Зейнетақы жинағының шегі мамырда көтерілуі мүмкін, сонда қордан алуға болатын сома азаяды. Қорыңыздағы ақшаны үй сатып алуға немесе ипотеканы жабуға пайдалануды жоспарлап жүрсеңіз, жинағыңызды қазірден тексеріп, өтінім беруді кейінге қалдырмағаныңыз жөн.

Артық қаражат бар-жоғын қалай білуге және оны тұрғын үй алу үшін қалай алуға болатынын түсіндіреміз.

Барлық операция үшін электрондық цифрлық қолтаңба (ЭЦҚ) қажет. Оны eGov.kz сайтында «ЭЦҚ-ны қашықтан алу» қызметі арқылы онлайн рәсімдеуге болады.

Зейнетақы қорынан қанша ақша алуға болады

Толық соманы емес, тек артық қаражатты алуға болады. Бұл — жеткілікті шектен асқан жинақ. Шек жасқа байланысты: неғұрлым үлкен болса, соғұрлым жоғары болады.

Ең төменгі шектен асқан бөлігін тұрғын үй сатып алуға немесе ипотеканы жабуға қазірдің өзінде пайдалануға болады.

2026 жылға арналған жеткілікті шекті кестеден көре аласыз

Артық қаражат бар-жоғын қалай білуге болады

Ең оңай тәсіл — eGov Mobile қосымшасы арқылы.

  1. Қосымшаға кіріңіз.
  2. «Профиль» бөліміне өтіңіз.
  3. «Зейнетақы жинақтары» дегенді таңдаңыз.
  4. Қажет болса деректерді жаңартыңыз.

Көшірмеде мынадай ақпарат жазылады:

  • жинақтың жалпы сомасы;
  • ең төменгі жеткілікті шек;
  • алуға болатын сома;
  • шот бойынша басқа мәлімет.

Ең бастысы — «Алуға болатын сома» жолағы. Нөлден басқа сан тұрса, бұл қаражатты тұрғын үй жағдайын жақсартуға пайдалануға болады. Соманы БЖЗҚ және eGov сайттарындағы жеке кабинеттен тексере аласыз.

Маңызды: 1 қаңтардан бастап Салық кодексіндегі өзгерістердің арқасында артық қаражатты 10 % салық төлемей пайдалануға болады. Бұл көбірек қаражат алуға мүмкіндік береді.

Зейнетақ жинағын қалай алуға болады

Өтінім бермей тұрып арнайы шот ашу қажет. Оны Отбасы банк қосымшасы немесе басқа банктер арқылы (ақша ипотека үшін қажет болса) ашуға болады. Бұрын ашсаңыз, қайта ашудың қажеті жоқ.

Әрі қарай не істеу керек:

  1. enpf-otbasy.kz платформасына өтіңіз.
  2. ЭЦҚ арқылы кіріңіз.
  3. Қаражатты пайдалану мақсатын таңдаңыз.
  4. Соманы жазыңыз.
  5. Өтінім жіберіңіз.

Зейнетақы жинағын қандай мақсаттарға пайдалануға болады

Қаражатты мына мақсаттарға жұмсай аласыз:

  • тұрғын үй сатып алу (толық есеп айырысу);
  • үлестік қатысу шарты бойынша тұрғын үй сатып алу;
  • ипотеканы толық немесе ішінара өтеу;
  • сатып алу құқығымен жалға алу ақысын төлеу;
  • үй салу;
  • құрылысқа арналған жер телімін сатып алу;
  • ипотека бойынша бастапқы жарна;
  • тұрғын үй сатып алу үшін Отбасы банктегі депозитті толтыру.

Зейнетақы жинағын туыстарға беруге болады: алдымен құқықты табыстау рәсімделеді, содан кейін пайдалану мақсаты таңдалады.

Халық қанша ақша алды

2021 жылдан бастап 2026 жылғы 1 сәуірге дейін қазақстандықтар зейнетақы қаражатын пайдаланып тұрғын үй сатып алу үшін шамамен 4.7 трлн теңге жұмсаған.

Ең көп қаражат тұрғын үй сатып алуға кеткен — 2.5 трлн теңге.

Екінші орында — Отбасы банктегі депозитті толықтыру: 740 млрд теңге.

Одан кейін ипотеканы ішінара өтегендер тұр:

  • коммерциялық банктерде — 445 млрд теңге;
  • Отбасы банкте — 375 млрд теңге.

Пайдалы материалдар:
Зейнетақы жинағының жеткілікті шегі мамырда өседі — Еңбек министрлігі
Зейнетақы жинағының жеткілікті шегі өседі: қордағы ақшаны алу қиындайды
2026 жылы бастапқы жарнасыз ипотека алуға бола ма