Астанада кезекте тұрған кейбір азамат құжаттарын шұғыл түрде жаңартқаны жөн. Жаңартпаса, тұрғын үй кезегінен шығып қалуы ықтимал.
Қала әкімдігінің мәліметінше құжат жаңарту процесі жыл сайынғы түгендеу жұмыстары аясында жүзеге асады.

Құжаттарды не үшін жаңарту керек

Кезекте тұрғандарға қатысты мәлімет өзекті болуға тиіс. Себебі кейбір адамның отбасылық жағдайы өзгерді, балалы болды немесе баспана алды.
Мысалы, кезекте тұрған жалғызбасты ана тұрмысқа шықса, толық отбасы деп есептеледі. Бұл есептен шығаруға негіз болады.
Кезекте тұрған адам тұрғын үй иесі атанса (пәтер немесе үйдегі үлесті мұра ретінде иеленсе, сыйлыққа немесе сатып алса) кезектен шығады.

Кім құжат жаңартады

Екі категория бойынша кезекте тұрған астаналықтар:

  • әлеуметтік осал топтар,
  • көп балалы отбасылар.

Құжаттарды 2025 жылғы 30 сәуірге дейін жаңарту керек.

Қандай құжаттарды жаңарту қажет

Жарамды электрондық цифрлы қолтаңбаңызды (ЭЦҚ) дайындаңыз. birge. astana. kz сайтындағы жеке кабинетке кіріңіз.

Мына құжаттарды жаңартыңыз:

  • Жылжымайтын мүлік бар/жоғы туралы анықтама (eGov. kz сайтында).

Анықтама өтініш беруші мен оның барлық отбасы мүшесіне тіркеледі. Анықтаманы құжат жаңартатын күні алу керек. Басқа күні алса, жарамайды.

Мынадай құжаттардың скан-көшірмесі қажет:

  • Өтініш берушінің мүгедектігін растайтын анықтама.

Отбасы мүшесіне кіретін азаматтардың мүгедектігін растайтын анықтама да (бар болса) керек.

  • Жеке куәлік, балалардың туу туралы куәлігі немесе әкелік құқықты белгілеу туралы куәлік (бар болса).
  • Некеге тұру/бұзу туралы куәлік.
  • Жылжымайтын мүлікке меншік құқығын растайтын құжаттар (сатып алу-сату, сыйға тарту, айырбастау, жекешелендіру, мұрагерлік құқығы туралы куәлік және т. б. шарттардың көшірмесі). Бұл құжат жаңадан меншік құқығы пайда болған жағдайда немесе тұрғын үй жағдайын жақсартуға өтініш берген, тұрғын үйде үлесі немесе жатақханада бөлмесі бар кісілерге қажет.

Әрекет етуге қабілеті жоқ деп танылған азаматтың қамқоршысы құжаттарды онлайн жаңарта алмайды. Олар құжаттарды Астана қаласының Тұрғын үй және тұрғын үй инспекциясы басқармасының кеңсесіне жеке апарып тапсыруға тиіс. Мекенжайы: Республика даңғылы, 32.

Кім пәтерді тегін жекешелендіре алады және оны қалай жасауға болады

Krisha.kz материалын пайдаланғанда бірінші абзацта міндетті түрде сілтеме болуы керек!