Алматылықтарға электр есептегіштің заманауи үлгісін орнату туралы қоңырау қайтадан түсе бастады. Алаяқтар 1414 (eGov) сияқты хабарлама жіберіп, сендіруге тырысады.

Мұндай қоңырау түскенде не істеу керек, бұл расында алаяқтар ма, әлде шынымен есептегішті ауыстыру қажет пе?

«АлматыЭнергоСбыт» ЖШС былай жауап берді:
— Құрметті тұтынушылар, соңғы уақытта алаяқтардың энергетикалық компания қызметкерінің атынан қоңырау шалуы жиіледі. Ресми түрде ескертеміз: «АлматыЭнергоСбыт» ЖШС қызметкері тек қарыз туралы ескерту үшін хабарласады. Оператор әрқашан аты-жөнін айтады, қарыз сомасын хабарлап, төленбеген жағдайда қызметті өшіретіні туралы ескертеді. 

Электр есептегішті тексеру немесе ауыстыру электр желі иесінің міндеті. Егер шотта «АлматыЭнергоСбыт» логотипі тұрса, желі «Алатау Жарық Компаниясы» АҚ-ға тиесілі және олар есептегішке қызмет көрсетумен айналысады. 

«АЖК» АҚ есептегіш бойынша ешқашан қоңырау шалмайды. Аспапты тексеру немесе ауыстыру туралы хабарлама тек жазбаша түрде келеді. 

Сондықтан сақ болған жөн. Қоңырауларға сенбеңіз. Көз жеткізу үшін қағаз түбіртектегі нөмірге хабарласып, анықтап алуға болады.

1414 (Электрондық үкіметтің Бірыңғай байланыс орталығы) нөмірінен келген SMS хабарламаға келетін болсақ:

  • 1414-тен келген кодты ешкімге беруге болмайды. Бұл код арқылы алаяқтар сіз туралы жеке цифрлық мәліметтерді ала алады.
  • Электрондық цифрлық қолтаңбаны (ЭЦҚ) ешкімге беруге болмайды, себебі ол арқылы әртүрлі құжатқа заңды қол қоюға болады.
  • ЭЦҚ кілті бар флешка жоғалған жағдайда, жаңа кілтті шығару ғана емес, жоғалған кілтті қайтарып алу қажет.
  • ХҚКО-дан ЭЦҚ кілтін алғанда құпиясөзді ауыстыру керек.
  • ЭЦҚ алуды бейтаныс адамға сеніп тапсырмаңыз. Көбінесе бұл қызмет ақылы.