Алдағы бес жылда Алматыда жаңа орталықтар пайда болады, заманауи трамвай қайта іске қосылады, метро желісі ұзарады, ірі көшелердегі ғимараттардың қасбеті бірыңғай стильде болады.

Алматының болашақ келбеті туралы «Алматы бас жоспары» ғылыми-зерттеу институтының басшысы Асхат Садуов айтып берді.

Көшедегі қасбет толық жаңарады

Биыл Алматыда 170-тен астам көпқабатты тұрғын үйдің қасбеті жаңарады. Жұмысшылар қазірдің өзінде Алмалы, Бостандық және Медеу аудандарында жұмыс істеп жатыр.

Тек жолды жөндеп, оның жанындағы ескі әрі тозған үйлерді сол күйінде қалдырса, көше көрікті болып көрінбейді. Сондықтан абаттандыру жұмыстары толық жүргізіледі.

Әрлеу жұмыстарына ұзақ жылдар бойы пайдалануға жарамды материалдар, соның ішінде жергілікті әктас-қабыршақтас қолданылады. Асхат Садуов мұндай қасбет шамамен 50 жылға жарамды деді. Жөндеу жұмыстары аяқталған соң мамандар жарық орнатады.

Алматыда енді бір ғана орталық болмайды

Болашақта қала бір ғана орталықтың айналасында емес, бірнеше бағытта қатар дамиды. Жоспар бойынша бес полицентр құрылады. Бұл тұрғындардың күн сайын қаланың бір шетінен екінші шетіне қатынауын азайтуға мүмкіндік береді.

Қаланың шығыс және батыс бөліктері өзгереді.

Қаланың шығысында жаңа орталық салынады. Мұнда стадион, саябақ, жағалау, қонақүй, қоғамдық орын, университет және медициналық объектілер бой көтереді.

Батыс полицентрі «Барлық» көлік хабының айналасында қалыптасады. Мұнда метроның бірінші желісі аяқталып, LRT-ның соңғы станциясы орналасады. Сонымен қатар іскерлік аудандар, үлкен саябақ және жаңа қоғамдық орын салынады. Бұл қазіргі қала орталығына түсетін жүктемені азайтуға тиіс.

«Алматы бас жоспары» басшысының «тұрғын аудан» деген ұғым біртіндеп өткеннің еншісінде қалады.

Заманауи трамвай іске қосылады

Алматыда жеңіл рельсті көлік желісі (LRT) — заманауи трамвай салынады.
Асхат Садуов ескі трамвайдың дәуірі аяқталды деді. Жаңа жүйе ірі қалалардағыдай түйіспесіз рельстерде жұмыс істейді.

Алдағы жылдары:

  • метро «Барлық» станциясына дейін ұзарады;
  • LRT желісі салынады;
  • Талғар мен Қаскелеңге дейін скайтрейн іске қосылады;
  • метроның солтүстік желісін жаңа Алатау қаласына дейін жеткізу жоспарланып отыр.

Үшінші теміржол вокзалы салынады

Жаңа вокзал қаланың батысында, яғни ұзаратын Саин көшесі мен Боралдай трассасының маңында болады. Жаңа көлік торабы жолаушылар ағынын бөліп, Алматы-2 вокзалы мен қала орталығындағы жолдарға түсетін жүктемені азайтуға мүмкіндік береді.

Алматы мен Алатауды заманауи көлік байланыстырады

Бас жоспардың тағы бір маңызды міндеті — Алматы мен қала маңындағы елді мекендердің көлік байланысын жақсарту.

Қазір облыс тұрғындарының басым бөлігі күн сайын жұмысқа Алматыға қатынайды. Болашақта билік Алатау қаласын жаңа орталық ретінде дамытуды көздеп отыр.

Осы мақсатта Алматы мен Алатау арасында электрлі пойыздар мен скайтрейн желісі салынады. Бұл жеке көлікпен қатынайтын адамдардың санын азайтуға ықпал етеді.

Пайдалы материалдар:
Зейнетақы жинағын тұрғын үй алу үшін пайдалану: жеңілдік болмайды
Екінші пәтерге ипотека рәсімдеуге бола ма