1 мамырда іске қосылуы керек қолжетімді «Наурыз» ипотекасы бес күн бұрын басталады. Бағдарлама операторы «Отбасы Банк» 25 сәуірден бастап өтінім қабылдай бастайды. Өтінім қабылдау маусымның аяғына дейін екі айға созылады.

Өтінімді «Баспана маркет» (otbasybank.kz) порталы арқылы беруге болады.
Әр тұрғын үй кешені 1 шаршы метр үшін құнын бекіту бойынша бағасын келісуден өтеді. 

«Наурыз» бағдарламасының шарттары 

  • Бастапқы жарна — 20 %-дан бастап.
  • Тұрғын үй алуға кезекте тұрған әлеуметтік осал топтар үшін мөлшерлеме — 7 % (ЖТСМ — 7.3 — 8.9 %).
  • Қалғандарына — 9 % (ЖТСМ — 9.3 — 11.8 %).
  • Несие мерзімі — 19 жыл. 

Несиенің ең жоғары сомасы 

— Алматы мен Астана үшін — 36 млн теңгеге дейін;
— қалған аймақтар үшін — 30 млн теңгеге дейін.
Несиеге үй жөндеуге кететін ақшаны қосуға болады, бірақ несие сомасының 20 %-нан аспауы керек. 

Кім қатыса алады 

— тұрғын үй алуға кезекте тұрған әлеуметтік осал топтар;
— жұмыс істейтін жастар;
— жас отбасы;
— тұрғын үй төлемін алып отырғандар;
— Отбасы банк салымшылары;
— моноқала, аудан орталықтары және ауыл тұрғындары. 

Қатысушыларға қойылатын талаптар 

Талаптар төмендегідей:

  • Отбасы банктен депозит ашу керек. Депозит мерзімі маңызды емес.
  • Депозитте кем дегенде 1 миллион теңге болуы керек. Бұл соманы қатысуға өтінім берер алдында салуға болады.
  • Өтініш берушінің де, оның отбасы мүшелерінің де (жұбайының, кәмелетке толмаған балаларының) соңғы бес жылда баспанасы болмауы керек. Некеге тұрмаған болса, оның атында үйдің бар-жоғы ғана тексеріледі. Кәмелетке толған балалардың ата-анасын тексермейді.
  • Соңғы алты айдағы ресми табысы.

Табысқа жалақы, кәсіпкерліктен түскен пайда, ақылы қызмет көрсету келісімшарты бойынша табыстар, стипендия, тұрғын үй төлемдері кіреді. Табысыңыз жеткіліксіз болса, екі тең қарыз алушыны қоса аласыз. 

Қандай баспана алуға болады 

— Алматы, Астана, Шымкент және облыс орталықтарындағы бірінші нарықтан, оның ішінде ҚТК кепілдігімен үлестік қатысу келісімшарты бойынша, яғни салынып жатқан тұрғын үй кешендерінен.
— Моноқалалар мен ауылдардан екінші нарықтағы тұрғын үйлерді, бірақ бір жылдағы қаражат көлемінің 30 %-нан аспауы тиіс.
Яғни, жыл сайынғы қаржыландырудың 70 %-ы бірінші нарықтағы баспанаға бөлінеді. 

Ипотеканы кім қаржыландырады 

«Наурыз» ипотекасына қаражат қаржы нарығынан алынады. Коммерциялық банктер, сақтандыру компаниялары және т.б. инвестор бола алады. Қарыз алушылар үшін мөлшерлеме мемлекет тарапынан субсидияланатын болады. 

Банк сегіз жыл бойы жыл сайын жалпы сомасы 1.7 триллион теңге болатын облигациялық қарыз шығаратын болады. Бірінші жылы 300 миллиард теңге, одан кейінгі жылдары 200 миллиард теңге шығару жоспарлануда. 

Бағдарлама сегіз жылға созылады. Осы уақыт ішінде 68 мың қазақстандықты жеке баспанамен қамтамасыз ету жоспарлануда. Биыл 12 мың адам қоныс тойын тойлай алады.