Кейде ПИК немесе МИБ қызметтері үшін уақытша төлемесе болады. Бұл қалай жұмыс істейтінін заңгер Аркадий Рубцов түсіндірді.

ПИК қызметі үшін қалай төлемесе болады

Заң бойынша тұрғындар шатыр, кіреберіс, лифт, құбыр мен жертөле сияқты үйдің ортақ мүлкін күтіп ұстау үшін ақы төлеуге міндетті. Бірақ кейде уақытша төлемесе болады.

Ол үшін пәтер иесі ортақ мүлікті өз қаражатына жөндеуі керек. Сонда кеткен шығынды болашақ төлемнің орнына қолдануға болады.

Яғни адам белгілі бір уақыт жарна төлемейді.

Қандай жөндеу жұмыстары есепке алынады

Көбінесе қымбат күрделі жұмыстар есепке алынады: шатыр, жертөле және қасбетті жөндеу, инженерлік желілерді ауыстыру.

Кіреберісті жөндеу қиын. Басқарушы ұйым бұған келісе бермейді.

Қанша уақыт төлемесе болады

Тұрғындар жөндеу жұмысының құнына қарай 1-4 жыл төлемейді.

Мұндай схема көбіне екінші нарықтағы үйлерде кездеседі. Жақында Алматыдағы бір тұрғын үй кешенінде басқарушы ұйым шатырды 1 млн теңгеге жөндеуге келісті.

Қалай дұрыс рәсімдеу керек

Алдымен басқарушы ұйыммен келісу қажет. Схема мынадай:

  1. Тұрғын МИБ, КСК немесе басқарушы компанияға жазбаша өтінім жібереді.
  2. Жасағысы келетінін жөндеу жұмыстарын және қанша ақша жұмсауға дайын екенін көрсетеді.
  3. Басқарушы компания шығынды есепке алуға дайын ба, жоқ па, жазбаша жауап береді.
  4. Компания мақұлдаса, тараптар:
    — қандай құжат қажет болатынын;
    — шығынды қалай растау керегін;
    — жұмысты кім қабылдайтынын;
    — кепілдік мерзімі қандай болатынын талқылайды.

Осыдан кейін ғана жөндеу жұмыстарын бастауға болады.

Құжатсыз шығынды есепке алу мүмкін емес. Мердігерлермен келісімшартқа отырып, смета дайындап, материалдардың түбіртегін, орындалған жұмыс актілерін және жөндеу жұмыстарының суретін сақтау қажет. ПИК пен МИБ қолданылған материал және жөндеу сапасына кім жауап беретінін білуге тиіс.

Көршілердің келісімі керек пе

Төлемнен ұзақ мерзімге босату керек болса, тұрғындардың 51%-ы дауыс беріп, келісім беруі қажет. Дегенмен басқарушы ұйымдар жөндеу жұмысы туралы жиналыссыз-ақ, тікелей пәтер иесімен келіседі. Барлығы сома мен үйдегі жағдайға байланысты.

Төлемей қоя салуға болмайды

Бұл — жиі кездесетін қате. Шатырды немесе жертөлені өз бетінше жөндеп, кейін ПИК қызметі үшін төлемесеңіз, қарыз боласыз. Басқарушы ұйым оны сот арқылы өндіріп ала алады.

Жөндеу жұмыстары туралы алдын ала келіспесеңіз, сот оны үйге көрсетілген ерікті көмек деп тануы мүмкін. Ондай жағдайда шығынды ешкім өтемейді.

Пайдалы материалдар:
Шатырдан су ақты: не істеу керек, қайдан ақша аласыз
ПИК жабылуы мүмкін: қайта тіркеуден қалай өтуге болады