Мемлекет су тасқынының салдарымен күрес бойынша шұғыл штаб құрып, кешенді іс-әрекет жоспарын әзірледі. Зардап шеккендерге жаңа үй салынады. Жобалар әзірленіп қойды және бекітуді күтуде. Бұл туралы Орталық коммуникациялар қызметінде өткен брифингте Өнеркәсіп және құрылыс министрлігінің ресми өкілі Меруерт Ибраева айтты.

Оның айтуынша, үйдің үлгілік жобасы төтенше жағдай болған барлық аймақта қолданылатын болады.

Бірінші жоба — ауданы 80 шаршы метр болатын 3 бөлмелі жеке үй.

Екіншісі — ауданы 160 шаршы метр, екі пәтерден тұратын тұрғын үй.

— Жұмыс келесі аптаның аяғына дейін аяқталады, үлгілік жобалар мемлекеттік сараптаманың қорытындысымен epsd.kz сайтында ашық түрде жарияланады, — деді Ибраева.

Билік жаңа үйлерді тез салуға уәде береді, бұл үшін Қазақстанның түкпір-түкпірінен құрылыс салушыларды тартады. Қаржы мемлекеттік бюджеттен бөлінеді.

Зардап шеккен барлық аймақта жергілікті әкімдіктердің арнайы комиссиялары жұмыс істейді. Олардың міндеті — үйлер мен ғимараттарды тексеру, зақым мен қалпына келтіру жұмыстарының көлемін анықтау.

Тасқын су әлі толық тартылмағандықтан бұл жұмыс ұзаққа созылып отыр.
Әр өңірдегі құрылыс барысын Өнеркәсіп және құрылыс министрі Қанат Шарлапаев қадағалайды.