Оқып жүріп пәтер сатып алу мүмкін емес сияқты. Өйткені ипотека алу үшін ресми табыс, бастапқы жарна және зейнетақы қорына аударым болуы қажет. Жалғыз табыс көзі шәкіртақы болса, ипотека рәсімдеуге мүмкіндік бар ма?
2026 жылы банк студентке ипотека бере ме, шәкіртақы табыс ретінде есептеле ме және қандай жолдары бар екенін қарастырайық.

Банк студентке ипотека бере ме

Банктердің стандарт ипотекалық бағдарламалары ресми табысы бар қарыз алушыларға арналған. Әдетте банк соңғы алты айдағы еңбек өтілі және зейнетақы жинағына аударымды талап етеді.
Студент ресми түрде жұмыс істемесе және тек шәкіртақы алса, екінші деңгейлі банктерде кәдімгі ипотека рәсімдеу мүмкін емес. Өйткені шәкіртақы ресми табыс ретінде есептелмейді.

Көптеген банкте жасқа қатысты шектеу бар. Кейбір ипотекалық бағдарламаға тек 21 жастан асқандар қатысады.

Бірақ балама бар.

Студент қандай ипотека ала алады

Студент Отбасы банкінің «Наурыз» бағдарламасына қатыса алады. Бағдарламаға қатысушылардың жасы 18-ден жоғары болуға тиіс.

Бағдарлама шарттарына сәйкес өтінімді қарау кезінде шәкіртақы есепке алынатын табысқа кіреді. Ол төлем қабілетін бағалау барысында ресми түрде ескерілетін табыс ретінде бекітілген.

«Наурыз» бағдарламасы бойынша ресми табысқа мыналар жатады:
жалақы;

  • кәсіпкерлік қызметтен түсетін табыс;
  • қызмет көрсету шарты бойынша төлем;
  • жәрдемақы;
  • тұрғын үй төлемі;
  • шәкіртақы.

Мемлекеттік грантта оқитын студент ипотека рәсімдей алады.

Студент шәкіртақымен қатар ресми түрде жұмыс істесе, ипотека алу мүмкіндігі артады. Бұл жағдайда банк оның жалақысы мен шәкіртақысын бірге есепке алады.

Студенттерге қойылатын талаптар

«Наурыз» бағдарламасына қатысу үшін студент:

  • Қазақстан азаматы немесе қандас болуы керек;
  • соңғы бес жылда өз атында үйі болмауы қажет;
  • Отбасы банкінде депозит ашып, онда кемінде 2 млн теңге жинауға тиіс.

Бастапқы жарна болмаса не істеу керек

Бастапқы капиталды жинауға ата-ана немесе басқа туыстар көмектесе алады. Олардың Отбасы банкінде депозиті болса, оны студенттің жинағымен біріктіруге мүмкіндік бар.

Зейнетақы жинағының жеткіліктік шегінен асатын бөлігін пайдалануға болады. Мұндай қаражатты жақын туыстарға беру мүмкіндігі бар.

Отбасы Банктегі депозитті қалай басқаға беруге болады

Табыс жеткіліксіз болса не істеу керек?

Банк шәкіртақыны есепке алғанмен, оның мөлшері қажет соманы алуға жеткіліксіз болуы мүмкін.

«Наурыз» ипотекасын рәсімдеу қанша табыс табу керек

Мұндай жағдайда қосалқы қарыз алушыларды тартуға болады.

«Наурыз» бағдарламасы бойынша екі қосалқы қарыз алушыны қосуға рұқсат бар. Олардың міндетті түрде туыс болуы шарт емес.

Мысалы, студент ипотеканы ата-анасымен, ағасы немесе әпкесімен, не болмаса табысы төлем қабілетін растауға жеткілікті кез келген адаммен бірге рәсімдей алады.