«Наурыз жұмыскер» ипотекасы бойынша өтінім бере алатын мамандықтар тізімі шықты. Өтінім қабылдау 17 наурызда басталады. Онлайн өтінім беруге болмайды, сондықтан Отбасы банк бөлімшесіне барлық қажет құжат пен анықтама ала баруыңыз қажет.

«Наурыз жұмыскер» ипотекасының шарттары:
— Мөлшерлеме: 7 % — әлеуметтік осал топтарға (ЖТСМ 9.6 %-ға дейін) және қалған категорияға — 9 % (ЖТСМ 13 %-ға дейін).
— Бастапқы жарна: әрленген жаңа пәтер үшін 10 %, қара сылақпен берілетін жаңа пәтер мен екінші нарықтағы тұрғын үй үшін 20 %.
— Ең жоғары сома:
— Астана мен Алматыда 36 млн тг;
— басқа өңірлерде 30 млн теңгеге дейін.
Астана, Алматы, Шымкент және облыс орталықтарында тек бірінші нарықтан баспана сатып алуға болады. Моноқалалар мен ауылдық жерлерде екінші нарықтағы тұрғын үй қолжетімді.

«Наурыз жұмыскер» бағдарламасы бойынша пәтер ала алатын мамандықтар тізімі

Өтініш бермес бұрын екі тізіммен сәйкестігін тексеру қажет.

Мамандықтар тізімі.
Экономикалық қызмет түрлерінің тізімі (ЭҚЖЖ).

Өз мамандығыңызды бірінші тізімнен, ал жұмыс бағытын екіншісінен тапсаңыз, «Наурыз жұмыскер» бағдарламасына қатыса аласыз.
Мамандық тізімі өте үлкен — жалпы 8230 тармақ бар.

«Наурыз жұмыскер» ипотекасын ала алатын кейбір мамандық иелері:

авиамеханик, авиадиспетчер, авиатехник және авиақұрастырушы;
автослесарь, автомеханик және автоэлектромеханик;
агроном, агрофизик және агрохимик;
бетоншы, битумшы, бұрғылаушы, шинаны теңестіруші;
бортсерік, бортмеханик, бортинженер;
жүргізуші (трамвай, тролейбус, такси және әртүрлі арнайы және жүк техникасы);
геолог, газбен дәнекерлеуші, геофизик, гидролог, гидрохимик, көзеші;
аула тазалаушы, жолшы, сауыншы, ұнтақтаушы;
инженер, инспектор, сынақшы;
бақылаушы, от жағушы, ат бағушы, шатыршы;
орманшы, ағаш кесуші, ұшқыш, логист, лоцман;
сырлаушы, машинист, механик, жуушы, құрастырушы, моторшы, қоқыс шығарушы;
наубайшы, баспашы, пеш салушы, пиротехник, пошташы, жолсерік;
бағбан, жинаушы, дәнекерлеуші, слесарь, ағаш шебері;
техник, технолог, токарь, тракторшы, құбыр әзірлеуші.
тазалаушы, төсеуші, өлшеп салушы, фермер, тігінші және кенші.

Мамандықтардың толық тізімі.

Тек тізімдегі мамандық иесі болу жеткіліксіз. Міндетті түрде өз мамандығыңыз бойынша жұмыс істеп, тиіс саладағы компания немесе кәсіпорын қызметкері болуыңыз қажет.

Сәйкес келетін экономикалық қызмет түрлерінің тізімі

Өтінім жіберу үшін:
— Біріншіден, қызмет түрі ЭҚЖЖ тізіміне кіретін кәсіпорында қызметкер болу қажет.
— Екіншіден, 8230 мамандықтың біріне сәйкес келетін кәсіп иесі болуыңыз керек.

«Наурыз жұмыскер» бағдарламасына өтінім беру үшін қандай құжаттар қажет

Өтінім жіберу үшін міндетті түрде жұмыс орнынан бекітілген үлгідегі анықтама алу қажет.
Маңызды: жұмыс орнынан анықтама берген жұмыс берушіден соңғы 3 айдағы зейнетақы жарнасы тұрақты түрде түсіп отыруға тиіс.

Қажет құжаттар:

Жеке куәлік.
Кәмелетке толмаған балалардың туу туралы куәлігі (бар болса).
Неке қию (бұзу) туралы куәлік (бар болса).
Өтініш беруші мен оның отбасы мүшелерінің атында жылжымайтын мүлік (бірлескен ортақ меншікті қосқанда) бар-жоғы туралы анықтама.

Бағдарламаға қатысу үшін Отбасы банкте депозит болуы қажет. Шоттағы ең аз сома — 2 млн теңге. Депозит ашылған мерзім маңызды емес, оны өтініш беру алдында ашуға болады.

Krisha.kz материалын пайдаланғанда бірінші абзацта міндетті түрде сілтеме болуы керек!

Қазақстанның жылжымайтын мүлік нарығындағы жаңалықтар

Тұрғын үй кезегі қалай жылжып жатыр

Елімізде тұрғын үйге сұраныс қалай өзгерді