Тұрғын үй кезегіне қатысты сұрақ көп, пәтерді үлестіргенде одан көп болады. Неліктен біреулер баспананы басқалардан бұрын алады, жеңілдік қалай ескеріледі және отбасыдағы өзгеріс — баланың дүниеге келуі, мүгедектік алу немесе балалардың кәмелетке толуы кезекке қалай әсер етеді?

Негізгі жағдайларды қарастырайық.

Тұрғын үй кезегі — мемлекет ұсынатын тұрғын үйге мұқтаж азаматтардың тізімі. Олар мынаған үміткер бола алады:

Кезекке кім жауапты?

Бұрын бұл жұмысты әкімдіктер атқарған, былтыр мамырдан бастап тұрғын үй кезегіне Отбасы банк жауапты.

Кезекке тұру үшін талаптар қандай?

Кезекке тұру үшін:

  • Қазақстан Республикасының азаматы болу қажет.
  • Соңғы бес жылда тұрғын үй болмауға тиіс. Бұл өтініш берушіге де, оның отбасы мүшелеріне де қатысты. Апатты деп танылған тұрғын үй жарамды.
  • Астана, Алматы және Шымкентте кемінде үш жыл тұрақты тіркелген болуы керек. Басқа өңірлерде мерзім маңызды емес.

Қалай өтінім беруге болады?

Барлық рәсім онлайн жасалады. Кейбір функция телефонда жұмыс істемеуі мүмкін, сондықтан компьютер немесе ноутбук қолданған жөн:

  • ЭЦҚ арқылы orken.otbasybank.kz сайтына кіріңіз.
  • Өтінімді толтырып, 1414 нөмірінен келген SMS арқылы растаңыз.

Жүйе талаптарға сәйкестікті автоматты түрде тексереді. Өтінім тәулік бойы қабылданады.

Отбасылық жағдай өзгерген кезде (неке, бала туу және т.б.) кезектегі деректі жаңартып, түгендеуден өту қажет.

Отбасы банк кезектегілердің өзекті тізімін жариялап отырады. Кезекті қалай тексеруге болатынын мына сілтеме арқылы қараңыз.

Жетім балалар неше жасқа дейін кезекке тұра алады?

29 жасқа толғанша өтінім беру қажет. Осы жасқа дейін кезекке тұрған болса, тұрғын үй алу құқығы 29 жастан асқан соң да сақталады.

Жетім балалар 29 жасқа толғанша кезегін басқа өңірге орнын жоғалтпай ауыстыра алады. Мұндай мүмкіндік тек жетім балаларға беріледі және 29 жастан кейін болмайды.

Бала 18 жасқа толса, отбасы кезектен шыға ма?

Жоқ. Баланың кәмелет жасқа толуы отбасының тұрғын үй кезегіне әсер етпейді. Ата-аналар тізімде қала береді. Кәмелет жасқа толған бала талаптарға сәйкес келсе, кезекке бөлек тұра алады.

Мүгедек бала неше жастан бастап кезекке тұрады?

Мүгедек екені анықталған сәттен бастап тұра алады. Өтінімді ата-анасы, қамқоршысы немесе қорғаншысы бере алады. Отбасы неғұрлым ерте кезекке тұрса, кезек соғұрлым тез жылжиды.

Мүгедек адамның жасы 18-ден асса да кезекте қала ма?

Иә. 18 жастан асқан соң I немесе II топтағы мүгедек екені анықталса, кезек сақталады.
orken.otbasybank.kz жүйесі арқылы деректі уақытылы жаңартып отыру маңызды.

Қамқоршының өз пәтері болса, қамқорлығындағы адам кезекке тұра ала ма? Ал қамқоршының ипотекасы болса ше?

Иә, қамқорлығындағы адам кезекке тұра алады. Оның өз атында соңғы бес жылда тұрғын үйі болмауға тиіс.
Қамқоршының ипотекасы қамқорлығындағы адамды есепке қоюға кедергі келтірмейді.

Көпбалалы ана ретінде кезекте тұрмын. Мүгедек бала дүниеге келді. Баланы кезекке қойсам, өз кезегім жойылып кетпей ме?

Жоқ, кезек қалады. Керісінше, қосымша жеңілдік пайда болады. Ол үшін деректі orken.otbasybank.kz сайты арқылы жаңарту қажет.

Неліктен кезекке кейін тұрған адам пәтерді ерте алуы мүмкін?

Өйткені кезекке тұрған күн ғана ескерілмейді. Негізгі факторлар ретінде өтініш берушінің категориясы, отбасы құрамы, табыс деңгейі және үлестіруге болатын тұрғын үй қоры есепке алынады.

Пәтерлердің шамамен 70 %-ы жеңілдікті категорияға кіретін көпбалалы отбасы, жетім балалар, мүгедектер, ардагерлер және әлеуметтік осал топтарға жататын өзге азаматтар үшін сақталады.

Сондықтан жеңілдікке ие азаматтар кезекке кейін тұрғанның өзінде, оларға тұрғын үй алу кезінде басымдық беріледі.

Жалға берілетін тұрғын үйді үлестіру басталғаны туралы SMS келсе не істеу керек?

5 жұмыс күні ішінде Baspana Market жүйесіндегі жеке кабинетке кіріп, мемлекет ұсынған тұрғын үйді таңдайсыз немесе одан бас тартасыз. Жауап бермесеңіз, өтінімнің күші жойылады, бірақ кезекте орныңыз және өңірдегі келесі үлестіруге қатысу мүмкіндігіңіз қалады.

Қызық болуы мүмкін:
Зейнетақы жинағын енді шешіп ала алмайсыз: Отбасы банкіндегі ақшамен не істесе болады
1%-дық ипотека: астарында не жатыр
Кіреберіске камера орнатуға бола ма