Ескі үйде қыста қабырғалар жиі қатып, пәтердің іші суық әрі дымқыл болып кетеді. Ішкі жөндеу жұмыстары көмектесе бермейді, кейде қабырғаларды сыртынан жылыту қажет.
Бірақ пәтеріңізді сыртын өзіңіз жылыта алмайсыз: қасбет — үйдің ортақ мүлкі, ал оның сырт келбеті қала талаптарына сай болуы керек.
Пәтердің сыртын жылытуға бола ма және ол үшін не істеу керегін түсіндіреміз.

Алдымен себебін анықтаңыз

Жылытқыш материал сатып алуға асықпаңыз. Ең алдымен суық қайдан келіп тұрғанын анықтау керек. Оның себебі мынада болуы мүмкін:

  • панельаралық жік;
  • терезе;
  • балкон немесе лоджия;
  • жылыту жүйесі.

Үйдің сыртқы қабырғасы қатып тұрса, қасбетті жылыту қажет болуы мүмкін.

Неліктен қабырғаны жылыта салуға болмайды

Қасбет — үйдің ортақ мүлкі. Сондықтан оны өзгертуге болмайды.

Қалада ғимараттың сырт келбетіне қойылатын талаптар бар. Мысалы, Алматының дизайн-кодында үйдің бүкіл қасбетін кешенді түрде жылыту қарастырылған. Қолданылатын материалдар мен олардың түсі ғимараттың сырт келбетіне сәйкес болуы керек. Тарихи ғимараттарға қойылатын талап бұдан қатаң: олардың архитектурасы мен сәнді элементтері сақталуға тиіс.

Астанада да қасбетті әрлеуге, қолданылатын материалдар мен түстерге және басқа элементтерге қатысты талаптар бар.

Бүкіл үйді жылыту қажет болмаса ше?

Бүкіл қасбетті жылыту қымбатқа түседі. Оның үстіне көбі пәтерлері жылы болса мұнша шығын шығарғысы келмейді.

Сондықтан көп жағдайда меншік иелері пәтерін өздері жылытады.

Заңгер Аркадий Рубцов:
— Дизайн-код негізінен орталық көшелерге қатысты және жеке үйді жылытуға мемлекет қаржы бөлуі мүмкін. Мұндай бағдарламаларға қандай үйлер қатысатынын билік шешеді. Тұрғын үй-коммуналдық шаруашылықты жаңарту бағдарламасы бойынша қасбетті жылыту мүмкіндігі жиі туындамайды.

Сондықтан заңгер мұндай жағдайда ең алдымен адамдардың денсаулығы мен қауіпсіздігін ойлау керек дейді.

Яғни мәселені тек қасбетке қойылатын талаптармен шектеуге болмайды. Пәтер қатып жатса және онда тұруға әсер етсе, меншік иесі мәселені шешуге тырысуы маңызды.

Жұмысқа кіріспес бұрын заңгер мәселені жалпы үй жиналысында қарастыруға кеңес береді.

— Жұмысты бастамас бұрын жалпы жиналыстың шешімі арқылы өзіңізді құқықтық тұрғыдан қорғаған жөн. Меншік иесі бұл мәселеге бүкіл үйдің назарын аударуға тырысқанын, бірақ көршілер шығындалғысы келмегенін көрсету қажет, — деп атап өтті Рубцов.

Жылыту жұмыстарын бастамас бұрын қасбеттің жағдайын, оның сырт келбетіне қойылатын талаптарды тексеріп, жұмысты қалай жүргізген дұрыс екенін анықтап алған жөн.

Пәтер суық болса не істеу керек

  • Алдымен себебін анықтаңыз.

Терезелерді, балконды, жылыту жүйесін және панельаралық жікті тексеріңіз. Мәселе сыртқы қабырғада болса, қасбетті жылыту көмектесе ме, соны анықтаңыз.

  • МИБ-ке немесе басқарушы компанияға жүгініңіз.

Мәселені үйдің ортақ күшімен шешуге бола ма, соны сұраңыз.

  • Көршілермен мәселені талқылаңыз.

Мәселені жалпы жиналыста көтеріңіз. Тұрғындард шығындалуға дайын ба, біліңіз. Көбі қарсы болса, жиналыстың шешімін сақтап қойыңыз.

  • Қасбетке қойылатын талаптарды тексеріңіз.

Қалаңызда және нақты үйіңізде қандай материалға, түске және әрлеу тәсіліне рұқсат етілетінін анықтаңыз. Бұл әсіресе Алматы мен Астана үшін маңызды.

  • Содан кейін ғана жылыту тәсілін таңдаңыз.

Материалды өзіңіз сатып алып, жұмысшылар іздеуге асықпаңыз. Қасбетті жылыту үшін арнайы технология мен жабдық қажет. Жұмыс дұрыс жүргізілмесе, мәселе шешілмей, қасбет зақымдалуы мүмкін.

Жаңа үй болса, талаптарды құрылыс салушыдан нақтылаған жөн: мұндай үйлерде қасбетке арналған нақты материалдар мен оның сырт келбеті алдын ала қарастырылуы мүмкін.

Пайдалы материалдар:
«Тек қолма-қол ақшаға сату»: сатушылар неге ипотека арқылы сатпайды
Жалға беру үшін пәтер сатып алған тиімді ме
Отбасы банктің депозитіндегі зейнетақы қаражаты: 6 жылдық мерзім енді жоқ