«Отау» бағдарламасы 2024 жылдың 1 наурызында іске қосылады. 30 сәуірге дейін ел тұрғындары Баспана маркет (otbasybank.kz) порталы арқылы өтініш бере алады. Оның уақыты маңызды емес.

«Отау» ипотекасының шарттары 

  • Бастапқы жарна 20 %-дан бастап;
  • Мөлшерлемесі 9 % (ЖТСМ 9.2 %-ден басталады);
  • Несие мерзімі 19 жылға дейін.

Банк қанша ақша береді және қандай үй алуға болады?

— Алматы мен Астанада ең көбі — 30 млн теңге, басқа өңірлерде 18 млн теңге беріледі.
— Алматы, Астана, Шымкент және облыс орталықтарында ҚТК кепілдік берген ғимарат құрылысына үлестік қатысуды қоса алғанда, тек жаңа үйден баспана алуға мүмкіндік бар;
— басқа аймақтарда кез келген үйді рәсімдеуге болады.

Кім қатыса алады 

  • Отбасы банктен депозит ашқан, кезекте тұрған азаматтар.
  • Обасы банктен депозит ашқанына 18 айдан асқан тұрғындар.
  • Өтінім берген сәтте депозитінде кем дегенде 1 млн теңге тұрғандар.
  • Қатысушының жасы 18 бен 63 аралығында болуы керек.
  • Үміткер мен отбасы мүшелерінің атында соңғы бес жылда өзіне тиесілі баспана болмауға тиіс.
  • Алматы мен Астанадан пәтер алу үшін сол қалада тұрақты тіркелгені маңызды.

— «Отау» бағдарламасы жұмыс істейтін жастарға, жас отбасыларға және Отбасы банк салымшыларына арналған. Демек жыл сайын қарыздың жартысынан көбі жасы 35-тен аспаған тұрғындарды қолжетімді баспанамен қамту үшін беріледі. Бағдарламаға жылда 150 млрд теңгеден бөлуді жоспарлап отырмыз. Оған Отбасы банктің өз қаражаты мен Қазақстанның қаржы нарығынан алған ақша жұмсалады. «Отау» бағдарламасы 7 жылға жоспарланды, сол уақыт аралығында 50 мың азаматтың тұрғын үй мәселесін шешуге көмектесеміз, — деді Отбасы банктің басқарма басшысы Ләззат Ибрагимова.

Өтініш қабылдау процесі аяқталған соң қатысушылар тізімі otbasybank.kz сайтында автоматты түрде жасалады. Оған көп балл жинағандар кіреді. 

Балл не үшін беріледі? 

— депозиттегі ақшаға берілетін сыйақы көлемі үшін — әр мың теңгеге 5 балл.
— жинақ мерзімі үшін — депозит ашқаннан кейінгі әр жылға 5 балл;
— некеде болса — 10 балл;
— бала үшін — саны қанша болса да, 50 балл.

Балл саны бірдей болса, депозитте ақшасы көп, және оны ерте ашқан адамға басымдық беріледі.
Тізімге енген азамат 40 жұмыс күні ішінде несиеге өтінім беруі керек. Банк мақұлдаса, өтінім 6 ай күшінде болады. Сол кезеңде қатысушы үй тауып, қарыз алып, нысанды алып үлгеруге тиіс. 

Бірінші нарықтан (құрылысшыдан) пәтер алатындар Баспана маркет (otbasybank.kz) порталынан ғана үй таңдауға құқылы. 

Банк мамандары нысанды платформаға енгізбес бұрын оның құнын қазіргі нарық бағасына сай белгілейтін болады. Нарыққа сәйкес келсе, 1 шаршы метрінің бағасын бекітіп, құрылыс салушымен келісімге қол қояды. 

Іріктеу барынша ашық өту үшін «Отау» бағдарламасына қатысатындардың тізімі (қарыз алушының келісімімен) Отбасы банк сайтында жарияланады. Кез келген адам otbasybank.kz порталына кіріп, балл есептеп, нәтижесін көре алады.