Krisha.kz салық жөніндегі сарапшы Дмитрий Казанцевтен жеке кәсіпкер болмай-ақ өзін-өзі жұмыспен қамтушы режимі бойынша пәтерді қалай жалға беруге болатыны туралы сұрады.
Оқырмандардың жиі қоятын сұрақтарын талдаймыз.

Екі пәтер жалға берсем, өзін-өзі жұмыспен қамтушы бола аламын ба?

Маңыздысы — объект саны емес, табыс көлемі.
Өзін-өзі жұмыспен қамтушының табысы айына 1.3 млн теңгеден (300 АЕК) аспауы керек.

— Бұл сомадан аспаса, жеке кәсіпкер болмай-ақ осы режимде жұмыс істеуге болады.

Өзін-өзі жұмыспен қамтыған адам табысынан 4 % төлейді. Бұл салық емес, әлеуметтік төлем:

  • міндетті зейнетақы жарнасы — 1%;
  • жұмыс берушінің міндетті зейнетақы жарнасы — 1%;
  • әлеуметтік аударым — 1%;
  • міндетті медициналық сақтандыру жарнасы — 1%.

Яғни өзін-өзі жұмыспен қамтыған адам бұл жарналарды жұмыс беруші қызметкері үшін төлегендей, өзі үшін өзі төлейді.

Арнайы шот ашу керек пе?

— Пәтер жалға беріп, тек қолма-қол ақшамен төлем қабылдасаңыз, арнайы шот ашудың қажеті жоқ.

Жалға алушы қолма-қол ақшамен төлесе, арнайы шот керек емес. E-Salyq Business қосымшасы арқылы чек шығаруға болады.

Ақша картаңызға түссе, арнайы шот міндетті түрде керек.

Пәтер мен паркингті бірге жалға берсем ше?

Мұнда маңызды шектеу бар: өзін-өзі жұмыспен қамтушы режимі тек тұрғын жылжымайтын мүлікті жалға беруге арналған.

Құжат бойынша объект тұрғын емес болса, бұл режимді қолдануға болмайды.

Тұрғын емес объектілер:

  • паркинг;
  • гараж;
  • қойма;
  • коммерциялық үй-жай (дүкен, дәріхана, сұлулық салоны және т. б.).

Ресми жұмыс істесем, өзін-өзі жұмыспен қамтушы бола аламын ба?

Иә, болады.
Бір ғана шектеу бар — жеке кәсіпкер болмауыңыз керек.
Жеке кәсіпкер болсаңыз (тіпті уақытша тоқтаған болса), алдымен оны жабу қажет.
Қалған жағдайларда, яғни жалдамалы қызметкер, компания құрылтайшысы немесе мемлекеттік қызметкер болсаңыз да, өзін-өзі жұмыспен қамтушы статусын алуға болады.

Зейнеткер пәтер жалға берсе, 4% төлей ме?

Зейнеткерлер әлеуметтік жарна төлемейді — олар үшін төлемді мемлекет жасайды.
Сондықтан олар тұрғын үйді 4 % төлемей-ақ жалға бере алады, бірақ айына 1.3 млн теңге лимитінен аспауға тиіс.
Өзін-өзі жұмыспен қамтушы режимі және Салық кодексіндегі басқа өзгерістер туралы толық ақпаратты бейнематериалдан көруге болады. Онда сарапшы барлық нюанстар мен даулы мәселелерді жан-жақты түсіндіреді.