Кейде суды, жарықты немесе газды үнемдеп қолданғанмен, коммуналдық қызмет төлемі бәрібір жоғары болады. Бұған тарифке қатысы жоқ басқа нәрсе себеп болуы мүмкін.

Есептегішті тексеру мерзімі өтіп кеткен болар. Онсыз төлем нақты жұмсалған көлем бойынша емес, нормативке сәйкес есептеледі. Бұл норматив айтарлықтай жоғары.

Есептегішті не үшін тексеру керегін және оның коммуналдық қызмет төлемін үнемдеуге қалай көмектесетінін түсіндіреміз.

Есептегіш не үшін керек

Есептегіш нақты тұтыну көлемі бойынша төлеуге мүмкіндік береді.

Электр энергиясының есептегіші барлық жерде міндетті түрде болуы керек.
Газ есептегіш жер үйде болуға тиіс, ал пәтерде өз қалауыңызша орната аласыз.
Суық және ыстық суға арналған есептегішті адамдар өз еркімен орнатады. Тариф жиі өсетіндіктен мұндай құралдар тиімді болады.

Есептегішті тексеру деген не

Уақыт өте келе есептегіш дәлдігін жоғалтады.

Құрылғы дұрыс жұмыс істеп тұрғанына көз жеткізу үшін оны үнемі тексеріп (есептеп) отыру керек. Қазақстанда есептегішті міндетті түрде тексеру керек.

Есептегіш жоқ немесе тексеру мерзімі өтіп кеткен жағдайда, қызмет көрсетуші компания төленетін соманы норматив бойынша есептейді. Бұл әлдеқайда қымбатқа түседі.

Есептегішті тексеру қажет екенін қалай білуге болады

Екі жолы бар:

Қағаз түбіртекті үнемі қарап отыру керек. Бірақ бұл тәсіл онлайн-банкинг арқылы төлем жасайтындар үшін жарамайды.
Қызмет көрсетуші компаниядан есептеу мерзімін сұрау.

Тексеріс туралы маңызды ақпарат

— Коммуналдық қызмет көрсетуші есептеу мерзімі жақындағаны туралы 1–2 ай бұрын қағаз түбіртекте немесе арнайы хабарлама арқылы ескертеді.
— Есептегішті тексеру ақысын меншік иесі төлейді.
— Әр есептегіш қызмет түріне байланысты шамамен 5–10 жылда бір рет уақытылы тексеріледі.
— Уақытында тексеру жүргізбесе, коммуналдық қызметті нақты тұтыну емес, қала немесе облыс бойынша бекітілген нормативпен төлейсіз.

Тексермесеңіз, қанша төлейсіз

Мысал ретінде суық және ыстық судың шығынын салыстырайық:

	Есептегішпен	Есептегішсіз
Ыстық су	Жазда – 605 тг/текше. м Қыста – 658 тг/текше. м	Жазда – 1865 тг/адам Қыста – 2272 тг/адам
Суық су	103 тг/текше м басталады	3090 тг/адам

Есептегішсіз төлем 3–5 есе көп шығады.

Оған қоса, жазда жер үйде бақша суару үшін қосымша ақы алынады.

Сондықтан есептегіштің болуы және оларды уақтылы тексеріп отыру — артық төлемеудің қарапайым жолы.

Әртүрлі есептегішті қалай тексеру керек

Газ

5 жылда бір рет.
Арнайы лицензиясы бар компанияға өтінім жіберу керек. Оларды өзіңіз табасыз.
Мамандар есептегішті шешпей тексереді.
Тексеру құны есептегіштің түріне қарай 7000 теңгеден басталады.
Есептегіш тексерістен өтпесе, жаңасын сатып алу қажет, бағасы 20 000 теңгеден жоғары.

Суық/ыстық су

5 жылда бір рет.
Аккредиттелген компанияға өтінім жіберу керек. Байланыс деректерін қызмет көрсетуші компаниялардың сайтынан табуға болады.
Мамандар құрылғыны шешпей тексереді.
Құны: пәтерде 4000 теңгеден, жер үйде 8000 теңгеден басталады.
Есептегіш тексерістен өтпесе, жаңасын сатып аласыз, бағасы пәтер үшін 8000 теңге, жер үй үшін 15 000 теңгеден басталады.

Есептегіш қолданылмаған күндер үшін қызмет төлемі орташа немесе қала тарифі бойынша есептеледі.

Электр энергиясы

Әр 8–10 жыл сайын тексеру керек. Аудандық электр желілерінен хабарлама түскеннен кейін ғана жасалады.
Алдымен арнайы маманды шақырып, есептегіштің пломбасын ашып, көрсеткішті акт арқылы бекіту қажет.
Үй иесі есептегішті өзі шешіп/қайта орната алмаса, электрші жалдайды.
Есептегішті шешкен соң, электр желісі маманы құрылғыны аккредиттелген ұйымға тексеруге жібереді.
Тексеру құны есептегіштің түріне қарай 4500 теңгеден басталады. Пломбаны ашу/жабу тегін. Электрші қызметінің құны келіскеніңізге байланысты.
Есептегіш тексерістен өтпесе, жаңасын сатып алу қажет. Бағасы 10 000 теңгеден басталады.
Тексерістен кейін есептегішті орнына қойып, қайтадан электр желісі қызметкерін шақырып, пломба орнату керек.

Тағы қалай үнемдеуге болады? Ең бастысы есептегіштегі көрсеткішті өзіңіз қадағалап, түбіртектегі есепке сеніп төлемеңіз.

Коммуналдық қызмет төлемін азайтқыңыз келе ме? Онда есептегішті қадағалап, оларды уақытылы тексеріп тұрыңыз. Бұл — төлем сомасын азайтудың алғашқы қадамы әрі үнемдеу тәсілі.
Есептегішті тексеруді елемеуге болмайды, бұл үнемдеуге бағытталған маңызды қадам.

Қазақстанның жылжымайтын мүлік нарығындағы жаңалықтар