Су тасқынына байланысты Қазақстанның он облысында төтенше жағдай жарияланды.
Бұл Абай, Ақмола, Ақтөбе, Атырау, Батыс Қазақстан, Қарағанды, Қостанай, Павлодар, Солтүстік Қазақстан және Ұлытау облыстары.

Тасқын судан қанша үй зақымданды

8 сәуірдегі жағдай мынандай:

  • 3 700-ден астам үй су астында қалды;
  • 75 000-ға жуық адам эвакуацияланды;
  • 155 жолды су шайды;
  • 58 елді мекен арасында көлік қатынасы тоқтады.

Деректер үнемі жаңарып отыр.

Өтемақы және төлемдер

Зардап шеккендер әзірге төтенше жағдай кезіндегі біржолғы әлеуметтік төлем ғана алады. Бүгінгі таңда адамдар 346 өтініш берген, бірақ бұл Ақтөбе облысындағы зардап шеккендердің аз ғана бөлігі.

Билік жергілікті бюджеттен 28 млн теңге бөлді және бұл соманы зардап шеккен 94 адамға бөліп берді.

Қираған үйлер, көліктер мен малдар үшін өтемақыға келсек, олардың мөлшерін арнайы комиссия анықтайды.

Біржолғы төлемді қалай алуға болады

Ақтөбе облысының тұрғындары өтініштерімен жергілікті әкімдікке хабарласуы керек. Өтініш беруші зақымданған мүлiктiң тiзiмін және растайтын құжат (меншiк құқығы тiркелген құжаттың көшiрмесi) береді. Өлген мал үшін төлем алу үшін ауыл шаруашылығы жануарларын сәйкестендіру жүйесінде тіркелу қажет.
Басқа аймақтардағы алгоритм әлі белгісіз, барлығы судың тартылғанын күтіп отыр.

Ақтөбе облысында шығынды есептеу комиссиясы өз жұмысын бастады. Олар үйлерді тексеріп, сомасын есептеп жатыр.

Әйтеке би, Қобда, Мұғалжар және Темір ауылдарының тұрғындарынан 2 мыңнан астам өтініш түскен. Басқа аудандарда су деңгейі жоғары болуына байланысты комиссия жұмысын бастай алмай отыр.

Кім өтемақы алады

Зардап шеккен барлық тұрғын, кәсіпкер өтемақы алады. Үй мен бау-бақшадан бөлек, жүздеген коммерциялық нысандар (дүкен, кафе) мен кәсіпорындар, егістік, техника, көлік су астында қалды, малдар қырылды.

Өтемақы тәуелсіз бағалау нәтижесі бойынша төлене бастайды. Премьер-министрдің айтуынша төлем келген зақымға мөлшерлес болады.

Үйлерді кім жөндейді

Мемлекет су тасқынынан қирап қалған үйді жөндеп береді.
— Үкіметке жаңа үй салу немесе қалпына келтіру бойынша арнайы жоспар дайындауды тапсырдым, — деді Қасым-Жомарт Тоқаев 6 сәуірде халыққа үндеуінде.

Бірақ комиссияның шешімін күту керек: кейбір үйді қалпына келтіруге болады, ал басқаларын жөндеу орынсыз.

Үйді жөндеу жаңасын салудан қымбат болса, зардап шеккендерге жаңа баспана салынуы әбден мүмкін.

Су бұдан да көп болады

Судың қайтатын түрі жоқ. Алдағы екі-үш аптада су тасқынының жаңа легі күтілуде.

Батыс Қазақстан облысына қауіп төніп тұр.
«Қазгидромет» болжамы бойынша Жайық өзені бойымен су тасқыны болуы мүмкін.

Таяуда Солтүстік Қазақстан облысында су тасқыны жоғары деңгейге жетеді деп күтілуде. Есіл өзеніндегі су деңгейінің көтерілуіне байланысты тұрғындарды ертерек көшіру басталды.
300-ге жуық елді мекенге қауіп төніп тұр.

Су тасқынынан зардап шеккен барлық аймақта жедел желі жұмыс істейді:
— Абай облысының ТЖД — 8 722 2 35 38 31;
— Ақмола облысының ТЖД — 8 716 2 52 55 14;
— Ақтөбе облысының ТЖД — 8 713 2 54 86 57;
— Атырау облысының ТЖД — 8 712 2 45 41 47, 8 712 2 45 07 00;
— Батыс Қазақстан облысының ТЖД — 8 711 2 55 40 88;
— Қарағанды ​​облысының ТЖД — 8 721 2 51 72 23;
— Қостанай облысының ТЖД — 8 714 2 50 19 60;
— Қызылорда облысының ТЖД — 8 724 2 24 41 61;
— Солтүстік Қазақстан облысының ТЖД — 8 715 2 52 25 29.