Қазақстанның әр өңірінде тұрғын үй сертификаты беріліп жатыр. Бұл соманы мемлекет береді және оны қайтарудың қажеті жоқ. Мысалы, Алматы тұрғындары 1.5 млн теңге ала алады. Оның көлемі нақты бір аймақ бюджетіндегі қаражатқа байланысты.

Ақшаны тек үй аларда бастапқы жарна ретінде пайдалануға болады.

Тұрғын үй сертификатын кім ала алады

Сертификат табысы аз азаматтарға арналған. Мысалы, әлеуметтік осал топқа жататын:

  • мүгедек бала тәрбиелеп отырған отбасылар
  • көп балалы отбасылар;
  • толық емес отбасылар.

Сонымен қатар денсаулық сақтау, білім беру, мәдениет, спорт және т.б. саладағы сұраныс жоғары мамандық иелеріне беріледі.
Маңызды шарт — өтінім берушінің отбасындағы әр адамның табысы ай сайынғы күнкөріс минимумының 3.1 есе көрсеткішінен аспауға тиіс. Яғни, бір адамға шаққандағы кіріс мөлшері 134 560 теңгеден жоғары болмауы керек. (2024 жылы күнкөріс минимумы — 43 407 теңге).

Өтінімді қараған кезде үміткердің күйеуі/әйелі, кәмелетке толмаған және күндізгі білім беру мекемесінде оқитын 23 жасқа дейінгі балалары есепке алынады.

Тұрғын үй сертификатын қалай алуға болады

Биыл қазан айынан бастап сертификатты eGov.kz порталында онлайн алуға мүмкіндік бар.

Ол үшін:

  • Авторланып, «Жылжымайтын мүлік — Тұрғын үй қатынастары» бөліміне өтіңіз.
  • «Тұрғын үй сертификаттарын беру» бөлімін таңдап, қажет жолдарды толтырыңыз.
  • Өтінімге ЭЦҚ көмегімен қол қойыңыз.

Жауабы үш жұмыс күні ішінде келеді. Оны kezekte.kz сайтындағы жеке кабинеттен көруге болады.