Алматы тұрғындары үйінің маңындағы тұрақты тегін пайдалана алады. Жаңа ережені Алматы мәслихаты бекітті. Ол үшін тұрғын абонементін рәсімдеу қажет. Абонемент бір жылға жарамды және үйден 500 метр радиуста орналасқан бір тұрақты таңдап, көлікті тегін қоюға мүмкіндік береді.

Абонементті пәтер иесі мен жалға алушы рәсімдей алады. Жалға алушы үшін кемінде бір жылға жасалған, тіркелген жалға алу шарты қажет.

Кім көлігін тегін қоя алады

30 шілдеден бастап күшіне енген жаңа ережеге сәйкес, үйінің жанындағы тұрақты тегін пайдалану құқығы:

  • көппәтерлі үйдегі пәтер иесіне (бұл ереже жеке үйге арналмаған);
  • жалға алу келісімшарты тіркелген жағдайда жалға алушыға;
  • пәтер иесі бірге тұратын жақын туысына (бұл құқықты жазбаша түрде берген жағдайда) беріледі.

Бір пәтер бір көлік үшін тегін тұрақ рәсімдей алады.

Маңызды: бұл тұрғынға бекітілген жеке тұрақ орны дегенді білдірмейді. Тұрғын таңдаған ақылы тұрақты тегін пайдалану құқығын алады. Яғни нақты бір ақылы тұрақтағы кез келген бос орынға көлігін қоя алады.

Тегін пайдалану құқығы:

  • жерасты паркинке;
  • көлік ұстап қалатын тұраққа;
  • жабық көпдеңгейлі паркингке;
  • арнайы платформасы бар механикалық тұраққа берілмейді.

Үйдің жанындағы тегін тұрақты қалай рәсімдеуге болады

Абонементті «Алматы паркинг» сайтында онлайн рәсімдеуге болады.

1-қадам. Сайтқа кіріп, «Тұрғын абонементі» бөлімін таңдаңыз.
2-қадам. «Өтініш беру» батырмасын басып, ЭЦҚ арқылы жүйеге кіріңіз.
3-қадам. Тұрғылықты мекенжайыңызды жазып, картадан үйден 500 метр радиуста орналасқан коммуналдық тұрақты таңдаңыз.
4-қадам. Қажет құжаттарды жүктеңіз:
пәтерге немесе оның үлесіне меншік құқығын растайтын құжат (пәтер иесі үшін);
кемінде бір жылға жасалған және тіркелген жалға алу келісімшарты (жалға алушы үшін);
көліктің техникалық паспорты.

Пәтер ортақ үлестік меншікте болса, басқа меншік иелерінің келісімі қажет болуы мүмкін.

5-қадам. Дербес деректерді өңдеуге және жария келісімшартқа келісім беріп, өтінішке ЭЦҚ арқылы қол қойыңыз.
6-қадам. Өтініш жібергеннен кейін өтінім нөмірі пайда болады. Сол нөмір арқылы оның статусын сайтта немесе «Алматы тұрақтары» қосымшасында қарауға болады. Хабарлама сіз жазған телефон нөміріне де келеді.

Тегін тұрақ құқығы қашан жойылады

Жеңілдік мынадай жағдайларда тоқтайды:

  • пәтерге немесе көлікке меншік құқығы басқа адамға өтсе (мысалы, сатқанда);
  • жалға алу келісімшартының мерзімі аяқталса;
  • көлік туралы дерек өзгерсе (мысалы, мемлекеттік нөмір ауысса).