Әйелдерге арналған «Ұмай» бағдарламасы бойынша өтінім қабылдау тамызда басталады. Бұл туралы Отбасы банктің басқарма төрайымы Ләззат Ибрагимова тікелей эфир барысында хабарлады.

««Ұмай» ипотекасы бойынша жақсы жаңалық бар. Бағдарламаны тамыз айында бастаймыз. Алғашқы қаражат жолда», — деді Ләззат Ибрагимова.

Бұған дейін мемлекет бұл бағдарламаға 45 млрд теңге бөледі деген ақпарат тарады.

Кім қатыса алады

Ипотека ресми табысы бар жұмыс істейтін әйелдерге арналған және алты ай бойы зейнетақы жинағына аударым болуы керек.

Бағдарламаға екі қосалқы қарыз алушыны тартуға және бастапқы жарнаны төлеу үшін зейнетақы жинағын пайдалануға болады.

«Ұмай» ипотекасының шарттары

  • Ең жоғары сома — 50 млн теңге.
  • Бастапқы жарна — ірі қалаларда — тұрғын үй құнының 20 %-ы, өңірлерде — 15 %.
  • Мерзімі — 6 ай — 25 жыл.

Банк нақты пайыздық мөлшерлеме туралы ақпарат бермеді. Алғашқы жылдары 15% болып, кейін 3.5—5%-ға дейін төмендеуі мүмкін.

Бағдарлама аясында әйелдер екі қосалқы қарыз алушыны тарта алады әрі бастапқы жарнаны төлеуге зейнетақы жинағын пайдалана алады.

Қандай тұрғын үй сатып алуға болады:

  • жаңа тұрғын үй кешенінен пәтерді, оның ішінде салынып жатқан үйді (ҚТК кепілдігі болған жағдайда);
  • 2016 жылдан кейін салынған екінші нарықтағы пәтерді.

Бұл бағдарлама тек алғашқы баспананы сатып алуға емес, тұрғын үй жағдайын жақсартып, екінші немесе үшінші пәтерді сатып алуға да мүмкіндік береді.

Қатысушыларды іріктеу қалай өтеді

Іріктеу ұпай бойынша жүргізіледі.
Отбасы банкте бұрыннан депозиті бар және сыйақы мөлшері жоғары әйелдерге беріледі.

Krisha.kz материалынан дәйексөз келтіру үшін редакциядан рұқсат алу қажет. Krisha.kz материалын пайдаланғанда бірінші абзацта міндетті түрде сілтеме болуы керек!