Қазақстандағы ипотека – барлық банктің шарттары

Барлық банктің қазіргі шарттарын жинадық: мөлшерлеме, бастапқы жарна, несие мерзімі, сондай-ақ пәтер мен үйге қойылатын талаптар.

Қай банктер ипотека береді

Қазір он банкте ипотека рәсімдеуге болады:

• Отбасы банк,
• Altyn Bank,
• Alatau City Bank,
• Halyk Bank,
• Нұрбанк,
• Банк ЦентрКредит,
• Bereke Bank,
• ForteBank,
• Freedom Bank,
• Bank RBK.

Қазақстанда қандай ипотека бар

Қазір банктер ипотеканың бірнеше түрін ұсынады.

• Стандарт — банк беретін сомаға пайыз қосады, сатып алынатын баспана кепіл болады. Орташа мөлшерлеме — 20%, бастапқы жарна 20%-дан басталады.
• Серіктестік — серіктес құрылыс салушылардың жаңа үйлеріндегі пәтер. Таңдау шектеулі, есесіне мөлшерлемесі стандарт ипотекадан төмен — 0.1%-дан басталады.
• Кепілге ақша қою — ақша депозитке салынып, несиеге кепіл болады. Бұл жағдайда мөлшерлеме төмен, бірақ пайыз баспананың толық құнына қосылады.
• Жинақ — алдымен депозитте ақша жинау керек. Жинақ көлемі неғұрлым көп және бағалау көрсеткіші жоғары болған сайын, мөлшерлеме төмендейді. Бұл жүйе бойынша Отбасы банк және кейбір екінші деңгейлі банк жұмыс істейді.

Ипотека шарттары — 2026 жылдың күзі

Банк	Екінші нарық: мөлшерлеме	Жаңа құрылыс: мөлшерлеме	БЖ
Altyn Bank	21–22.3%	0.1–18.5%	20%-дан бастап
Halyk Bank	19.5–24%	0.1–18%	20%-дан бастап
Нұрбанк	20–22.2%	16.9%	20%-дан бастап
ForteBank	21.5%	1–17.2%	15%-дан бастап
Банк ЦентрКредит	19.5–22.15%	20.5–22.3%	20%-дан бастап
Freedom Bank	22–24%	0.1–24%	20%-дан бастап
Bereke Bank	21.7%	13.9%	20%-дан бастап
Alatau City Bank	Кредит бермейді	16.25%	20%-дан бастап
Bank RBK	22–22.4%	1.6–19.8%	20%-дан бастап
Отбасы банк	3.5–8.5%	3.5–8.5%	50%-дан бастап

Altyn Bank

Екінші нарық
Мөлшерлеме — 21–22.3%, ол бастапқы жарна көлемі мен несие мерзіміне байланысты. 10 жылға дейінгі мерзімде мөлшерлеме 22.3%, 10 жылдан ұзақ мерзімге — 21%.
Баспана 1976 жылдан кейін салынған болуы керек. Каркас-қамыс және саман үйлерден басқа, әртүрлі материалдан салынған үйлер жарамды.

Жаңа құрылыс
Серіктестік ипотека: мөлшерлеме — 0.1–18.5%, бастапқы жарна — 20%, мерзімі — 20 жылға дейін. Шарттар тұрғын үй кешені мен несие мерзіміне байланысты.

Halyk Bank

Екінші нарық
Цифрлық ипотека: мөлшерлеме — 1% комиссиямен 19.5–22.5% немесе комиссиясыз 22–24%, бастапқы жарна — 20%, мерзімі — 20 жылға дейін.
Пәтер үйдің салынған жылы мен материалына қойылатын талаптарға сай болуы керек: кірпіш үй — 1960 жылдан кейін, панель үй — 1965 жылдан кейін, ағаш үй — 2000 жылдан кейін.
Halyk Sale бағдарламасы да жұмыс істейді. Банктің кепілінде тұрған пәтер мен үйді ипотекаға алуға болады. Оларды halykzalog.kz сайтынан көруге болады. Несие шарттары нақты объектіге байланысты.
Shanyraq жинақ ипотекасы да бар. Тұрғын үй қарызын алу үшін депозит ашып, кемінде үш жыл ақша жинап, баспана құнының 50%-ын жинау және бағалау көрсеткішін 16-ға жеткізу қажет.
Депозит мөлшерлемесі — жылына 2%. Талаптар орындалғаннан кейін тұрғын үй қарызын 5%-дан бастап, 20 жылға рәсімдеуге болады. Жаңа үйден де, екінші нарықтан да баспана сатып алуға болады.

Жаңа құрылыс
Салынып жатқан баспанаға арналған серіктестік бағдарлама: мөлшерлеме — 0.1–18%, бастапқы жарна 20%-дан басталады. Шарттар құрылыс салушы мен тұрғын үй кешеніне байланысты.

Нұрбанк

Екінші нарық
Мөлшерлеме — 20–22.2%, бастапқы жарна — 20%, мерзімі — 20 жылға дейін. Жер үй үшін бастапқы жарна 30%-дан басталады.
Банк 1976 жылдан кейін салынған баспананы несиеге береді. Кірпіш және монолит үйлер, сондай-ақ газоблоктан салынған үйлер жарамды.
Банктің кепілдегі мүлкіне арналған «Нұр Шаңырақ» ипотекасы да бар. Мөлшерлеме — 13–18.3%, бастапқы жарна — 10%, мерзімі — 20 жылға дейін. Объектілер банктің каталогында бар.

Жаңа құрылыс
Серіктестік ипотека — 16.9%, бастапқы жарна — 20%, мерзімі — 20 жылға дейін. Бағдарлама банк серіктестерінің тұрғын үй кешендеріндегі белгілі бір пәтерлерге арналған.

ForteBank

Екінші нарық
Стандарт ипотека: мөлшерлеме — 21.5%, бастапқы жарна — 15%, мерзімі — 15 жылға дейін.
Ақшаны кепілге қойып ипотека алуға болады. Несие толық өтелгенге дейін ақша банктегі депозитте сақталады, ал пайыз пәтердің толық құнына қосылады.

Банкке неғұрлым көп қаражат салсаңыз, мөлшерлеме соғұрлым төмен болады:

• 20% — 16.5%;
• 30% — 15%;
• 40% — 12.5%;
• 50% — 11%;
• 60% — 10%;
• 70% — 8%.

Банк 1965 жылдан кейін салынған, жөнделген немесе әрленген үйді несиеге береді. Қара сылақпен әрленген жаңа үй 2000 жылдан кейін салынған болуы керек.

Жаңа құрылыс
BI Group-пен бірлескен серіктестік бағдарлама. Бастапқы жарна 20% болса, мөлшерлеме 1—17.2%-дан, ал бастапқы жарна 50% болса 16%-дан басталады. Несие мерзімі — 15 жылға дейін.

Банк ЦентрКредит

Екінші нарық
Ипотека: мөлшерлеме — 20.5–21.8%, бастапқы жарна — 20%, мерзімі — 15 жылға дейін. Комиссия — несие сомасының 2%-ы.
«Ипотека Плюс»: мөлшерлеме — 19.5–22.15%, бастапқы жарна — 20%, мерзімі — 15 жылға дейін. Комиссия жоқ, бірақ сақтандыру қажет.
Ақшаны кепілге қоюға болатын JAÑA ипотекасы бар. Бастапқы жарна орнына баспана құнының 20%-ы депозитке салынады. Ипотека пәтердің толық құнына беріледі.
Мөлшерлеме бастапқы жарна көлеміне байланысты:

• 20% — 16%;
• 50% — 10.5%;
• 70% — 7.5%;
• банк арқылы жалақы алатын клиенттерге бастапқы жарна 70% болса — 5%.

Қазір тек пәтер несиеге беріледі, жер үйлерге ипотека беру тоқтаған.
Үйдің салынған жылына қойылатын талап мынадай: қаладағы кірпіш, монолит және панель үйлер — 1960 жылдан, қала маңындағы үйлер 1974 жылдан кейін салынған болуы керек.
Жинақ ипотекасы да бар. Депозитті кемінде алты ай толтырып, баспана құнының кемінде 20%-ын жинау керек. Одан кейін скорингтен өтіп, ипотеканы рәсімдеуге болады.
Бұл бағдарламалар арқылы бірінші нарықтан да баспана сатып алуға болады, бірақ тек пайдалануға берілген тұрғын үй кешенінен болуы қажет.

Жаңа құрылыс
Ипотека құрылыс салушы-серіктестердің тұрғын үй кешендеріндегі пәтерлерге беріледі. Пайдалануға берілген де, үлестік қатысу шарты (ДДУ) бойынша салынып жатқан тұрғын үйді де несиеге алуға болады.
Мөлшерлеме — 20.5–22.3%, бастапқы жарна — 20%, мерзімі — 15 жылға дейін. Нақты шарттар объектіге байланысты.

Freedom Bank

Екінші нарық
Стандарт ипотека: мөлшерлеме — 22–24%, бастапқы жарна — 20%, мерзімі — 20 жылға дейін. Тек пәтер несиеге беріледі. Жер үй мен жатақханадағы бөлме несиеге берілмейді. Баспана қалада болуы керек. Тағы бір талап — пәтердің ауданы кемінде 29 шаршы метр, ал үйдің салынған жылы 1965 жылдан ерте болмауы қажет.

Жаңа құрылыс
Стандарт ипотека: мөлшерлеме — 24%, бастапқы жарна — 20%, мерзімі — 20 жылға дейін.
Каскадты ипотека: мөлшерлеме несие мерзімі ішінде өзгереді — алдымен төмен болып, кейін көтеріледі. Ең төменгі мөлшерлеме — 12.5%, ең жоғарғысы — 24%.

• Бастапқы жарна 20% болса, алғашқы үш жылда мөлшерлеме 17%, төртінші және бесінші жылдары — 18%, одан кейін — 24%.
• Бастапқы жарна 50% және одан жоғары болса, алғашқы үш жылда — 15.5%, төртінші және бесінші жылдары — 16.5%, одан кейін — 23%.

Мерзімі — 20 жылға дейін.
Несие мерзімі қысқарған сайын мөлшерлеме де төмендейді.
Банктің серіктес құрылыс салушылары ұсынатын жаңа үйден пәтер таңдауға болады.
Жинақ ипотекасы: мөлшерлеме — 15.5%, кейін 10%-ға дейін төмендейді. Бастапқы жарна — 30%, мерзімі — 20 жылға дейін. Бастапқы жарна 7% мөлшерлемемен депозитте сақталады, депозиттің ашылғанына кемінде үш жыл болуға тиіс. Осы уақыт ішінде баспана құнының кемінде 50%-ын жинау керек. Ай сайынғы төлем бір мезгілде пайызды өтеуге және депозитті толтыруға жұмсалады. 50% жиналғаннан кейін мөлшерлеме төмендеп, депозиттегі ақша несиенің бір бөлігін өтеуге жұмсалады. Бұл бағдарлама арқылы тек BI Group-тың тұрғын үй кешендерінен пәтер сатып алуға болады.

Bereke Bank

Екінші нарық
Қарапайым ипотека пәтерге, жер үйге және таунхаусқа беріледі.
Мөлшерлеме — 21.7%, бастапқы жарна — 20%, мерзімі — 15 жылға дейін.
Пәтер 1960 жылдан ерте салынбауы керек, ауданы — кемінде 20 шаршы метр. Жер үй — 1970 жыл, таунхаус 2010 жылдан кейін салынған болуы керек.

Жаңа құрылыс
Ақшаны кепілге қоюға болатын ипотека бар. Қаражаттың 20 немесе 30%-ын банк депозитіне несие мерзімі аяқталғанға немесе несиені мерзімінен бұрын толық өтегенге дейін салу керек.
Мөлшерлеме бастапқы жарна 30% болғанда — 13.9%, мерзімі — 15 жылға дейін.
Бағдарлама арқылы қара сылақпен әрленген, пайдалануға берілген жаңа үйден немесе 2020 жылдан кейін салынған екінші нарықтан үй алуға болады.

Alatau City Bank

Екінші нарық
Банк екінші нарықтағы баспананы несиеге бермейді.

Жаңа құрылыс
Белгілі бір құрылыс салушылармен серіктестік бағдарлама бар.
Мөлшерлеме — 16.25%, бастапқы жарна — 20%, мерзімі — 20 жылға дейін.

Bank RBK

Екінші нарық
Екі жолы бар.
Комиссиясыз: мөлшерлеме — 22.4%, бастапқы жарна — 30%, мерзімі — 15 жылға дейін.
Несие сомасының 0.5% комиссиясымен: мөлшерлеме — 22%, бастапқы жарна — 30%, мерзімі — 15 жылға дейін.
Бастапқы жарна болмаса, оның орнына басқа жылжымайтын мүлікті қосымша кепіл ретінде ұсынуға болады.
Банк салынғанына 50 жылдан аспаған үйлерді несиеге береді.

Жаңа құрылыс
Мөлшерлеме — 1.6–19.8%, бастапқы жарна — 20%, мерзімі — 15 жылға дейін.
Құрылыс компаниялары салған, пайдалануға берілген және салынып жатқан тұрғын үй кешендеріндегі пәтерлер жарамды.

Отбасы банк

Мұнда алдымен депозитте ақша жинау керек.
Тұрғын үй қарызын алу үшін депозит ашылғанына үш жылдан асуы, баспана құнының 50%-ы жиналуы және бағалау көрсеткіші кемінде 16 болуы керек. Мөлшерлеме — 3.5–5%.
Аралық қарыз бойынша бағалау көрсеткіші 5-тен басталғанда мөлшерлеме — 8.5%. Үш жыл ақша жинағаннан кейін тұрғын үй қарызына ауысып, мөлшерлемені төмендетуге болады.
Қарызды екінші нарықтағы баспанаға рәсімдеуге болады. Кірпіш, панель, монолит үйлер және бетон блоктан салынған үйлер 1966 жылдан кейін салынған болуы керек.
Бірінші нарықтан — пайдалануға берілген немесе ҚЖК кепілдігі бар салынып жатқан баспананы, сондай-ақ үй салуға жер телімін сатып алуға болады.

Екінші нарықтағы баспанаға қойылатын талаптар. 2026 жылдың күзі

Банк	Не сатып алуға болады	Салынған жылы
Altyn Bank	Пәтер, үй, бөлме	1976 жылдан кейін
Halyk Bank	Пәтер, үй, бөлме	1960 жылдан кейін — кірпіш; 1965 жылдан кейін — панель;  2000 жылдан кейін — ағаш
Нұрбанк	Пәтер, үй, бөлме	1976 жылдан кейін
ForteBank	Пәтер, үй	1965 жылдан кейін — әрленген;  2000 жылдан кейін — қара сылақпен әрленген
Банк ЦентрКредит	Тек пәтер	1960 жылдан кейін қалада;  1974 жылдан кейін қала маңында
Freedom Bank	Тек пәтер	1965 жылдан кейін
Bereke Bank	Пәтер, үй, таунхаус	1960 жылдан кейін — пәтер;  1970 жылдан кейін — үй;  2010 жылдан кейін — таунхаус
Bank RBK	Пәтер, үй	1975 жылдан кейін
Отбасы банк	Пәтер, үй, бөлме, жер телімі	1966 жылдан кейін