Назар аударыңыз!

Жылжымайтын мүлік нарығында алаяқ өте көп. Олардан қорғанудың жалғыз жолы бар. Пәтерді көрмей, құжатын тексермей және келісімшартқа қол қоймай тұрып ешқашан, ешкімге алдын ала ақша («брондау», «кепілақы» немесе қандай да бір төлем) жібермеңіз.

МҮЛДЕ!

Krisha.kz негізгі қауіпсіздік ережелерін еске салады.

«Брондау» ақысын сұрайды

Алаяқтың басты мақсаты — сатып алушыдан немесе жалға алушыдан ақша алу. Бірі клиенттің жаны ашысын деп әртүрлі әрекетке барады, бірі нарықтан мұндай нұсқа таппайсыз дейді.

Сценарий көп, бірақ негізгі ой әрдайым бір — ақша сұрау: кепілақы, алдын ала төлем, брондау. Сенімді көріну үшін бөтен біреудің құжаттарын, пәтердің фотосын және видеоларын жібереді.

  • Бейтаныс адам қаражат сізге ғана қолжетімді болады десе де, ешқашан ақша аудармаңыз.
  • Құжаттарды (фотосын немесе көшірмесін емес, түпнұсқасын) мұқият тексеріңіз. Күмәндансаңыз заңгерге жүгініңіз. Адал жалға беруші немесе сатушы бұған қарсы болмайды.

Көбіне алаяқтар пәтердің бағасын нарықтағы ұқсас нұсқалардан 20–30 % арзан қояды. Сондықтан өте тиімді ұсыныс көрсеңіз, аса сақ болыңыз!

Пәтер жалға алғанда келісімшартқа қол қойып, содан кейін ғана төлем жасаңыз.

Өзін риелтормын деп таныстырады

Ақпарат беретін агенттіктер риелтормын деп жұмыс істейді. Келісімшартқа тек ақпарат береміз деп жазады, сондықтан іс жүзінде алаяқ емес. Бірақ клиенттеріне тегін хабарландырулардың тізімін 10–40 мың теңгеге сатады.

Қосымша ақыға пәтер иелері ұсынатын тиімді хабарландырулар бар чаттарға қосамыз немесе «құпия» хабарландырулар базасын береміз дейді.
Сенбеңіз! Бұл — өтірік!

Риелторға жүгінсеңіз, келісімшартты мұқият оқыңыз.
Онда маман сіздің талаптарыңызға (бағасы, ауданы, орналасқан жері және т. б. параметрлер келісімшартта жазылады) сай жылжымайтын мүлік табуға көмектесетінін жазуға тиіс.

Мәміле жасағаннан кейін ғана маман қызмет көрсеткен болады!

Риелтор:
— жалға алғанда — тек көшіп барғаннан кейін;
— сатып алғанда сатып алу-сату келісімшартын тіркегеннен кейін сыйақы алады.

Басқа адамның пәтерін жалға береді

Қылмыскерлердің тағы бір схемасы — басқа адамның үйін жалға беру. Алаяқ пәтерді тәулігіне жалға алады, оны өзінікі сияқты көрсетеді. Бос емеспін немесе қиын жағдайға тап болдым деп сылтауратып, құжат көрсету және келісімшартқа қол қою процесін кейінге қалдырады.
Алдын ала төлем немесе толық сома алып, кілтті береді немесе сіз көшіп келетін күн туралы келіскендей болып, жоғалып кетеді. Алданған кісі пәтер мүлде басқа адамға тиесілі екенін кейін біледі.

Қалай тексеруге болады?

Жалға берушіден мына құжаттардың түпнұсқасын (көшірме немесе фото емес) сұраңыз:
— жеке куәлік;
— жылжымайтын мүліктің құжаты (сатып алу-сату келісімшарты, айырбас, сыйға тарту, жекешелендіру немесе мұрагерлік құқығы туралы куәлік болуы мүмкін).

Иесі жөнінде ақпарат жазылған соңғы анықтаманы талап етіңіз.

Пәтер иесі брондау ақысын немесе кепілақы аударуды талап етсе немесе агенттік алдымен келісімшартқа отырып, базаға қосу үшін төлем сұраса, бізге хабарлаңыз. Ол үшін хабарландырудың астындағы «Хабарландыруға шағымдану» батырмасын басыңыз.