Кепілдегі мүлік — пәтер (немесе үй, саяжай, жер телімі) ипотекалық немесе тұтынушылық несиенің кепілзаты ретінде тұрған жылжымайтын мүлік. Оның нақты иесі — қарыз алушы. Алайда ол оны несие берген банк (немесе басқа қаржы ұйымының) рұқсатымен ғана сатуға немесе сыйға беруге құқылы. Шектеу несие толық өтелгеннен кейін ғана алынады.
Қарыз алушы несиесін өтемесе, кепілдегі мүлік банк меншігіне өтеді.

Маңызды: Кепілдік ауыртпалықты басқа шектеулермен шатастырмаңыз. Пәтерге мемлекеттік органдар немесе жеке тұлғалар да шектеу қоя алады. Мысалы, меншік иесінің қарыздары бар болса немесе заңды талаптарға байланысты сот кезінде қойылады.

Пәтер кепілде тұрғанын қалай білуге болады?

Сатушыдан eGov немесе eGovMobile арқылы жылжымайтын мүлікке ауыртпалықтар (кепілде болу, тыйым салу) жоқтығы туралы анықтама алуын сұрау керек. Ол 15 минутта дайын болады.

Кепілдегі мүлік үшін кепіл шарты рәсімделеді және мемлекеттік базада тіркеледі. Бұл ақпарат ауыртпалық алынғанға дейін дерекқорда сақталады.

Кепілде тұрған пәтерді сатуға бола ма?

Мұндай пәтерді сату заңды, бірақ ол үшін банктің келісімі қажет. Қаржы ұйымының рұқсатынсыз мәміле жасау мүмкін емес, өйткені жылжымайтын мүліктің түпнұсқа құжаттары банкте сақталады. Нотариус тексергенде кепілдік ауыртпалық бірден анықталады.

Кепілде тұрған пәтерді сатып алу қауіпті ме?

Кепілдегі мүліктің басты артықшылығы — құжаттарының дұрыс болуы. Банк кепіл ретінде күмәнді немесе заңсыз объектіні қабылдамайды. Барлық құжат мұқият тексерістен өтеді.

Krisha. kz-те кепілде тұрған пәтерді сату туралы шамамен 9 мың хабарландыру жарияланған.
Оларды қарау үшін «Кепілге салынған» бөлімінде «Иә» дегенді таңдаңыз.
Дегенмен мәміле рәсімдеу кезінде қауіп бар.

Кепілде тұрған пәтерді қалай сатып алуға болады?

Кепілдегі жылжымайтын мүлік алудың ең танымал схемасы мынадай:

1. Сатып алушы сатушының орнына банкке қалған қарызын төлейді.

2. Қарыз толық өтелгеннен кейін пәтерден кепілдік ауыртпалық алынады.

3. Сатып алу-сату келісімшарты жасалып, сатып алушы қалған соманы сатушыға береді.

Қандай қауіп бар?

Сатушы несие жабылғаннан кейін мәміледен бас тартуы мүмкін. Ақша беру рәсімі дұрыс жасалмаса, ақшаңыздан да, пәтерден де айырылуыңыз ықтимал.

Не істеу керек?

1. Сатушымен бірге банкке барыңыз.

2. Сатушы қарызды толық өтеуге өтініш беріп, қалған қарызы туралы үзінді көшірме алады. Бұл сома пәтер үшін алдын ала төлем болады.

3. Банк несиені мерзімінен бұрын өтеуге келісім бергеннен кейін ғана мәміле жасауға келісіңіз.

Маңызды: нотариуста алдын ала сатып алу-сату келісімшартын жасаңыз.

Келісімшартта мыналар көрсетілуге тиіс:

• Тараптардың міндеттері. Мысалы, сатушы сатып алушыдан алған соманы несие жабуға жұмсап, содан кейін пәтерді сатуға міндеттеледі.

• Жылжымайтын мүлік туралы ақпарат. Кадастрлық нөмір, мекенжай және барлық техникалық параметрлердің дұрыс жазылғанын тексеріңіз.

• Кепіл ұстаушы банк атауы және кепіл шартының нөмірі.

• Алдын ала төлем сомасы, жалпы құны және негізгі сатып алу-сату келісімшарты жасалғаннан кейін сатушыға төленетін қалдық сома.

• Мерзімдер. Мысалы, пәтерден ауыртпалық алынған соң 5 күн ішінде негізгі сатып алу-сату келісімі жасалуға тиіс.
 

Ақша беру процесін де дұрыс рәсімдеу керек: кепілақы туралы келісім жасаңыз.

Сатып алушы сатушының ипотекасын өз атына рәсімдей алады.

Қосымша оқуға болады:

Пәтер сатып алғанда кепілақыдан тіркеуге дейінгі қадамдар

Krisha. kz материалын пайдаланғанда бірінші абзацта міндетті түрде сілтеме болуы керек!