Биыл 24 мамырда ел азаматтары тұрғын үй алу үшін онлайн кезекке тұра алады. Ол үшін orken.otbasybank.kz сайтында өтінім беру қажет.

Жаңа электрондық кезекке кім тұра алатынын және жүйе қалай жұмыс істейтінін түсіндіреміз.

Тұрғын үй кезегіне тұру не береді?

Ол мынадай мүмкіндіктер береді:
— Мемлекеттен жалға үй алу (мерзімсіз не сатып алу құқығымен).
— 2 %-дан 9 %-ға дейінгі мөлшерлемемен жеңілдікті ипотека бағдарламаларына қатысу.

Бұрын тек әлеуметтік осал топтағы кісілер, мемлекеттік қызметкерлер мен табысы аз бюджеттік мекеме мамандары үміткер бола алатын, енді шарттар түбегейлі өзгерді. Кезекке тұру үшін азаматтың өз үйі болмауы керек не баспанасы апатты деп танылуға тиіс. Болды. Басқа талап жоқ.

Кім кезекке тұра алады 

Өтінім беру үшін мына үш талапқа сай болу керек:
1. Жасы — 18-ден асқан.
2. Соңғы 5 жылда азаматтың өзінде және әйелі/күйеуі, балаларының атында үй болмауы қажет. Не болмаса, ол апатты деп танылуға тиіс.
3. Өтінім берген өңірде тұрақты тіркелуі қажет:
— Астана, Алматы немесе Шымкентте — кемі 3 жыл;
— басқа аймақтарда мерзімі маңызды емес.

Сонымен қатар қандастар (отанына оралған қазақтар) және жетім балалар мен басқа категориядағы азаматтардың заңды өкілдері өтінім бере алады.

Өтінім берген өңірде тұрақты тіркелу маңызды. Болашақта дәл сол жерден үй беріледі.

Банк тұрғын үйді қалай үлестіреді

Табысы аз қатысушылардың пәтер жалға алуға не сол үшін субсидия алуға мүмкіндігі бар.

Ал одан көбірек табыс табатын тұрғындар 2, 5, 7 не 9 %-бен жеңілдікті ипотека рәсімдей алады. Бірақ әрқайсысының өз талабы бар.

Үй үлестіруге екі шарт ықпал етеді:

1. Кезекке тұрған күн.
Сол себепті бұрыннан кезекте тұрған кісілер еш уайымдамаса болады, алдымен тізімге ерте қосылған адам үй алады.

2. Басымдықты категория өкілі болу.
Оларға жыл сайын бөлінген объектілердің 70 %-ы беріледі.

Өтінім бермей тұрып не істеу керек

eGov.kz-тегі жеке деректеріңізді тексеріңіз:
— жеке куәлігіңізді;
— отбасылық жағдайыңыз бен отбасы мүшелерінің санын;
— тіркелген жеріңізді;
— атыңызда үй бар-жоғын;
— ЭЦҚ-ның жарамдылық мерзімін.

Қандай да бір мәлімет сәйкес емес екенін байқасаңыз, түзеңіз, әйтпесе өтінім қабылданбауы мүмкін.

Қалай өтінім беруге болады: нұсқаулық

  • 1-қадам. Сайтқа кіріңіз.

orken.otbasybank.kz-ке кіріп, ЭЦҚ (электрондық цифрлы қолтаңба) көмегімен авторизациядан өтіңіз.

Банк жүйесі 14 мемлекеттік базамен біріккен, сондықтан талапқа сай келесіз бе, оны өзі анықтайды.

«Тұрғын үймен қамту орталығы» жүйесі өтінім берушінің үйі бар-жоғын, отбасылық жағдайын, статусы мен катеогриясын және т.б. тексеріп, цифрлық портретін жасайды.

  • 2-қадам. 1–3 күн жауап күтеміз.

Кезекке тұру — мемлекеттік қызмет. Іске асу мерзімі — бір жұмыс күні.

Өтінім беруші құжаттарының сканерден өткен нұсқасын қоса берсе, қызмет мерзімі үш жұмыс күніне дейін ұзаруы ықтимал.

Сканды баспанасы бар, бірақ әкімдік оны апатты деп таныған азамат қоса беруге тиіс.

Тәуліктің кез келген уақытында өтінім беруге болады, бірақ ол тек жұмыс күндері қаралады. Демалыс күні өтінім берсеңіз, ең жақын жұмыс күні кезекке тұрасыз. 

  • 3-қадам. SMS арқылы растау. 

Өтінім берген соң сіз бен отбасыңыздың мүшелеріне банк дерек өңдеуге рұқсат сұрап SMS жібереді. Міндетті түрде «иә» деп жауап беру қажет, әйтпесе өтінім қабылданбайды.