз бүкіл сомаға, оның ішінде қарыз алушы депозитінде жинаған қаражатқа да қосылады. Соған қарамастан, Отбасы банктегі мөлшерлеме екінші деңгейлі банктерге қарағанда төмен, сондықтан артық төлем де аз болады. Тұрғын үй несиесіне ауысқаннан кейін, банк тек қарыз сомасына сыйақы қосады.

Екінші деңгейлі банк пен Отбасы банктің ипотекасы бойынша артық төлемді есептедік:
Кәдімгі ипотека немесе Отбасы банк: қайта қаржыландыру тиімді ме

Баспанаға қойылатын талаптар:

  • Салынған жылы: кірпіш, монолит, бетон блок — 1965 жылдан ерте болмауы керек, панель — 1975 жылдан ерте болмауы керек.
  • Материалы: каркас-қамыс үйден басқа барлығы.
  • Жатақхана: жарамды.
  • Орналасқан жері: қала және қала маңы.

Krisha.kz материалын пайдаланғанда бірінші абзацта міндетті түрде сілтеме болуы керек!