3 қарашадан бастап Қазақстанда «Наурыз» және «Наурыз Жұмыскер» мемлекеттік ипотекалық бағдарламалары бойынша қосымша өтінім қабылдау басталады. 

Бағдарлама талаптарына сай келетін банк салымшыларының барлығы (жаңа қатысушылар мен көктемде іріктеуден өтпегендер) қатыса алады. Мемлекет 500 млрд теңге көлемінде қаржы бөлінгеннен кейін қосымша өтінім қабылдау ашылды. 

Негізгі талап — қатысушы мен оның отбасы мүшелерінің атында соңғы 5 жылда тұрғын үй болмауы керек. 

Басты шарттар

— Бастапқы жарна: әрленген жаңа тұрғын үй үшін 10 %-дан басталады, ал екінші нарықтағы немесе қара сылақпен әрленген жаңа үйлер үшін 20 %.
— Мөлшерлеме: әлеуметтік осал топтар үшін 7 %, қалғандарына 9 %.
— Ипотека мерзімі: 19 жылға дейін.
— Сомасы: өңірлерде 30 млн теңгеге дейін, Астана мен Алматыда 36 млн теңгеге дейін.

Бағдарламаға Отбасы банкте кемінде 2 млн теңге жинаған және соңғы 6 айдағы ресми табыс бар салымшылар қатыса алады. 

Астана, Алматы және облыс орталықтарында тек бірінші нарықтағы (құрылыс компаниясы ұсынған) тұрғын үйді сатып алуға болады.
Басқа өңірлерде екінші нарықтағы пәтер мен жер үйді алуға мүмкіндік бар.

Өтінім бергеннен кейін қатысушылар ұпай бойынша іріктеледі. Ұпай депозит сомасына, отбасына, балаларға, жасына (35-тен аспаған) және әлеуметтік осал топқа жатуына қарай беріледі.

Өтінімді онлайн түрде Отбасы банк сайтындағы Baspana Market бөлімінде беруге болады.

Нұсқаулық

  1. Отбасы банктің сайтына кіріп, Baspana Market бөліміне өтіңіз және жүйеге кіріңіз.
  2. «Менің өтінімдерім» мәзірінен «Наурыз» бағдарламасын таңдап, «Өтінім беру» батырмасын басыңыз.
  3. Тұрғын үй сатып алғыңыз келетін және тұратын өңірді көрсетіп, шарттармен келісіңіз де, әрі қарай жалғастырыңыз.
  4. Депозитті таңдап, келісетініңізді растаңыз және SMS-кодты жазыңыз.
  5. Деректеріңізді тексеріп, растаңыз.
  6. Банк тұрғын үйдің бар-жоғын және жылжымайтын мүлік статусын тексереді, бұл процесс 3 жұмыс күніне дейін созылады.
  7. Тексерістен өткеннен кейін өтінімге ЭЦҚ арқылы қол қойыңыз.

Бұл ипотека бойынша өтінім қабылдау 3 қарашадан 1 желтоқсанға дейін жалғасады.

«Наурыз Жұмыскер» ипотекасы

3 қарашадан бастап «Наурыз Жұмыскер» ипотекасы бойынша өтінім қабылдау басталады. Өтінім қабылдау мерзімі аяқталмайды, себебі бұл бағдарламада байқау (іріктеу) жоқ. Талаптар мен шарттар «Наурыз» бағдарламасымен бірдей.

Бұл ипотеканың ерекшелігі — ол төмендегі салалардағы мамандық иелеріне арналған:
— өнеркәсіп пен құрылыс,
— энергетика;
— көлік;
— ауыл шаруашылығы;
— су ресурстары және ирригация.
Кеңсе қызметкерлері (мысалы, PR-менеджерлер, бухгалтерлер және т.б.) бағдарламаға қатыса алмайды.

Қарапайым «Наурыз» бағдарламасынан айырмашылығы — мұнда өтінімді онлайн емес, банк филиалдары арқылы жіберу керек. Өзіңізбен бірге жұмыс орнынан анықтама (форма otbasybank.kz сайтында бар) алып бару қажет.