Қоқыстың уақытында жиналмауы көпшілікке таныс жағдай. Контейнерлер толып кеткен, қоқыс аулада шашылып жатады. Мұндай мәселені кім шешеді және жүйе дұрыс жұмыс істеуі үшін не істеу қажет?

Қоқыс қаншалықты жиі жиналуға тиіс және жиналмаса қайда жүгіну керегін түсіндіреміз.

Бірыңғай қоқыс жинау кестесі бар ма?

Жоқ. Ел бойынша ортақ кесте жоқ.

Кестені жергілікті әкімдіктер бекітеді. Сондықтан әр қалада, ауданда, тіпті шағын аудандардың өзінде қоқыс әртүрлі уақытта жиналуы мүмкін.

Қоқысты мердігер компаниялар жинайды. Олар бекітілген кесте бойынша контейнерді уақытылы тазалауға міндетті.

Қоқыс қаншалықты жиі жиналады?

Көпқабатты тұрғын үйлер орналасқан аудандарда жауапты компания қоқысты күн сайын жинайды. Контейнерлер тез толса, қоқыс таситын көліктер күніне бірнеше рет келуі мүмкін.

Жеке тұрғын үй секторында схема басқаша. Мұнда ортақ контейнер болмауы мүмкін. Тұрғындар қоқыс пакеттерін белгіленген күндері шығарып қояды, ал арнайы көлік оларды кестеге сай алып кетеді. Әдетте аптасына бір рет.

Қашан шағымданған дұрыс?

Контейнерлер бірнеше күн қатарынан толып тұрса және қоқыс олардың жанына үйіле бастаса, күтудің қажеті жоқ.

Мұндай жағдай жиі қайталанып, қоқыс кестеге сай жиналмаса шағымданасыз.

Қоқыс жиналмаса қайда жүгінуге болады?

Мәселені кезең-кезеңімен шешкен дұрыс:

  1. ПИК не МИБ-ке немесе басқарушы компанияға хабарласыңыз. 
    Олар мәселенің себебін анықтап, мердігер ұйымға хабарласуға тиіс.
  2. Қоқыс жинайтын компанияға өзіңіз хабарласыңыз. 
    Байланыс нөмірі коммуналдық төлем түбіртегінде болады.
  3. Мәселе шешілмесе аудандық әкімдікке e-Otinish арқылы шағымданыңыз. 
    Бұл — ресми түрде өтініш беріп, мемлекеттік органдардан жауап алудың заңды жолы.

Толып тұрған контейнерлер қалыпты жағдайға айналса, тұрғындар қоқыс жинау жиілігін арттыруды немесе қосымша контейнер орнатуды талап етуге құқылы.

Қоқыс неге жиналып қалады?

Бұған әрдайым мердігер компания кінәлі бола бермейді.

  • Кейде үй немесе аудан тұрғындарының санына шаққанда контейнерлер жеткіліксіз болады.
  • Тағы бір жиі кездесетін себеп — дұрыс тұрмаған көліктер. Қоқыс таситын машина контейнер тұрған жерге өте алмаса, қоқысты кейін алып кетеді.
  • Құрылыс қалдықтары да үлкен мәселе тудырады. Жөндеу жұмыстарынан кейін контейнерлердің жанына ескі есіктер, терезелер, сантехника, жиһаз және құрылыс қоқысы салынған қаптар тұрады. Мұндай қалдықтар бос орынды тез толтырып тастайды.

Құрылыс қалдықтарын контейнерлердің жанына тастауға бола ма?

Жоқ. Құрылыс қалдықтарын, ескі сантехниканы, жиһазды, есіктерді және басқа да үлкен заттарды кәдімгі қоқыс контейнерлеріне тастауға немесе олардың жанына үйіп қоюға болмайды.

Мұндай заңбұзушылық үшін 20 АЕК (2026 жылы 86 500 теңге) көлемінде айыппұл салынады.

Құрылыстан қалған және үлкен қоқысты шығару үшін арнайы компанияның қызметіне жүгіну қажет.

Ең бастысы

Лық толған контейнерлерге көз жұма қарамау керек. Алдымен ПИК-ке, МИБ-ке немесе басқарушы компанияға хабарласыңыз. Мәселе шешілмесе, әкімдікке шағымданыңыз. Бұл қоқыстың уақытылы жиналуына және ауладағы тазалықтың сақталуына көмектеседі.

Пайдалы материалдар:
Отбасы банк ипотека мөлшерлемесін көтереді
2026 жылы жалға бергенде қанша және қашан салық төлеу керек
Қандай жағдайда ПИК қызметі үшін төлемесе болады
Алатаудан берілетін 10 сотық жерге кезек тоқтайды: кезекте тұрғандарға не болады