Құрылыc салушыдан сатып алынатын пәтердің сапасын қалай тексеру керек екенін түсіндіреміз. 

Ақпарат жинаңыз 

Тұрғын үй кешенін таңдағанда құрылыс компаниясы нарықта қанша жылдан бері жұмыс істейтінін, қанша тұрғын үй кешенін салғанын, атышулы жанжалдарға қатысы бар-жоғын, тапсырыс беруші, бас мердігер және жобалаушы кім екенін анықтаңыз.

Құрылысты жүргізуге рұқсат, әкімдік тарапынан жер учаскесін бөлу туралы шешім және құрылысшының лицензиясы бар-жоғын тексеріңіз. Егер бұл құжаттар құрылыс компаниясының ресми сайтында жоқ болса, менеджерден сұраңыз.

Таңдалған объект туралы интернеттен пікірлер оқыңыз немесе сол жерде пәтер сатып алған адамдардан сұраңыз.

Құрылыс салушылардың пәтерлерін іздеу үшін Krisha.kz сайтындағы немесе қосымшасындағы «Жаңа құрылыстар» бөліміне кіріңіз. Сүзгіде аймақты, бөлме санын және бағасын таңдаңыз. Кез келген тұрғын үй кешенін басқан кезде құрылысшы компания және объект туралы ақпаратты көруге болады.

Пәтерді көруге жазылыңыз 

Пәтерді күндіз қараңыз, өйткені кемшіліктерді байқау оңай болады. Өзіңізбен бірге қолшам, деңгей өлшегіш, ұзындық өлшегіш, тақтай, парақ, шам және телефон қуаттағыш алыңыз. Олардың не үшін қажет екенін түсіндіреміз. 

Бастапқы әрлеу жүргізілген пәтерде не болуы керек. 

Есіктер 

  • Құлып, тұтқалар және қарау үшін жасалған саңылау мықты бекітілуі керек, есік ойығы зақымданбаған болуға тиіс.
  • Есікті бірнеше рет ашып-жауып көріңіз. Оның бос емес екеніне және жабық күйінде саңылаулары жоқ екеніне көз жеткізіңіз.
  • Бөлме арасындағы есік ойықтарының биіктігі мен енін (жоғарғы және төменгі жағынан) өлшеңіз. Биіктігі — 2.1 м, қонақ бөлменің ені — кемінде 100 см, асүй мен жатын бөлме — 90 см, санитарлық торап — 80 см болуы керек. Өлшемдер өзгеше болса, есікті арнайы тапсырыспен жасауға немесе ойықты қайта түзетуге тура келеді.
  • Есікті сәл ашық қалдырып, біраз күтіңіз. Егер сәл жылжыса, есік жақтауы қабырғаға қисық орнатылған. 

Терезелер 

  • Сырт келбеті мен тығыз жабылатынына назар аударыңыз. Терезе жақтаулары ешқандай бөгде дыбыссыз, жеңіл жабылуға тиіс.
  • Әйнегінде ақау немесе қараю белгілері бар-жоғын тексеріңіз.
  • Терезе ойығының түсі біркелкі болуы керек, барлық саңылау герметикпен мұқият жабылуы керек. 

Қабырғалар мен арақабырғалар 

Тегістеу жұмыстарын тексеру кезінде қабырғаға (қырынан) шам жарығын бағыттаңыз, себебі бұл ақаулар мен дақтарды көруді жеңілдетеді. Деңгей өлшегішті тақап, құралдағы ауа көпіршігіне қараңыз. Көпіршік ортада тұрса, қабырға түзу деген сөз.

Тіктегіш және сызғыш көмегімен тіктігін тексеріңіз. Қарапайым сылақта ауытқу бөлме биіктігіне шаққанда 15 мм-ден, жақсарған сылақта 10 мм-ден, жоғары сапалы сылақта 5 мм-ден аспауға тиіс. 

Еденнің тұтастырғы 

Біркелкі түсті, жарықтар мен қуыс жерлер болмауы керек. Табалдырық биіктігі одан 3 см-ден аспауы қажет (балконда да, кіреберіс есікте де). 

Санитарлық торап 

  • Жуынатын бөлмедегі қабырғалар ылғалға төзімді гипс-қатырмадан жасалуы керек, ал қабырғалар цемент-құм қоспасымен сылануға тиіс. Гипс қосылған байланыстырушы заттары бар басқа материалдар су тигенде бастапқы қасиетін тез жоғалтуы мүмкін.
  • Ваннадағы плитканың төсеу сапасын тексеру үшін бірнешеуін түртіп көріңіз. Тақтайды қойып, әртүрлі бағытта жылжытыңыз, ол тегіс емес жерде секірмеуі керек. Бөлме бұрыштарында саңылаулардың бар-жоғын тексеріңіз. 

Төбе 

Биіктігі жобаға сәйкес болуы керек — кемінде 2.5 м. Керме төбе орнатуды жоспарласаңыз, өлшегішпен өлшеңіз.

Жабыны түйіскен жерлері езіндіміен сыланып, шығыңқы жерлері болмауға тиіс. 

Ауданы 

Құжатта көрсетілген пәтердің ауданы шын мәнінде өзгеше болуы мүмкін. Көбінесе қисық қабырғаларды тегістеу кезінде өлшемдері өзгереді.
Жалпы аудан әр бөлменің ауданының қосындысынан тұрады. Балкон мен лоджия жалпы және пайдалы ауданға кірмейді. Ауданды есептеу үшін әр бөлменің ұзындығы мен енін еден деңгейінде қабырға бойымен өлшеп, көбейтіңіз. 

Егер бөлме тіктөртбұрыш болмаса, оның сызбасын қағазға түсіріп, қарапайым геометриялық пішіндерге бөліңіз. Әр пішіннің ауданын өлшеп, нәтижесін қосыңыз. 

Батарея 

Көлденең орналасуы керек және қабырғадан кемінде 2 см, терезе ернегінен кемінде 8 см, еденнен 7 см қашықтықта орнатылуы керек.

Құбырлар 

  • Бастапқы әрлеу жүргізілген және әрленген пәтерде ыстық және суық су құбырлары ванна мен дәретханада болуы керек.
  • Жертөлеге түсіп, құбырларды тексеріңіз. Олардың маркасы мен өндірушісі туралы ақпарат сұраңыз. Коммуналдық желілердің кепілдік мерзімі қанша уақытқа берілгенін және мерзімі аяқталғаннан кейін кім жауапты болатынын анықтаңыз.

Желдету 

Желдету саңылауына (тек торлар орнатылған жағдайда) парақ жақындатыңыз. Дұрыс жұмыс істеп тұрса, қағазды тартады, ақау болса түсіп кетеді. 

Электр сымдары 

  • Пәтер тапсырылатын кезде белгілері бар электр қалқаны орнатылады, онда жарық, розеткалар, электрплита, кондиционер және басқа құрылғыларға арналған бөлек автоматтар болады.
  • Электр қалқанда қосылу схемасының бар-жоғын және розетка қораптарындағы сымдар белгіленгенін тексеріңіз. Өзіңізбен бірге әкелген шамның көмегімен шам түпшесін тексеріңіз. Пәтерде розеткалар орнатылған болса, телефон қуаттағышын пайдаланып, әрқайсысын тексеріп шығыңыз. 

Есептегіш 

Пломбалардың бүтін екенін тексеріп, құралдардың көрсеткіштерін қараңыз. Көрсеткіштер төмен болуы керек. Жоғары болса, пәтерде құрылысшылар тұрған болуы мүмкін. 

Кепілдік туралы сұраңыз 

Құрылыс компаниясы кепілдік беруге міндетті.
Әдетте, жалпы құрылыс және әрлеу жұмыстарының сапасына, абаттандыру элементтерінің сақталуына (асфальт, шатыр және т.б.) 1 жыл кепілдік беріледі.
Инженерлік коммуникацияларға (сорғылар, желдеткіштер) шамамен 2 жыл, ал ғимараттың қаңқасына (темірбетон конструкциялар) 70 жыл кепілдік қарастырылған.