1 қазаннан бастап Алматыда суық су мен кәріз қызметінің тарифі қымбаттайды.

Тұрғындар үшін тариф мынадай (16% ҚҚС-ты қоса есептегенде):

  • суық су — 1 текше метрге 178.06 теңге;
  • кәріз — 1 текше метрге 119.46 теңге.

— 2025 жылғы қыркүйекке дейін Алматы тұрғындары әлеуметтік тариф бойынша судың 1 текше метрі үшін 102.49 теңге төлеген. Кейін мораторий аясында тариф 76.56 теңгеге дейін төмендеді. Бұл бір жылдан астам уақыт қолданылды, — деді «Алматы су» компаниясының сату департаментінің директоры Серік Шагиров Өңірлік коммуникациялар қызметінде өткен брифингте.

Қазір тариф екі есе өседі.

Бұған дейінгі су көлеміне байланысты тарифті әртүрлі есептеу тәртібі 2026 жылдың аяғына дейін күшін жояды. Яғни барлық жеке тұлға үшін бірыңғай су тарифі 178.06 теңге болады.

Қазаннан бастап заңды тұлға мен мемлекеттік мекеме үшін де су тарифі (362.18 және 649.6 теңге/текше метр) өседі.

Түбіртек бойынша қанша төлейміз?

  • Есептегіш болса

Мысалы, үш адамнан тұратын отбасы бір айда 10 текше метр су тұтынды делік. Есептегіш болған жағдайда су үшін төлем мынадай:
10 × 178.06 = 1780.6 теңге.
Бұған кәріз қызметінің ақысы қосылады: 1194.6 теңге (10 × 119.46).
Жалпы: 2975.2 теңге.

  • Есептегіш болмаса

Есептегіш болмаса төлем белгіленген тұтыну нормасы бойынша есептеледі. Ол бір адамға айына 15 текше метрді құрайды немесе 2670 теңге. Сондықтан үш адамнан тұратын отбасы су үшін:
45 × 178.06 = 8012.7 теңге төлейді.
Бұған кәріз қызметінің ақысы қосылады: 5375.5 теңге (ай сайын бір адамға 1791.85 теңге).
Жалпы: 13 388.3 теңге.

Есептегіш болмаса төлем 4.5 есе жоғары болады.
Есептегіш болса отбасы нақты тұтынған су көлемі үшін төлейді, ал есептегішсіз белгіленген норма бойынша есеп айырысады.

Тариф не үшін өседі

«Алматы су» компаниясы электр энергиясына, жұмысшылардың жалақысына, материалдар мен жабдықтарға, сондай-ақ желілерді жөндеу және оған қызмет көрсетуге жұмсалатын шығындар артқандықтан тариф өсті деді.

Кейінгі бір жылда компанияның балансына жаңа желілер мен объектілер өтті. Оларды пайдалану қосымша шығын әкеледі.

Алматыда есептегіштер саны артады

Қазір тұрғын үй мен пәтердің шамамен 78%-ы су есептегішпен жабдықталған. Келер жылы компания бұл көрсеткішті 95%-ға жеткізбекші.
Есептегіш нақты пайдаланылған су көлемі үшін төлеуге және тұтынған суды бақылауға мүмкіндік береді.

Қала біртіндеп көрсеткішті қашықтан жіберу — ақылды есептегішке көшуге дайындалып жатыр. Оларды қашан міндетті түрде орнату керегін және бағасы қанша болатынын бұған дейін жаздық: Қазақстанда жаңа су есептегіш пайда болды

Пайдалы материалдар:
Қазақстанда ақылды газ есептегішті тегін орнатуға болады
Мүлік салығын 1 қазанға дейін төлеу керек
Жалға беру үшін пәтер сатып алған тиімді ме
«Тек қолма-қол ақшаға сату»: сатушылар неге ипотека арқылы сатпайды
Отбасы банктің депозитіндегі зейнетақы қаражаты: 6 жылдық мерзім енді жоқ