Жылжымайтын мүлік сату-сатып алу саласына әбден машықтанған алаяқтар елді алдаудың небір түрін ойлап тауып жатыр.

Қазір пәтерге алдын ала төлем жасау туралы жалған хабарлама жіберетіндер көбейді. Оны сатушыға жылжымайтын мүлік агенттігінің атынан жолдайды.

Хабарламада клиент табылды, ол алдын ала төлем жасауға дайын және тек карта нөмірін жіберу қажет деп жазылады.

Алаяқтар сатушыға былай түсіндіреді: «Сілтеме арқылы өтіп, банк картасындағы мәліметтерді енгізіңіз. Содан кейін ақша шотыңызға түседі». Карта нөмірінен бөлек, CVV-код енгізу қажет, ол шотты толық пайдалануға мүмкіндік береді.

Сендіру үшін қылмыскерлер танымал сайттарды пайдаланады, олардың бірі — Krisha.kz. Скриншот жасап, өз мәтінін қосады. Мессенджерде хат алмасқанда басқа есім, сурет немесе логотип қолданады. Сонымен қатар қосымша белгілер, символдар немесе сөздер қосып, ұқсас сілтеме жасайды.

Күмәнді сайттарға ешқашан жеке дерек жазбаңыз!

Сілтеме арқылы өткенде жалған фишинг сайтқа тап боласыз. Ал карта деректері мен CVV-кодты енгізгенде ақшадан айырылып қалу қаупі бар.
Алаяқтардың торына түспеу жолдары:
— тек ресми қосымшаларды жүктеңіз немесе сайтқа кіріңіз;
— сайт немесе қосымша атауына назар аударыңыз: қосымша сөз, белгі немесе әріптері ауысқан болады.

Есіңізде болсын, алдын ала төлем алу үшін кепілақы келісімшартының екі данасын рәсімдеу қажет. Krisha.kz сұранысы бойынша заңгерлер жасаған құжат үлгісін жүктеп алыңыз.