Жер үйді қыста сатып алу керек пе немесе күн жылығанша күте тұрған дұрыс па? Назар аударатын заттар және қашан сатып алған тиімді?

Қыста алудың артықшылығы: 

Көп маманның айтуынша қыс мезгілі жер үй сатып алу үшін ең жақсы уақыт.
Аязда үйді барлық жағынан тексеру ыңғайлы және тұруға қаншалықты дайын екенін білуге болады.

Қыста нені тексере аласыз:

  • Жылыту жүйесінің жұмысын

Мұнда үйдің жалпы температурасына емес, еден суық емес пе және тәпішкесіз жүру ыңғайлы ма, соған ерекше назар аудару керек.
Барлық батарея бірдей жылу беретінін, астынан су ақпайтынын тексеріңіз.
Бөлмелердің бұрышында қара дақ пен көгерген жерлер бар-жоғын қараңыз, болса, қабырға дымқыл екенін білдіреді.

  • Шатырдың сапасын

Шатырда қар қалай жатқанын қараңыз. Тегіс болса бәрі жақсы. Еріп кеткен жерлері болса, ол жер нашар жылытылған немесе суық өткізеді деген сөз.

  • Іргетасы мен сыртқы жағдайын

Жазда үйдің барлық кемшілігі білінбейді, себебі сатып алушының (әсіресе үйренбеген адам) көзі жер теліміне түседі. Ал іргетастағы кемшіліктерді гүлмен, баубақша жиһазымен және т.б. жауып қояды.
Қыста барлық жарық және оны жөндеу орындары бірден көрінеді. Міндетті түрде үйдің жан-жағын қараңыз. Жертөлеге түсіңіз, дымқыл, көгерген немесе бұрыштары қырау баспаған болу керек.

  • Коммуникация жұмысын

Асүйдегі және санитарлық тораптағы суды қосыңыз, құбыр мен кәріз жүйесінде су қатып қалмағанына көз жеткізіңіз.

  • Терезелерді

Қыста буланбайтын, жел соқпайтын, қаншалықты сапалы шыныпакет орнатылғанын бірден білуге болады.
Буланған терезелер, бұрышындағы қара дақтар гидрооқшаулау нашар екенінің айғағы.

  • Жол жағдайын

Арнайы техника тазалай ма, көлігіңіз өте ала ма, аялдамаға жаяу жету оңай ма (әсіресе тау бөктеріндегі үйлер).

Үйді қашан алған тиімді

Қыста алудың тағы бір пайдасы — бағасы. Нарық тоқтап тұратын, сауда қыза қоймайтын мезгіл. Бұл сатушылар бағасын төмендетіп, саудаласатын кез.

Krisha.kz-те Қазақстан бойынша үй сату туралы 70 мыңға жуық хабарландыру бар.

Қыста алудың кемшілігі

Негізгі кемшілік — жер телімін тексере алмау.
Қар астында жатқанның бәрі көзден тыс қалатындықтан, мыналарды анықтау қиынға соғады:

  • жер телімін жерасты сулар баспай ма;
  • жер қыртысының сапасы бақша егуге қолайлы ма;
  • жер теліміндегі ағаштар сау ма;
  • есік алдындағы төсем сапалы ма (мысалы, кеспетас).

Қыс — жер үй сатып алуға оңтайлы уақыт. Біраз саудаласуға мүмкіндік бар, оған қоса үйіңіздің жылы екенін, коммуникациямен байланысты еш мәселе жоқтығын анықтай аласыз.

Үйді көруге және оны сатып алуға кететін уақыт орналасқан жеріне де байланысты. Жақын жерде су қоймасы (өзен, көл) болса немесе ойпатта немесе керісінше, еңісте орналасса, онда мұндай жерді жаңбырлы маусымда да (көктем немесе күз) қараған жөн. Жер телімін су баспайтынына, жертөле ылғал болмайтынына, үйге баратын жолды су шайып кетпейтініне көз жеткізіңіз.