Жылжымайтын мүлікті жылдам сату үшін пайдалы лайфхактар дайындадық. Кеңестеріміз пәтеріңізді тартымды етуге көмектеседі.

Ипотекамен алатындардың бетін қайтармаңыз.

Қазір нарықта сауданың жартысы (Астана мен Алматыда көбірек) ипотекамен жасалады. Сондықтан пәтерді ипотека арқылы тезірек сатуға болады.

Біріншіден, хабарландыруда ипотека туралы жазу керек. Осылайша хабарландырудың қаралым саны өседі, өйткені сатып алушылар сайттағы баптамалар арқылы несиеге алуға болатын үй іздейді.

Екіншіден, пәтерді қайта жоспарлау заңды түрде рәсімделмесе, ипотекамен сатуға келмейді және сату екі есе қиындайды. Үйіңізді тезірек сатқыңыз келсе барлық өзгертуді заңдастырыңыз немесе қайта қалпына келтіріңіз.

Артық заттарды лақтырыңыз.

Қоқырсып жатқан пәтер кішкентай және қараңғы сияқты көрінеді. Үйді саудаға шығармастан артық заттардан босатыңыз. Балкондағы, зат қоятын бөлмедегі, барлық шкафтағы заттарды жинаңыз. Пайдаланбайтын заттардың бәрін тастаңыз.

Пәтерді жиһазсыз сататын болсаңыз керек еместерін сатып жіберіңіз.

Үйдің іші кеңірек болады, ал ашық кеңістік сатушыға жақсы жағынан көмектеседі, өйткені сатып алушы бос бөлмені көріп, өзінің жиһаздарымен елестете алады.

Жеке заттарды жинаңыз.

Сатушы сол үйде тұрып жатса жеке заттарды жинау қиынға соғады. Бірақ сатып алушы көрмеуі тиіс нәрселер бар.

Оған:
— діни заттар;
— суреттер, фотосуреттер немесе мүсіншелер;
— хоббиға қатысты заттар (қару немесе жануар тұлыбы) кіреді.

Көз түсетін ақауды жойыңыз.

Сатушылардың өте көп жасайтын қателігі — пәтерді дайындамай саудаға шығару. Пәтердің жағдайы өте жақсы, жөндеу жұмыстары жасалған жағдайда ғана солай істеуге болады. Басқа кездері оны көрсетуге дайындау керек, әйтпесе клиентке ұнамауы мүмкін немесе бағасын түсіру керек болады.

Ең алдымен төбедегі дақтар, жыртылған түсқағаздар және т.с.с. көрінетін ақауды ретке келтіріңіз.

Пәтерді жөндеуге көп ақша жұмсаудың қажеті жоқ, тек керек жерлерді жасау жеткілікті. Жұпыны көрінетін түсқағаздарды ауыстырыңыз, дақтардың орнын бояңыз, есіктер шиқылдамайтындай, тұтқалары салбырамайтындай жөндеңіз.

Сантехника.

Сатып алушы сантехникаға аса назар аударады. Сол үшін шүмектер, унитаз жұмыс істеп тұру керек.

Тағы бір маңызды жайт — сырт келбеті. Барлығы таза, дақтың іздері мен жұғын болмауы керек. Үйдің болашақ иелері келместен бұрын жақсылап тазалап қойыңыз.

Бұл құбырлар мен жылу радиаторларына да қатысты, тамшылап тұрған және шытынаған жерлері болмасын.

Құжаттарды дайындаңыз.

Пәтер құжаттарының дұрыс болуы өте маңызды. Біріншіден, үй көруге келген сатып алушыда сенімділік пайда болады. Екіншіден, рәсімдеуге бірден көшуге болады, өйткені кейбір клиент күткісі келмейді.

Сатушыда құқық белгілейтін құжаттар (сатып алу-сату, айырбас, сыйға тарту, жекешелендiру келісімшарты, мұрагерлік туралы куәлік, сот шешімі және т.б.) және пәтердің техникалық құжаты болуға тиіс. Құжатта қолмен түзетілген жерлер болмай, барлық мәлімет пәтердің сипаттамасымен сәйкес келуі керек.

Жеке куәліктің мерзімін міндетті түрде тексеріңіз, үйдің ортақ иелері болса, олардың да құжаттарын қарап шығыңыз.

Құжаттың мерзімі өткен болса мәміле жасау мүмкін емес.

Коммуналдық қызмет ақысын төлеңіз.

Коммуналдық қызмет ақысы төленбеген болса сатып алушы үйді сатып алудан айнып қалуы мүмкін.

Төлем түбіртектері пәтерді көрсету кезінде жаныңызда болу керек. Клиентке ай сайынғы төлемдер қаншаға шығатыны қызық.

Үйді тазалап қойыңыз.

Терезенің, еденнің, плиткалардың және сантехниканың тазалығы бірден көзге түседі. Пәтер сатып алушы үшін жарық, кең және тартымды болады.

Мұқият тазалағаннан кейін пәтердің сырт келбеті ғана емес, иісі де өзгереді, бұл мәміленің сәтті аяқталуы үшін маңызды.

Мәміле жасауға хабарландырудың сипаттамасы мен суреттері өте қатты әсер етеді.

Суретке жақсылап түсіріп, пәтердің толық сипаттамасын және маңызды параметрлерін көрсетіңіз.

Сайттағы хабарландыруға жарнама жасау туралы ұмытпаңыз.