Қай жаста ипотека рәсімдеген тиімді және неге? Өтініш берушінің жасы банк шешіміне әсер ете ме?

Банк кімге ипотека береді

Біздің елде 18 жасқа келгенде ипотека рәсімдеуге болады. Дегенмен кей қаржы ұйымы 21 жастан бастап кредит береді.

Банк өтінішті мақұлдау үшін азаматтың еңбек өтілі кем дегенде бір жыл болуы керек. Сол себепті кәмелетке тола салып, кредитке баспана алуыңыз екіталай.

Коммерциялық ипотеканың жайы басқа болуы мүмкін.

Қазақстанда жастарға арналған бірнеше бағдарлама бар. Оған қатысатындардың жасы 35-тен аспауға тиіс.

Қарыз алушының максимал жасы зейнетке шығатын уақытпен шектеледі. Яғни, зейнеткердің өтініші көп жағдайда мақұлданбайды. Бірақ табысы жетіп жатса, егде жаста да ипотека алуға болады.

Қарыз алған тұрғын оны толық жабатын кезде банк шартына байланысты 65-68-де болуы керек. Сол себепті несие өте қысқа мерзімге рәсімделеді.

Банк не себепті несие беруден бас тартуы мүмкін

Өтінішті қарағанда банк үміткердің табысы мен несие тарихына баса мән береді.

1. Табыс деңгейі.
Банк өтініш берушінің төлем қабілетін: ресми жұмысы (міндетті түрде зейнетақы қорына ақша аударылуы керек), қосымша кірісі бар-жоғын анықтайды. Қарыз алушы некеде болса, отбасының жалпы табысын есепке алады.

Сондықтан тым жас немесе зейнет жасына таяп қалған адамның ипотека алу мүмкіндігі төмен.
20 жаста тұрақты жұмыс істеп, ипотека төлеуге жететін табыс табу оңай емес. Ал 60-тан асқан кісінің тұрақты табысы күрт кеміп, зейнетақысын қанағат етуі ықтимал.

2. Несие тарихы.
Банк оны Бірінші кредиттік бюродан алады. Өміріңізде бір-ақ рет несие алсаңыз да, ол базада сақталады. Банк үшін бүкіл несие уақытылы, кешіктірмей төленгені маңызды.

Егер басқа кредитті 90 күннен аса кешіктіріп төлесеңіз, ипотека ала алмайсыз.

Банк жауабына төлеп жатқан кредитіңіз де ықпал етеді. Ипотека — қалтаға кәдімгідей салмақ салатын жүктеме.
Сіз ай сайын банктерге беріп отырған жалпы төлем сомасы айлық табысыңыздың жартысынан аспауға тиіс.

Ипотека алсам деп өтініш бермес бұрын басқасынан құтылған абзал. Сонда тұрғын үй қарызын алуға мүмкіндік артады.

Несие тарихын жақсарту үшін алдымен бүкіл қарызды жауып, несие тарихын тексеріп алған жөн.

Ипотеканы қашан алған дұрыс

Бірінші кредиттік бюро берген мәліметке сүйенсек, оны әдетте 31-40 жас аралығындағы азаматтар рәсімдейді. Бүкіл қарыздың 40 %-ы солардың үлесінде екен. Тағы 20 %-ы — 30-ға толмағандар.

Сарапшылардың пікрінше ипотека алу үшін ең ыңғайлы жас — 25-тен 40-қа дейінгі аралық.

Дәл осы кезеңде қарыз алушының табысы тұрақты әрі барынша жоғары болады. Ипотека көтере алмайтын тым ауыр жүкке айналмайды.

Оның үстіне еңбек өтілі біршама ұзақ, ресми қызмет ететін азамат зейнетақы қорына ақша құйып отырғандықтан, қордағы қаражаттың бір бөлігін төлем жасау үшін жұмсай алады.