Алматыда тұрғын үйді күтіп-ұстауға арналған ең төменгі тариф өсті. Мұндай шешімді қалалық мәслихат депутаттары қабылдады.

Ең төменгі төлем мөлшері — 0.016 АЕК, яғни айына әр шаршы метр үшін 70 теңге. Бұл бұрынғы тарифтен шамамен екі есе жоғары.

Шешім 2026 жылғы 28 маусымнан бастап күшіне енеді. Сондықтан халық жаңа тарифті алдағы айда келетін түбіртектен көреді.

Бұл алматылықтар үшін нені білдіреді

Бұл ПИК, МИБ қызметтері үшін алынатын төлем осы мөлшерден төмен болмайды деген сөз. Бұл төлемді енгізу үшін тұрғындардың келісімі қажет емес.
Керісінше тұрғындар жалпы жиналыста тарифті бұдан жоғары қыла алады.

Қазір қанша төлейміз және есеп қалай өзгереді

2025 жылы мәслихат ең төменгі тарифті айына әр шаршы метр үшін 40 теңге деңгейінде бекітті.

Жаңа тариф бойынша ауданы 60 шаршы метр пәтер үшін төлем 2400-ден 4200 теңгеге дейін өседі.

Бұл қаражат қайда жұмсалады

Бұл үйді күтіп-ұстауға кететін шығын. Қаражат мына мақсаттарға жұмсалады:

  • кіреберіс пен ауланы тазалау;
  • ортақ мүлікті жөндеу;
  • кіреберіс пен басқа ортақ аумақты жарықтандыру;
  • жылыту маусымына дайындық;
  • өрт қауіпсіздігін қамтамасыз ету және үйдің инженерлік жүйелерін күтіп-ұстау және т.б.

Түбіртекте бұл төлем «Тұрғын үйді күтіп-ұстау», «Үйді күтіп-ұстауға кететін шығын» және басқа ұқсас атаумен жазылуы мүмкін.

Заң бойынша жарнаны пәтер мен тұрғын емес үй-жайдың барлық меншік иесі төлеуге міндетті.

Үйді басқарушы ұйым тұрғындарға есеп беруге міндетті. Олар ай сайынғы және жылдық есепті ұсынуға тиіс.

Алматыда қоқыс шығару қызметінің тарифі де қымбаттайды: бір адамға шаққанда төлем 718.5-тен 745 теңгеге дейін өседі.

Қызық болуы мүмкін:
Билік Алматыда аулаға және жеке үйдің жанына көлік қоюға тыйым сала ма?