Мөлшерлемесі 6 % болатын «Қарағанды жастары» ипотекасы бойынша өтінім қабылдау 15 сәуірде басталады. Бағдарламаға Қарағанды, Теміртау және Саран қалаларында тұратын және жасы 35-тен аспаған жастар қатыса алады. Бағдарлама операторы — Отбасы банк.

Қарағанды тұрғындары 15–18 сәуір аралығында өтінім береді, Теміртау мен Саранда процесс 23 сәуірге дейін жалғасады.

Бағдарлама шарттары

  • Бастапқы жарна — 10 %.
  • Мөлшерлеме — 6 %.
  • Мерзімі — 19 жыл.
  • Ең жоғары сома — 20 млн теңге.

Бірінші немесе екінші нарықтан үй (1974 жылдан кейін салынған) таңдай аласыз.

Отбасы банктің фронт-офистерінде өтінім беруге болады.

Бағдарламаның негізгі талаптары

Бағдарлама жұмыс істейтін жастарға арналған. Сондықтан қатысушының жасы 35-тен аспауы керек.

Екі маңызды талап бар:

  1. Өтінім беруші немесе оның жұбайының атында соңғы 5 жылда Қазақстанда тұрғын үй болмауға тиіс.
  2. Аймақтағы ресми жұмыс өтілі — кемінде 1 жыл.

Кім өтінім бере алады

Бағдарламаға мынадай саладағы қызметкерлер қатыса алады:

  • білім беру,
  • денсаулық сақтау,
  • мәдениет,
  • спорт,
  • әлеуметтік жұмыс және коммуналдық қызмет саласы,
  • «Қазпошта» және ТЖД қызметкерлері,
  • әлеуметтік осал топтар,

Жұмысшы мамандық иелері де қатыса алады. Мамандықтар тізімі «Наурыз жұмыскер» ипотекасымен бірдей.
Мамандықтар тізімі

Қанша төлеу керек

20 млн теңгені ең ұзақ мерзімге, яғни 19 жылға алсаңыз:

  • алғашқы 8 жыл бойы — ай сайын 184 мың теңге;
  • келесі 11 жыл ай сайын 91 мың теңге төлейсіз.

Қатысушының табысына қойылатын талап отбасындағы адам санына байланысты.

Отбасындағы адам саны

Минимал айлық табысы

Бойдақ, баласы жоқ

221 000 теңге

Екі баласы бар отбасы

370 000 теңге (ерлі-зайыптылардың ортақ табысы)

Мемлекет бағдарлама үшін бюджеттен 1 млрд теңге бөлді, Отбасы банк 500 млн теңге қосты.

Krisha.kz материалын пайдаланғанда бірінші абзацта міндетті түрде сілтеме болуы керек!