«Наурыз» ипотекасы бойынша жеңілдікті несиені 12 500 адам алады. «Отбасы банкінің» мәліметі бойынша осынша адам іріктеуден өтіп, бағдарламаға қатысушы атанды.
«Наурыз» ипотекасы биыл көктемде іске қосылды. Мөлшерлеме — 7 %-дан бастап (әлеуметтік осал топтар — жеңілдік алушылар үшін) 9 %-ға дейін.

Бағдарлама қатысушыларының толық тізімін осы сілтеме арқылы көруге болады.

«Наурыз» ипотекасымен қалай пәтер сатып алуға болады?

Тізімдегі барлық қатысушы «Отбасы банкіне» 14 қыркүйекке дейін өтінім жіберуі керек, яғни бағдарлама қатысушыларының өтінім беруіне екі ай бар.

Өтінім мақұлданса, қажет тұрғын үйді табуға және несие рәсімдеуге желтоқсанның ортасына дейін уақыт беріледі.

Кім іріктеуден өтті?

«Наурыз» бағдарламасы бойынша «Отбасы банк» 38 000-нан астам өтінім қабылдады, оның 12 500-і мақұлданды, әр үшінші өтінім қабылданды деуге болады.

— Қатысушылардың көбі ер адам.
— 7 мыңнан астам қатысушы отбасы құрған.
— Қатысушылардың 47 %-ы әлеуметтік осал топқа жатады.
— Ең жас қатысушының жасы 18-де.

«Наурыз» бағдарламасының қатысушылары қалай таңдалды?

Іріктеу кезінде ұпайлар есепке алынды. Олар төмендегідей берілді:
— салым бойынша сыйақы мөлшері үшін — әр 1 000 теңгеге 1 ұпай;
— тіркелген неке үшін — 5 ұпай;
— баланың болуы — 10 ұпай (бала санына қарамастан);
— әлеуметтік осал топта болуы — 10 ұпай;
— 35 жасқа дейінгі болуы — 5 ұпай.
 

«Наурыз» бағдарламасының шарттары

Бағдарлама шарттары төмендегідей:

  • Бастапқы жарна — 20 %-дан бастап.
  • Мөлшерлеме — әлеуметтік осал топ үшін 7 % және қалғандарына 9 %.
  • Несие мерзімі — 19 жылға дейін.

Максимал несие сомасы:
— Алматы мен Астана үшін — 36 млн теңгеге дейін;
— қалған аумақтарға — 30 млн тенгеге дейін.

Пәтерді «Баспана маркет» порталынан сатып алуға болады.