Әлеуметтік желіде Алматыда көлікті аулаға және жеке үйдің жанына қоюға болмайды деген хабарлама тарады. Бұған 2026 жылғы 1 шілдеден бастап күшіне енетін жаңа абаттандыру ережесі себеп болған.
Не өзгеретінін және Алматы тұрғыдарына шынымен көлік қоюға болмай ма, қарастырайық.

Жаңа ережеде не өзгерді?

Жаңа абаттандыру ережесінде іргелес аумақ пен ортақ пайдаланылатын жерде әртүрлі зат сақтауға тыйым салатын норма қалды. Бұған жеке үйдің жанындағы жол жиегі де кіреді.
Мысалы, құрылыс материалдары, тыңайтқыш және көлік құралын сақтауға болмайды.
Көлік дегенде тұрғындарда сұрақ туындады, артынан ауладағы тұраққа қатысты қауесет тарап кетті.

Бұл норманы жаңа деуге келмейді.

Бұған дейін абаттандыру ережесінің 32-бабында жеке тұрғын үй иелеріне іргелес аумақта құрылыс материалы, отын, тыңайтқыш, көң және басқа жылжымалы заттарды сақтауға тыйым салынған.
Жаңа редакцияда тізім нақты болды. Енді мұндай заттардың қатарына көлік, тіркеме және қоларба да жататыны жеке жазылған.

Яғни сөз үйдің немесе қоршаудың жанында автомобиль қою туралы емес, көлік пен басқа заттарды қоғамдық аумақта ұзақ сақтап қою туралы болып отыр.

Ауладағы тұраққа қатысты не өзгереді?

Жаңа ережеде көпқабатты тұрғын үйлердің ауласындағы тұраққа қойылатын талаптар толық жазылған. Бұл бөлімде ешқандай өзгеріс жоқ. Барлығы бұрынғыдай қалды.

Біріншіден, аула мен қоғамдық кеңістікті абаттандыру кезінде көліктің көгалға шығуына жол бермейтін физикалық кедергі болуға тиіс. Мысалы, арнайы қоршау, баған, бордюр және т.б.

Екіншіден, аулада жеке тұрақ орнын жасап алу мақсатында бетон блок, баған, шынжыр, қоршау және басқа кедергіні өз бетінше орнатуға болмайды.

Ереже бойынша көлікті мына жерлерге қоюға тыйым салынады:

  • тротуар;
  • балалар алаңы;
  • көгал мен басқа жасыл аймақтар;
  • абаттандыру алаңы;
  • контейнерлер тұрған жер және олардың маңы;
  • көлік қоюға арналмаған басқа орындар.

Аулада бөлшектелген көлікті қалдыруға болмайды деп те жазылған.

Үйдің жанына көлік қоюға болмай ма?

Мұнда тұраққа емес, сақтауға тыйым салу туралы сөз болып отыр.
Ереже айлар бойы орнынан қозғалмай тұрып, қараусыз қалған объектіге айналған көліктерге қатысты.
Мысалы:

  • ауыр жол-көлік оқиғасынан түскен немесе дөңгелексіз машина;
  • ескі шанақ немесе бөлшектелген көлік құралы.

Мұндай жағдайды билік тұрақ ретінде емес, ортақ аумақта мүлікті сақтау деп қарастырады.

Құжатта көлік сақтау мен оны тұраққа қою арасындағы айырмашылығы анық жазылмаған.

Мысалы, мынадай жайттар түсініксіз:

  • көлік қанша уақыт қозғалыссыз тұра алады;
  • маусым сайын пайдаланатын көлікті сақтау осыған жата ма;
  • билік иесіз көлік пен уақытша тұрған көлікті қалай ажыратады.

Сондықтан тұрғындарда сұрақ туындады.
Алдағы уақытта ереже әзірлеушілер қосымша түсіндірме беретін шығар.

Қарапайым жүргізушілер үшін не өзгереді

Автомобиль техникалық тұрғыдан жарамды болып, мақсатына сай пайдаланылса, бұрынғыдай жол ережесін сақтай отырып, үйдің жанына немесе аулаға қоюға болады.

Жаңа ереже жеке үйдің немесе көпқабатты тұрғын үй кешенінің маңында көлік қоюға тыйым салмайды.
Оның үстіне үкімет қараусыз қалған және бөлшектелген көліктермен бұған дейін күресіп келген. Жаңа норма тек осы тәсілді абаттандыру ережесінде нақтылай түседі.

Сондықтан 1 шілдеден бастап Алматы тұрғындарына үйдің жанында көлік қалдыруға болмайды деп алаңдаудың қажеті жоқ. Әзірге әңгіме тек қараусыз қалған көліктер мен қоғамдық аумақты ластау мәселесі туралы болып отыр.