Астанада LRT іске қосылды. Осыған байланысты бекеттерге жақын орналасқан пәтерлер қымбаттайды дейтіндер көбейді. Көптеген елде метроның жанындағы баспана расымен қымбат. Бірақ мұндай жағдай Қазақстан астанасында қайталана ма?

Krisha.kz сарапшыдан тұрғын үй бағасы күрт өсе ме және LRT-ның жанындағы аудандарда жылжымайтын мүлік нарығы қандай екенін сұрады.

Сарапшылар әзірге нақты қорытынды жасау ерте деді.

«Крыша Агент» сервисінің сату бөлімінің басшысы Тимур Калиев:

— Көбі метроның маңындағы жылжымайтын мүлік бағасы 10–15 % өсетін Қытай мен Оңтүстік Кореяны мысал ретінде келтіреді. Бірақ Астананы ірі мегаполистермен салыстыру дұрыс емес. Мысалы, Сеулдің өзінде 10 миллиондай адам тұрады, ал агломерациясымен бірге халық саны 25 миллионға жуықтайды. Ондағы көлік жүктемесі, жол қозғалысы мен логистика мүлде басқа деңгейде. Ал 1.5 миллиондай халық бар Астанада көлікпен қатынау ыңғайлы.

LRT желісі өтетін және бекеттер орналасқан аудандар (EXPO, Ботаникалық бақ, Қабанбай батыр даңғылы) онсызда сұранысқа ие. Бұл жерлерде баспана бағасы жалпы қалалық нарықтағы үрдіске сай өсіп келеді.

LRT іске қосылғаннан кейін баға өссе, бұл көбіне нарықтың жергілікті әрі уақытша реакциясы. Тіпті мұны эмоция мен алыпсатарлыққа негізделген құбылыс деуге болады.

Сарапшының пікірінше LRT-ның тұрғын үй бағасына нақты әсерін тек 2–4 жылдан кейін объективті бағалауға болады.

Krisha.kz-тегі хабарландыруларға жүргізілген талдауға сүйенсек, LRT бекеттерінің маңында пәтер әзірге жаппай қымбаттап жатқан жоқ.

Кейбір сатушы үміттеніп бағаны көтерген. Бағасы төмен хабарландырулар да кездеседі.

Пайдалы материалдар:
Сән-салтанат салығы 2027 жылдан бастап салынады
Баланы неше жастан бастап үйде жалғыз қалдыруға болады
Тұрғын үй кезегі: кім пәтер алады және неге кезек ретімен жүрмейді