Коммерциялық банктен алынған ипотеканы Отбасы банкте қайта қаржыландыруға бола ма? Бұл не үшін қажет екенін айтып береміз.

Қазір Қазақстанда ипотека бойынша пайыздық мөлшерлеме қандай

Екінші деңгейлі банктерде ипотеканың орташа мөлшерлемесі — 17.5-19.5 %, ал Отбасы банкте — 3.5-10 %.

Отбасы банк — тұрғын үй құрылыс жинақ жүйесі бойынша жұмыс істейтін мемлекеттік банк. Яғни, бірден несие ала алмайсыз. Алдымен депозит ашып, тұрғын үй құнының кемінде 50 %-ын жинау керек. Коммерциялық банктерде 20 % немесе одан аз (мысалы, құрылысшылармен серіктестік бағдарламалар) бастапқы жарнаның болғаны жеткілікті.

Мөлшерлеме төмен болғанымен жинақ мерзімінің ұзақтығы мен бастапқы жарнаның жоғары болуы көпшілікті ойландырады.

Екінші деңгейлі банкте рәсімделген ипотеканы Отбасы банкке аударса ше? Осылайша несие мөлшерлемесі мен артық төлем азаяды.

Ипотеканы екінші деңгейлі банктен Отбасы банкке аударуға бола ма?

Krisha.kz зерттеуі бойынша Қазақстандағы кез келген екінші деңгейлі банктен алынған ипотеканы Отбасы банкте қайта қаржыландыруға болады.
Несие жақында алынған немесе қарыздың көп бөлігі төленген болсын, маңызды емес.

Қайта қаржыландыру — тиімді шарттары бар жаңа келісімшарт жасау арқылы ағымдағы несие келісімшартын өзгерту.

Бұл қалай жұмыс істейді? Отбасы банк жаңа несие беріп, ескі ипотеканы толық жабады. Содан кейін қарыз алушы Отбасы банк мөлшерлемесі бойынша ипотеканы төлеуді жалғастырады.

Ипотеканы Отбасы банкте қалай қайта қаржыландыруға болады?

Ипотеканы Отбасы банкте қайта қаржыландыру үшін белгілі бір шартты орындау қажет.
Банк тұрғын үй құрылыс жинақ жүйесі бойынша жұмыс істейді.

Бұл дегеніміз, қарыз алушы:

  • Банк салымшысы болуы керек, яғни Отбасы банкте депозиті болуы қажет.
  • Ескі ипотека бойынша негізгі қарыздың өтелмеген сомасының кемінде 50 %-ын депозитте жинауы керек.

Бұл жерде жалпы қарыз сомасы мен негізгі қарыз қалдығын шатастырмаған жөн.

Жалпы қарыз сомасынан банк сыйақысын алып тастау керек, сонда несие бойынша негізгі қарыздың қалдығы шығады. Барлық сома бойынша үзінді көшірмені ипотека рәсімделген банктің несие бөлімінен алуға болады. Сондай-ақ ол кейбір екінші деңгейлі банктің мобильді қосымшасында бар.

Мысал: ипотека бойынша 10 млн теңге қарыз қалса, депозитте кемінде 5 млн теңге болуы керек.

Кеңес: депозиттегі ақшаны бірнеше жыл жинап қана қоймай, зейнетақы жинағын (өзіңіздің немесе туыстарыңыздың) қолдануға, депозиттерді біріктіруге немесе жетпейтін соманы бірден салуға болады.

Отбасы банкте тез ақша жинау жолдары

Қайта қаржыландыруды рәсімдемес бұрын Отбасы банк қарыз алушының төлем қабілеттілігін тексеріп, кепілдегі пәтер құжаттарының көшірмесін сұрайды — пәтер банк талаптарына сай болуға тиіс.

Ипотеканы Отбасы банкке қалай аударуға болады

Отбасы банкке барып кеңес алыңыз.
Несиеңізді қайта қаржыландыру мүмкін болса, ипотека рәсімделген банкке өтінім беріңіз.

Ипотека келісімшартын қарап шығыңыз. Онда несиені қай кезде (мысалы, келісімшарт рәсімдегеннен кейін кемінде бір жылдан соң) және қандай жағдайда (мысалы, төлемді кешіктірмегенде) қайта қаржыландыруға болатыны жазылған.

Банктен қайта кепілге тіркеу келісімін алыңыз — бұл несие бойынша қарызды өтегеннен кейін банк ипотекаға алынған пәтерден кепілдік ауыртпалықты алып тастайтынын көрсететін ресми хат.

Хатта мыналар көрсетілуі керек:

  • келісімшарт нөмірі мен қарыз алушының деректері;
  • несие бойынша қарыз сомасы;
  • қаражатты аудару үшін шот деректемесі.

Ипотека беруші банк несие жабылғаннан кейін пәтерге меншік құқығын растайтын құжаттардың түпнұсқасын Отбасы банктің өкіліне тапсыруы керек.

Ипотеканы Отбасы банкте қайта қаржыландыру тиімді ме?

Бұл сұраққа жауап беру үшін біз Отбасы банк қызметкерлерінен әріптесіміздің ипотекасын есептеп беруді сұрадық. Жақында нәтижесін жариялаймыз.
Бірақ алдын ала айтарымыз: ипотеканы мерзімнің жартысында қайта қаржыландырудың өзі артық төлемді бірнеше миллионға азайтады.